Deputy opposition leader Kem Sokha and 7 opposition parliamentarians re-summoned to appear before Phnom Penh Court បេក្ខជនជាប់ឆ្នោតជាតំណាងរាស្រ្តCNRP៧រូប ត្រូវបានកោះហៅសាកសួរជាថ្មី​

ដោយ៖​ ស៊ុន ណារិន​ | ថ្ងៃសុក្រ ទី1 សីហា 2014

លោកស្រី មូរ សុខហួរ បេក្ខជនជាប់ឆ្នោតតំណាងរាស្រ្តគណបក្សសង្រ្គោះជាតិ ដែលត្រូវបានតុលាការកោះហៅសាជាថ្មី

បេក្ខជន​ជាប់ឆ្នោត​ជា​តំណាងរាស្ត្រ​CNRP ៧​រូប រួម​នឹង​អនុប្រធាន​គណបក្ស លោក កឹម សុខា ត្រូវ​បាន​កោះហៅ​សាកសួរ​ជាថ្មី ករណី​ហិង្សា​នៅក្បែរ​ទីលាន​ប្រជាធិបតេយ្យ​។​

​ការកោះហៅ​នេះ ធ្វើឡើង​ស្របពេល​ដែល​គណបក្ស​នយោបាយ​ទាំងពីរ កំពុងតែ​ចរចា​លើ​កំណែទម្រង់​មួយចំនួន តាម​កិច្ចព្រមព្រៀង​នយោបាយ​កាលពី​ថ្ងៃ​ទី​២២​ខែកក្កដា ឆ្នាំ​២០១៤​។ តែ​ភាគី​ទាំងពីរ កំពុងតែ​ខ្វែងគំនិត​ក្នុង​មួយ​ចំនួន​លើ​អភ័យឯកសិទ្ធិ​ជា​តំណាងរាស្ត្រ​សម្រាប់​សមាជិក​គជប​។​

​មន្ត្រី​គណបក្ស​សង្គ្រោះ​ជាតិ និង​ជា​កូនស្រី​លោក កឹម សុខា សរសេរ​នៅលើ​ហ្វេ​សប៊ុក​ថា បេក្ខជន​ជាប់ឆ្នោត​ជា​តំណាងរាស្ត្រ​CNRP ៧​រូប រួម​នឹង លោក កឹម សុខា ត្រូវបាន​តុលាការ​កោះហៅ ដើម្បី​សាកសួរ​។​

លោកស្រី មូរ សុខហួរ បេក្ខជនជាប់ឆ្នោតតំណាងរាស្រ្ត ប្រាប់VODនៅរសៀលថ្ងៃសុក្រនេះថា លោកស្រី រួមនឹងបេក្ខជនជាប់ឆ្នោតតំណាង​រាស្រ្ត​៦រូបទៀត និងលោក អឿ ណារិទ្ធិ សកម្មជនគណបក្ស ក៏ត្រូវបានកោះហៅសាកសួរនៅថ្ងៃទី១១ខែសីហា វេលា​ម៉ោង​៨ព្រឹក។ លោកស្រីបន្តថា នេះមិនមែនជារឿងភ្ញាក់ផ្អើលទេ គឺតុលាការគ្រាន់តែដំណើរតាមនីតិវិធីប៉ុណ្ណោះ។ លោក​ស្រីថា នេះមិនមែនជារឿងដែលបណ្តាលមកពីការចរចាបច្ចុប្បន្ន​ខ្វែងគំនិតគ្នានោះទេ ហើយលោកស្រី ក៏មិន​គិតថាជារឿងគំរាមកំហែងដែរ។ ប៉ុន្តែលោកស្រីចាត់ទុកនេះជានីតិវិធីខុសតាំងពីដើមមក។

លោកស្រីបញ្ជាក់ទៀតថា មេធាវីរបស់លោកស្រី បានព្យាយាមសុំតុលាការមើលឯកសា​រមួយចំនួនកា​ល​ពីចុង​ខែកក្កដា តែតុលាការថានឹងអនុញ្ញាតឲ្យមើលនៅដើមខែសីហានេះ។

​ដីកា​កោះ ចុះហត្ថលេខា​ដោយ​ចៅក្រម​ស៊ើបសួរ លោក កែវ មុនី ថ្ងៃទី​៣១​ខែកក្កដា ឲ្យដឹងថា តុលាការ អញ្ជើញ​ឈ្មោះ​កឹម សុខា អាយុ​៦១​ឆ្នាំ ជា​អ្នកទទួលខុសត្រូវ​ក្នុងនាម​ជា​មេដឹកនាំ​គណបក្ស​សង្គ្រោះ​ជាតិ​ឲ្យចូល​បំភ្លឺ​នៅ​សាលា​ដំបូងថ្ង​ស​ទី​១១​ខែ​សីហា ឆ្នាំ​២០១៤ វេលា​ម៉ោង​១០​ព្រឹក​។ 

