ទឹកចិត្តស្រឡាញ់ការងារនយោបាយនិងមហិច្ឆតាចង់ឲ្យប្រទេសជាតិមានការដឹកនាំតាមលទ្ធិប្រជាធិបតេយ្យ និងនីតិរដ្ឋពិតប្រាកដ តាំងតែពីដឹងក្តីមកនោះ បានជំរុញឲ្យលោក ម៉ៅ មុនីវណ្ណ បោះបង់អាជីពជាវេជ្ជបណ្ឌិត ផ្នែកវះកាត់ នៅក្នុងពេទ្យយោធាទាំងស្រុងនៅក្នុង ឆ្នាំ១៩៩៧ ហើយងាកមកប្រឡូកក្នុងអាជីពនយោបាយយ៉ាងងប់ងុល រហូតសព្វថ្ងៃលោកក្លាយជាតំណាងរាស្ត្រមួយរូបរបស់គណបក្សសង្គ្រោះជាតិ។
លោក ម៉ៅ មុនីវណ្ណ បានរៀបរាប់ថា ក្រោយពីជាប់បាក់ឌុប លោកប្រឡងចូលសាលាពេទ្យ ឆ្នាំ១៩៨៦ រហូត ឆ្នាំ១៩៩២ លោកបានបញ្ចប់ការសិក្សាហើយត្រូវបានចាត់បញ្ជូនឲ្យទៅបម្រើការងារនៅ ខេត្តកំពង់ចាម ក្នុងអង្គភាពពេទ្យយោធាប្រចាំនៅភូមិភាគ (ឬតំបន់)។ លោកធ្វើការទីនោះបានមួយរយៈខ្លី ទើបសុំផ្លាស់មកភ្នំពេញវិញ។ លោកបម្រើការងារជាគ្រូពេទ្យនៅមន្ទីរពេទ្យយោធានៅរាជធានីភ្នំពេញចាប់ពី ឆ្នាំ១៩៩៣ ដល់ ឆ្នាំ១៩៩៧ ក្នុងជំនាញផ្នែកវះកាត់ពោះនិងទ្រូង។
ក្នុងអំឡុងពេលសិក្សានៅមហាវិទ្យាល័យពេទ្យលោកបានរំឭកថា៖ «ខ្ញុំបានប្រឡូកក្នុងនយោបាយរួចទៅហើយ គឺពេលនោះខ្ញុំជួយដោយប្រយោលដល់គណបក្សហ៊្វុនស៊ិនប៉ិច»។
លោក ម៉ៅ មុនីវណ្ណ បានរៀបរាប់ប្រាប់កម្ពុជាចុងសប្ដាហ៍ថា នៅក្នុងទសវត្សរ៍ ឆ្នាំ១៩៩០ លោកបានដឹកនាំក្រុមនិស្សិតពេទ្យធ្វើបាតុកម្មប្រឆាំងនឹងគណបក្សកាន់អំណាចនាពេលនោះ គឺសម័យរដ្ឋកម្ពុជា ខណៈក្រុមមន្ត្រីបានឃុបឃិតគ្នាលក់ទ្រព្យសម្បត្តិជាតិ។
លោកបន្តថា៖ «កាលនោះខ្ញុំនៅយុវជនអាយុប្រមាណជា ៣០ឆ្នាំ ជាមនុស្សម្នាក់ក្នុងចំណោមមេដឹកនាំ ៥នាក់ ដែលដឹកនាំនិស្សិតពេទ្យធ្វើបាតុកម្មប្រឆាំងទៅនឹងការលក់ទ្រព្យសម្បត្តិជាតិ ជាច្រើន ដូចជា ការលក់ក្រសួង មន្ទីរ សាលារៀន ជាដើម... ទើបក្រុមនិស្សិតស្នេហាជាតិប្រមូលយុវជននិស្សិតពេទ្យធ្វើបាតុកម្មប្រឆាំងនឹងអ្នកកាន់អំណាចទាមទារយុត្តិធម៌»។
