ដោយ៖ ពៅ មេត្តា | ថ្ងៃពុធ ទី2 កក្កដា 2014, VOD
ក្រោយការបោះឆ្នោតជ្រើសតាំងតំណាងរាស្ត្រអាណត្តិទី៥ កាលពីខែកក្កដាឆ្នាំ២០១៣មក ជាង១១ខែមកហើយតែគណបក្សទាំងពីរដែលមានសំឡេងក្នុងសភា នៅមិនទាន់រកចំណុចឯកភាពគ្នាបាននៅឡើយ បើទោះជាភាគីទាំងពីរចរចាជាច្រើនលើកច្រើនសារក៏ដោយ។ ចំណុចទ័លច្រកចុងក្រោយ ដែលភាគីទាំងពីរមិនទាន់រកច្រកចេញ ត្រង់ចំណុច២/៣ និង៥០បូក១ក្នុងការបោះឆ្នោតយកសំឡេងទុកចិត្តពីសភាលើសមាសភាព គ.ជ.ប។
ក្នុងកិច្ចប្រជុំថ្ងៃទី១២ ខែមិថុនា ក្រុមការងារគណបក្សប្រជាជនកម្ពុជា(CPP) និងគណបក្សសង្គ្រោះជាតិ(CNRP) បានឯកភាពគ្នាដោយដាក់ស្ថាប័ន គ.ជ.ប ជាស្ថាប័នឯករាជ្យ និងធ្វើវិសោធនកម្មរដ្ឋធម្មនុញ្ញ បង្កើតជំពូកថ្មីមួយទៀត គឺជំពូកទី១៥ ស្តីពីអង្គការរៀបចំការបោះឆ្នោត។ ប៉ុន្តែនៅមានការខ្វែងគំនិតគ្នាលើការបោះឆ្នោតសម្តែងការទុកចិត្តលើ សមាសភាព គ.ជ.ប ថ្មីនេះ ដោយភាគីគណបក្សសង្គ្រោះជាតិ ទាមទារសំឡេង២/៣នៃរដ្ឋសភា រីឯគណបក្សប្រជាជនកម្ពុជាទាមទារសំឡេង៥០បូក១។
បន្ទាប់ពីភាគីទាំងពីរផ្អាកការចរចា ហើយប្រកាន់ជំហរឈប់ចរចារៀងៗខ្លួននោះ លោក ហ៊ុន សែន ថ្លែងនៅថ្ងៃទី០១កក្កដាថា ការទាមទាររបស់គណបក្សសង្គ្រោះជាតិចង់បានសំឡេង២/៣នោះ គឺជាបំផ្លាញលទ្ធិប្រជាធិបតេយ្យ។
ក្រោយការថ្លែងរបស់លោកហ៊ុន សែនតែប៉ុន្មានម៉ោង អ្នកនាំពាក្យគណបក្សសង្គ្រោះជាតិ លោក យ៉ែម បុញឬទ្ធិ មានប្រសាសន៍ថា ដោយសារ គ.ជ.ប អនុម័តសំឡេង៥០បូក១ នេះហើយ ដែលធ្វើឲ្យគាំងនយោបាយដល់បច្ចុប្បន្ន។ លោកបន្តថាឫសគល់នៃការជាប់គាំងនយោបាយនេះដោយសារ គ.ជ.ប មិនឯករាជ្យ ដូចនេះគណបក្សសង្គ្រោះជាតិទាមទារឲ្យអនុម័ត២/៣ គឺដើម្បីប្រជាធិបតេយ្យ និងផលប្រយោជន៍ជាតិទាំងមូល។
វិបត្តិនយោបាយនៅអាណត្តិទី៥នេះ មិនមែនជារឿងថ្មីទេនៅកម្ពុជា ព្រោះ៤អាណត្តិមុនដែលចាប់ផ្តើមតាំងពីឆ្នាំ១៩៩៣មក ក៏តែងមានជម្លោះនយោបាយដែរ គឺនៅពេលគណបក្សដែលចាញ់ តែងចេញមុនតវ៉ាដោយចោទថា គ.ជ.ប មិនឯករាជ្យ។
ទន្ទឹមនឹងលោកនាយករដ្ឋមន្ត្រី ហ៊ុន សែន ចោទថាគណបក្សសង្គ្រោះជាតិទាមទារចង់បំផ្លាញលទ្ធិប្រជាធិបតេយ្យ លោកក៏បានបញ្ជាក់ជំហរការពារលទ្ធិប្រជាធិបតេយ្យ អនុវត្តដឹកនាំរដ្ឋាភិបាលតាមឆន្ទៈពលរដ្ឋ ដែលមានសំឡេងភាគច្រើន ដោយមិនខ្វល់ពីគណបក្សសង្គ្រោះជាតិ ចូលរួមឬមិនចូលទេ។
តើសំឡេង២/៣ ឬ៥០បូក១ ដែលបំផ្លាញលទ្ធិប្រជាធិបតេយ្យ?