​បេក្ខជន​ជាប់ឆ្នោត​ជា​តំណាងរាស្ត្រ​៧ រួមមាន លោកស្រី មូរ សុខ​ហួរ បេក្ខជន​តំណារាស្ត្រ​ជា​ប់ឆ្នោត​ខេត្ត​បាត់ដំបង លោក ម៉ែន សុថា​វ​រិន្ទ្រ បេក្ខជន​តំណាងរាស្ត្រ​ជាប់ឆ្នោត​ខេត្តកំពង់ធំ លោក ហូរ វ៉ាន់ បេក្ខជន​តំណាងរាស្ត្រ​នៅ​ភ្នំពេញ លោក លោក រៀល ខេ​មរិ​ន្ទ្រ បេក្ខជន​តំណាងរាស្ត្រ​គណបក្ស​សង្គ្រោះ​ជាតិ​ខេត្ត​ស្វាយរៀង និង​លោក កែវ ភារម្យ បេក្ខជន​តំណារាស្ត្រ​ជា​ប់ឆ្នោត​ខេត្ត​ក្រចេះ លោក ឡុង រី បេក្ខជន​ជាប់ឆ្នោត​តំណាងរាស្ត្រ​ខេត្ត​បន្ទាយមានជ័យ និង លោក នុត រំដួល បេក្ខជន​តំណាងរាស្ត្រ​ជាប់ឆ្នោត​ខេត្តកំពង់ស្ពឺ​។​

​ក្នុង​សន្និសីទ​សារព័ត៌មាន ក្រោយ​កិច្ចចរចា​ថ្ងៃទី​២២​ខែកក្កដា ឆ្នាំ​២០១៤ លោក ព្រុំ សុខា មន្ត្រីជាន់ខ្ពស់​គណបក្ស​ប្រជាជន​កម្ពុជា ថ្លែងថា គណបក្ស​ទាំង​ពីរ បាន​ឯកភាពគ្នា​ក្នុង​ការស្នើ​ឲ្យ​តុលាការ​ពន្លឿ​ននីតិវិធី​ឲ្យនៅ​ក្រៅ​ឃុំ​ជា​បណ្តោះអាសន្ន សម្រាប់​អ្នក​ទាំង​៨ ដើម្បី​សម្រួល​បរិយាកាស​នយោបាយ​។​

​លោក​បញ្ជាក់ថា​«...​យើង​មិន​អាច​ធ្វើ​អ្វី​រំលង​នីតិវិធី​តុលាការ​ទេ គណបក្ស​ទាំង​ពីរ​គ្រាន់តែ​ស្នើ​សុំ​ឲ្យ​តុលាការ​ពិនិត្យ​ពន្លឿ​ននីតិវិធី​នៃ​ការ​ស្ថិត​នៅក្រៅ​ឃុំ​ជា​បណ្តោះអាសន្ន ...​ដើម្បី​សម្រួល​បរិ​កាស​នយោបាយ​»​។​

​លោក​បដិសេធ​នឹង​មតិ​លើកឡើង​ថា ការដោះលែង​ឲ្យនៅ​ក្រៅឃុំនេះ ដោយសារ​ការចរចា​នៅថ្ងៃនេះ​។ លោក​ថា បញ្ហា​នេះ​មិន​ពាក់ព័ន្ធ​នឹង​នយោបាយ​ទេ​។​

​បេក្ខជន​ជាប់ឆ្នោត​ជា​តំណាងរាស្ត្រ​ទាំង​៧​រូប ត្រូវបាន​ចោទប្រកាន់​ពី​បទ​ដឹកនាំ​ធ្វើ​កុបកម្ម យោងតាម​មាត្រា ៤៥៩​នៃ​ក្រម​ព្រហ្មទណ្ឌ និង​ពី​បទ​ផ្តើមគំនិត​បង្ក​ហិង្សា និង​ញុះញង់​ឲ្យ​ប្រព្រឹត្ត​បទឧក្រិដ្ឋ យោងតាម​មាត្រា ២៨, ២១៨ និង ៤៩៥​នៃ​ក្រម​ព្រហ្មទណ្ឌ​៕

​សរសេរ​មកកាន់​លោក ស៊ុន ណារិន តាមរយៈ​sun_narin@vodhotnews.com