ការប្រឈមដាក់គ្នារវាងនិស្សិតពេទ្យនិងកងកម្លាំងប្រដាប់អាវុធពេលនោះលោក មុនីវណ្ណ អះអាងថា បានធ្វើឲ្យនិស្សិតស្លាប់ និងបាត់ខ្លួនជាច្រើន ដែលតាមលោកនៅចាំ គឺមានស្លាប់ ៣ នាក់បាត់ខ្លួននិស្សិត ២០ នាក់។
លោកថ្លែងថា ក្នុងអំឡុងពេលនោះ យប់ឡើងលោកមិនដែលហ៊ានដេកនៅផ្ទះទេ លោកតែងតែចល័តកន្លែងស្នាក់ពីកន្លែងមួយទៅកន្លែងមួយដើម្បីសុវត្ថិភាព។
លោក ម៉ៅ មុនីវណ្ណ មានប្រសាសន៍ថា៖ «ខ្ញុំយល់ថា សង្គមខ្មែរពេលនោះ ជារបបកុម្មុយនីស្ត រណបបរទេស ហើយពុំមានអ្នកទប់ស្កាត់ការលក់ទ្រព្យសម្បត្តិជាតិ ទើបបានមានការដឹកនាំជាបាតុកម្មនេះឡើង»។
លោកនិយាយទៀតថា ក្រោយមានកិច្ចព្រមព្រៀង ទីក្រុងប៉ារីស ដើម្បីឲ្យភាគីជម្លោះនយោបាយខ្មែរចូលមកបោះឆ្នោតនា ឆ្នាំ១៩៩៣ ក្រោមការរៀបចំដោយអង្គការសហប្រជាជាតិ ដោយមើលឃើញឱកាសល្អមកដល់ លោកក៏បានរុញចលនាបាតុកម្មនេះឲ្យក្លាយទៅជាសកម្មភាពនយោបាយដើម្បីជំរុញឲ្យមានការផ្លាស់ប្ដូរតាមការបោះឆ្នោត។
លោក ម៉ៅ មុនីវណ្ណ បន្តឲ្យដឹងថា៖ «ខ្ញុំបានបោះឆ្នោតគាំទ្រគណបក្សហ៊្វុនស៊ិនប៉ិច ឲ្យដឹកនាំប្រទេស ដែលពេលនោះខ្ញុំគិតថា មានតែគណបក្សមួយនេះទេ ជាដៃគូប្រកួតប្រជែងជាមួយនឹងគណបក្សប្រជាជនកម្ពុជាបាន»។
លោកបានបន្តថា៖ «កាលនោះលោក សម រង្ស៊ី ដែលជារដ្ឋមន្ត្រីហិរញ្ញវត្ថុ និងទ្រង់ នរោត្តម សិរីវុឌ្ឍ ជារដ្ឋមន្ត្រីការបរទេស បានធ្វើការងារយ៉ាងសកម្ម ក្នុងបេសកកម្មបំបាត់អំពើអសកម្មនិងអំពើពុករលួយ គាត់មានភាពក្លាហាន ខ្ញុំពេញចិត្តគាត់ណាស់។ ប៉ុន្តែ ដោយសារមើលឃើញភាពអកុសលរបស់ហ៊្វុនស៊ិនប៉ិច ដែលដកតំណែងមនុស្សពីរនាក់នេះ វាបានបង្ហាញឲ្យឃើញថា ការដឹកនាំរបស់សម្ដេចក្រុមព្រះ នរោត្តម រណឫទ្ធិ មិនគោរពតាមគោលនយោបាយរបស់ខ្លួន ខ្ញុំក៏ឈប់គាំទ្រពីពេលនោះមក»។
លោក ម៉ៅ មុនីវណ្ណ បានឲ្យដឹងទៀតថា លោកស្ទើរតែបាត់ឱកាសចូលរួមសកម្មភាពនយោបាយទៅហើយ ស្រាប់តែលោក សម រង្ស៊ី បង្កើតគណបក្សនយោបាយថ្មីធ្វើការប្រកួតប្រជែងដើម្បីដណ្ដើមយកអំណាច តាមការបោះឆ្នោតសាជាថ្មីនៅ ឆ្នាំ១៩៩៨។ លោកក៏ងាកមកធ្វើសកម្មភាពនយោបាយជាមួយនឹងលោក សម រង្ស៊ី វិញម្តង នៅក្នុងអំឡុង ឆ្នាំ១៩៩៦។
