ដោយ៖ ឡាយ សាមាន | ថ្ងៃព្រហស្បតិ៍ ទី18 កញ្ញា 2014,
លោកនាយករដ្ឋមន្ត្រី ហ៊ុន សែន នាពេលកន្លងមក (រូបដោយ៖ វិចិត្រ)
លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ ស្វាគមន៍លោក កឹម សុខា អនុប្រធានគណបក្សង្គ្រោះជាតិ ដែលមួយរយៈនេះ លែងឮអនុប្រធានរដ្ឋសភារូបនោះ និយាយនៅតាមទីសាធារណៈ ពីការចង់ទម្លាក់រដ្ឋមន្ត្រី និងបោសសម្អាតមន្ត្រីពុករលួយ។
ក្នុង ពិធីប្រកាសផ្សព្វផ្សាយ ផែនការយុទ្ធសាស្ត្រអភិវឌ្ឍន៍ជាតិ ២០១៤-២០១៨ នៅព្រឹក ថ្ងៃទី១៨ ខែកញ្ញា ឆ្នាំ២០១៤ នាយករដ្ឋមន្ត្រីលោក ហ៊ុន សែន ថ្លែងថា ប៉ុន្មានថ្ងៃនេះ គណៈកម្មការនានា របស់សភាបានអញ្ជើញរដ្ឋមន្ត្រីទៅសួរដែលក្នុងនោះ រដ្ឋមន្ត្រីសុខាភិបាល រដ្ឋមន្ត្រីអប់រំផងដែរ។ លោកបន្តថា លោកគាំទ្រឲ្យមានការជជែកពិភាក្សាគ្នាក្នុងក្របខណ្ឌសភា តែលោកមិនគាំទ្រការដើរឃោសនានៅតាមទីសាធារណៈនោះទេ។ លោកមានប្រសាសន៍ថា «នាយករដ្ឋមន្ត្រី ត្រូវការពាររដ្ឋមន្ត្រីរបស់ខ្លួន។ ប្រសិនជាខុសមិនចាំបាច់ឲ្យអស់លោកបោះឆ្នោតទម្លាក់ទេ តែបើចង់បោះឆ្នោតទម្លាក់ក៏មកនិយាយក្នុងសភា មិនមែននិយាយនៅក្រៅសភាទេឲ្យស្គាល់ទីកន្លែងដែលត្រូវនិយាយ តែ១០ថ្ងៃនេះ ដូចជាស្គាល់ទីកន្លែង។ អបអរសាទរណាស់ផ្ញើជូននូវការគោរព»។
លោក មុត ចន្ថា នាយកខុទ្ទកាល័យអនុប្រធានទី១រដ្ឋសភា មានប្រសាសន៍ថា លោក កឹម សុខា មិនចង់ឆ្លើយឆ្លងលើបញ្ហានេះទេដោយលោកកំពុងជាប់ប្រជុំ។
លោក ហ៊ាង ឬទ្ធី ប្រធានអង្គការស្រាវជ្រាវជាតិកម្ពុជាយល់ថា ការដែលអ្នកនយោបាយទាំងពីរឈប់វាយប្រវាគ្នាទៀតនេះ ដោយសារតែមានកិច្ចព្រមព្រៀងនយោបាយ។ លោកបញ្ជាក់ថា «គាត់មិនហ៊ាន និយាយផ្តេសផ្តាសអីទៀត ដោយសារគាត់មានកិច្ចព្រមព្រៀងសម្ងាត់មួយជាមួយលោកហ៊ុន សែនគឺគាត់សន្យាថា នឹងរួបរួមគ្នា នឹងចូលគ្នា ហើយគាត់ឈប់ឈ្លោះគ្នា ជជែកគ្នាដៀលគ្នា នេះកន្លែងហ្នឹងហើយដែលគាត់ត្រូវតែស្ងប់ស្ងាត់។ ប៉ុន្តែភាពស្ងប់ស្ងាត់របស់គាត់ ទោះបីគាត់មិនចង់ស្ងប់ស្ងាត់ក៏ត្រូវតែស្ងប់ស្ងាត់ព្រោះគាត់ មានចំនុចខ្សោយ លោកកឹម សុខា ក៏មានចំនុចខ្សោយ លោកសមរង្ស៊ី ក៏មានចំនុចខ្សោយពាក់ព័ន្ធនឹងលោកហ៊ុនសែន។ ដូច្នេះអត់ហ៊ានអ្វីកម្រើកនិយាយទេ»។
ថ្មីៗនេះលោក នាយករដ្ឋមន្ត្រី ហ៊ុន សែន ព្រមានថា បើលោក កឹម សុខា បោះឆ្នោតទម្លាក់រដ្ឋមន្ត្រីដែលចាត់ទុកថាពុករលួយនោះ លោកនឹងដឹកនាំតំណាងរាស្ត្រប្រជាជនបោះឆ្នោតដកដំណែងលោក កឹម សុខា វិញ។ ប៉ុន្តែលោក កឹម សុខា មានប្រសសាន៍ថា អ្វីដែលលោកបានលើកឡើងនោះគឺគ្រាន់តែចង់ឲ្យសាធារណជន និងម្ចាស់ឆ្នោតដឹងថាតើគណបក្សសង្គ្រោះជាតិចូលសភាអាចធ្វើអ្វីបាន ខ្លះ។
លោកយល់ថា បើលោកនាយករដ្ឋមន្ត្រីចង់បោះឆ្នោតទម្លាក់លោកមែននោះ គឺមានន័យថាគណបក្សប្រជាជនកម្ពុជាបានរំលោភលើកិច្ចព្រមព្រៀងនៃការ បញ្ចាប់ជម្លោះនយោបាយ កាលពីថ្ងៃទី២២ ខែកក្កដា ឆ្នាំ២០១៤។
ទោះជាយ៉ាងណា លោក ហ៊ុនសែន ក៏ចង់ឲ្យមានដំណើរការកោះហៅមន្ត្រីរដ្ឋាភិបាលមកសួរក្នុងសភាជាបន្ត ទៀត ដើម្បីរួមគ្នាដោះស្រាយបញ្ហាប្រទេសជាតិទាំងមូល។ លោកព្រមានថា ប្រសិនបើគណៈកម្មការសភាកោះអញ្ជើញមន្ត្រីរដ្ឋាភិបាលទៅសួរ គឺមន្ត្រីរដ្ឋាភិបាលរូបនោះ ត្រូវតែទៅមិនចាំបាច់សួរលោកថា តើត្រូវឆ្លើយថាម៉េចនោះទេ៕
សូមសរសេរមកកាន់លោក ឡាយ សាមាន តាមរយៈ samean@vodhotnews.com
No comments:
Post a Comment