សម្រាប់នាយកប្រតិបត្តិនៃគណៈកម្មាធិការអព្យាក្រឹត្យ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោក ហង្ស ពុទ្ធា ពន្យល់ថា ២/៣ ឬ៥០បូក១ សុទ្ធតែបង្ហាញ ពីការងារដែលអនុវត្តតាមគោលការណ៍លទ្ធិប្រជាធិបតេយ្យដូចគ្នា ព្រោះនេះបង្ហាញពីសំឡេងភាគច្រើនពីគណបក្សលើសពីមួយ។
ទោះយ៉ាងណាលោក ហង្ស ពុទ្ធា បញ្ចាក់ថា សំឡេង៥០បូក១ ហាក់ដូចជាមានប្រជាធិបតេយ្យនៅមានកម្រិតស្រាល ព្រោះអាចធ្វើឲ្យគណបក្សតែមួយមានសំឡេងច្រើន អាចសម្រេចលើសមាសភាពគ.ជ.ប តែម្នាក់ឯង។
បច្ចុប្បន្នគណបក្សសង្គ្រោះជាតិ និងគណបក្សប្រជាជនកម្ពុជា កំពុងមានការព្រួយបារម្ភដូចគ្នា គឺថាជ្រើសរើសយក២/៣ បើគណបក្សសង្គ្រោះជាតិជំទាស់នោះនាំឲ្យជាប់គាំង។ មួយវិញទៀត បើជ្រើសរើសរូបមន្ត៥០បូក១ គឺគណបក្សប្រជាជនកម្ពុជា អាចសម្រេចរាល់កិច្ចការស្រេចតែចិត្ត ដោយមិនខ្វល់ពីគំនិតរបស់គណបក្សជាដៃគូរបស់ខ្លួននោះទេ។
ចំណុចនេះលោក ហង្ស ពុទ្ធា ផ្តល់អនុសាសន៍ថា បើគណបក្សទាំងពីរសុទ្ធតែស្រលាញ់ជាតិ ស្រលាញ់ប្រជាពលរដ្ឋមែននោះ មិនត្រូវប្រកាន់ជំហររឹងត្អឹងដូចនេះទេ គឺត្រូវជជែករកចំណុចកណ្តាលរួមទៅ។
សម្រាប់សាស្ត្រាចារ្យប្រវត្តិសាស្ត្រ និងនយោបាយលោក សុខ ទូច យល់ឃើញថា ៥០បូក១ ដោះស្រាយបញ្ហារយៈពេលខ្លី ចំណែក២/៣សម្រាប់រយៈពេលវែង។ លោកផ្តល់អនុសាសន៍ បើគណបក្សទាំងពីរខ្លាចដូចគ្នានោះ គឺអាចបោះឆ្នោតជាកញ្ចប់ក្នុងការធ្វើវិសោធនកម្មលើរដ្ឋធម្មនុញជំពូកទី១៥ និងសមាសភាព គ.ជ.ប ក្នុងពេលតែមួយតែម្តង។
ជាក់ស្តែង គ្មានអ្វីដែលអ្នកនយោបាយមិនអាចដោះស្រាយបានទេ បើពួកគេមានឆន្ទៈនោះ។ ករណីដូចឆ្នាំ១៩៩៣ ពេលដែលគណបក្សប្រជាជនរបស់លោកនាយករដ្ឋមន្ត្រី ហ៊ុន សែន ចាញ់ឆ្នោត មិនមានច្បាប់ណាចែងពីសហនាយករដ្ឋមន្ត្រីទេ តែពេលនោះដើម្បីជៀសវាងបែងចែកទឹកដីកម្ពុជា ក៏មានការសម្របសម្រួលពីសម្តេចសីហនុ ឲ្យចេញជារូបមន្តសហនាយករដ្ឋមន្ត្រី ដែលមានលោក ហ៊ុន សែន និងសម្តេចក្រុមព្រះ។
វិភាគផ្សេងៗ
អង្គការសង្គមស៊ីវិលក្នុងស្រុក ដែលធ្វើការលើការបោះឆ្នោត និងលទ្ធិប្រជាធិបតេយ្យ ក៏ដូចជាអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា សុទ្ធតែបានជំរុញឲ្យភាគីចរចារកចំណុចរួម ដើម្បីបញ្ចប់វិបត្តិនយោបាយ ងាកមកអភិវឌ្ឍប្រទេស បំពេញតម្រូវការរបស់ប្រជាជនវិញ។
បច្ចុប្បន្នប្រជាជនកំពុងជួបបញ្ហាកសិផលលក់បានតម្លៃថោក ការមិនមានការងារធ្វើ និងជម្លោះដីធ្លីជាដើម។ ទន្ទឹមនឹងអ្នកនយោបាយមិនត្រូវគ្នានេះ របាយការណ៍របស់អង្គការ និងសហគមន៍ការពារធនធានធម្មជាតិ ក៏បានឲ្យដឹងដែរថា មានការកាប់ព្រៃឈើពីឈ្មួញទុច្ចរិតយ៉ាងកំហុគ រួមទាំងមានការចូលរួមពីមន្ត្រីពាក់ព័ន្ធដែរ។
លោក សុខ ទូច បានអំពាវនាវឲ្យប្រជាពលរដ្ឋ ត្រូវពិចារណាឡើងវិញលើសន្លឹកឆ្នោតរបស់ខ្លួន បើសិនជាមេដឹកនាំគណបក្សទាំងពីរមិនមានសមត្ថភាពដោះស្រាយបញ្ហាបាន ដើម្បីការពារផលប្រយោជន៍ជាតិ និងប្រយោជន៍ប្រជាពលរដ្ឋដូចការរំពឹងទុកនោះ៕
សូមសរសេរមកលោក ពៅ មេត្តា តាមរយៈ minpov@vodhotnews.com
No comments:
Post a Comment