លោកបន្តថា៖ «ពេលនោះខ្ញុំបានជាប់ជាសមាជិកក្រុមប្រឹក្សាជាតិ តែពេលរដ្ឋប្រហារ ១៩៩៧ ថ្នាក់ដឹកនាំគណបក្សបានភៀសខ្លួនទៅ ប្រទេសថៃ ខ្ញុំមើលឃើញថា បញ្ហាស្រុកទេសមិនត្រូវបានដោះស្រាយទៀតទេ ធ្វើឲ្យខ្ញុំអស់សង្ឃឹមទៀត។ តែដឹងអីស្រាប់តែលោក សម រង្ស៊ី អាចត្រឡប់ចូលស្រុកបាន ខ្ញុំក៏ចាប់ផ្ដើមសកម្មភាពនយោបាយយ៉ាងសកម្មជាប្រធានបក្សនៅ ខេត្តកំពង់ចាម រហូតថ្ងៃដែលខ្ញុំចាកចេញនៅ ឆ្នាំ ២០១១ ហើយមកចូលរួមនឹងគណបក្សសិទ្ធិមនុស្សជាមួយនឹងលោក កឹម សុខា ម្តង។
លោក ម៉ៅ មុនីវណ្ណ បានបញ្ជាក់ពីមូលហេតុនៃការចាកចេញពីគណបក្ស សម រង្ស៊ី នៅក្នុង ឆ្នាំ២០១១ នោះថា គឺដោយសារតែលោកមើលឃើញថា នៅក្នុងគណបក្ស សម រង្ស៊ី អ្នកដែលមានឥទ្ធិពលក្នុងបក្ស គេមិនសូវចង់ឲ្យមានការបង្រួបបង្រួមជាតិទេ។
លោកថ្លែងថា៖ «ប៉ុន្តែសម្រាប់ខ្ញុំ ខ្ញុំនៅតែចង់ឲ្យអ្នកប្រកាន់លទ្ធិប្រជាធិបតេយ្យមានការបង្រួបបង្រួមដើម្បីឲ្យមានការផ្លាស់ប្តូរ និងឈ្នះគណបក្សប្រជាជន ហើយខ្ញុំជាមនុស្សម្នាក់ដែលនិយាយជាមួយថ្នាក់ដឹកនាំគណបក្សសិទ្ធិមនុស្សដើម្បីឲ្យមានការបង្រួបបង្រួមគ្នា ទើបមានថ្ងៃ ទី១៧ ខែ៧ (កក្កដា) ឆ្នាំ២០១២ នៅម៉ានីល បានឯកភាពគ្នាបង្កើតគណបក្សសង្គ្រោះជាតិនេះឡើង។ ខ្ញុំបានជាប់ឆ្នោតជាតំណាងរាស្ត្រតាំងពី ឆ្នាំ ២០០៣ គឺគណបក្ស សម រង្ស៊ី ពីរអាណត្តិ រហូតមកដល់គណបក្សសង្គ្រោះជាតិនេះទៀត»។
លោក ម៉ៅ មុនីវណ្ណ បច្ចុប្បន្ន ជាតំណាងរាស្ត្រមណ្ឌលកំពង់ចាម របស់គណបក្សសង្គ្រោះជាតិ និងជាអនុប្រធានគណៈកម្មការ ទី៩ រដ្ឋសភាទទួលបន្ទុកសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដីនគរូបនីយកម្ម និងសំណង់។
លោកបន្តឲ្យដឹងថា លោកជាកូនកសិករ មានឪពុកឈ្មោះ ម៉ៅ ហាក់ ធ្វើការក្នុងហាងបារី ក្នុងទីរួម ខេត្តកំពង់ចាម ម្ដាយជាកម្មករនៅចម្ការកៅស៊ូជប់។ លោកមានកំណើតកើតនៅក្នុងមន្ទីរពេទ្យជប់ គីឡូម៉ែតលេខ ៤៦ ដែលទីនោះជាផ្ទះរបស់លោក។ លោកកើតនៅ ឆ្នាំ១៩៦៤ ជាកូនច្បងនៅក្នុងគ្រួសារ មានបងប្អូន ៦នាក់ (ស្រីបីនាក់)។
នៅពេលគ្រប់អាយុចូលរៀនប្រទេសជាតិបានធ្លាក់ទៅក្នុងសង្គ្រាមស៊ីវិល ក្នុង ឆ្នាំ១៩៧០ គ្រួសារលោកបានភៀសខ្លួនមកកាន់ទីរួម ខេត្តកំពង់ចាម លោកបានចូលរៀននៅសាលាបឋមសិក្សាដីដុះ រហូតដល់ថ្នាក់ ទី៩ ទើបខាងខ្មែរក្រហមបានវាយចូលក្រុងកំពង់ចាម ហើយក៏បានកៀរប្រជាជនចេញឲ្យទៅរស់នៅក្នុងតំបន់រំដោះ គ្រួសារលោកបានទៅរស់នៅស្រុកកំណើតនៅសួងចាប់តាំងពី ឆ្នាំ១៩៧៣ រហូតដល់ ១៩៧៥ ទើបខ្មែរក្រហមវាយបែកភ្នំពេញ។
លោកបន្តថា ក្នុងរបបខ្មែរក្រហម លោកទើបមានអាយុប្រហែល ១៣ ឆ្នាំនិងគ្រាន់តែជាក្មេងឃ្វាលគោក្របីម្នាក់ប៉ុណ្ណោះ។ គ្រួសារលោកបន្តរស់នៅសួង រហូតដល់យួនរំដោះប្រទេសពីខ្មែរក្រហមនៅ ឆ្នាំ១៩៧៩។
លោករំឭកពីសម័យក្រោយរំដោះ ៧ មករា ១៩៧៩ ថា នៅ ឆ្នាំ១៩៨១ សាលារៀន (អនុវិទ្យាល័យសួង) ត្រូវបានបើកឡើងវិញ លោកក៏បានចូលរៀនបន្តរហូតបញ្ចប់ថ្នាក់មធ្យមសិក្សាកម្រិត ២ នាពេលនោះរហូតដល់ ឆ្នាំ១៩៨៣ ទើបផ្លាស់មករៀននៅភ្នំពេញ នៅវិទ្យាល័យដូនពេញ ដែលបច្ចុប្បន្នហៅ «វិទ្យាល័យព្រះស៊ីសុវត្ថិ» រហូតប្រឡងជាប់បាក់ឌុប និងបន្តចូលរៀនសាលាពេទ្យ។
លោក មុនីវណ្ណ បន្តឲ្យដឹងថា លោកបានរៀបការប្រពន្ធនៅ ឆ្នាំ ២០០០ សព្វថ្ងៃមានកូនបីនាក់ (ស្រីពីរនាក់)។
សម្រាប់ថ្ងៃអនាគតលោកគិតថា នឹងខិតខំប្រឹងប្រែងឲ្យអស់ពីសមត្ថភាព ក្នុងអាជីពនយោបាយ របស់លោកក្នុងការកសាងជាតិរហូតប្រជាពលរដ្ឋទទួលបានភាពសុខសប្បាយ។
លោកប្តេជ្ញាដែរថា៖ «ខ្ញុំនឹងមិនបោះបង់ចោលទេ ហើយខ្ញុំចង់ឲ្យយុវជនទាំងអស់ចាប់អារម្មណ៍រឿងនយោបាយ ព្រោះនេះជាមហិច្ឆតាសម្រាប់ជីវិតរបស់ខ្ញុំ»៕
No comments:
Post a Comment