(ចុះផ្សាយនៅថ្ងៃ 16-12-2014, 2:55 pm) | ដោយ ធឿន បញ្ញាឬទិ្ធ
អនុប្រធានគណៈកម្មាការទី២នៃរដ្ឋសភា លោក សុន ឆ័យ នឹងដឹកនាំក្រុមការងារចុះទៅតំបន់អង្គរ នៅថ្ងៃទី២១-២២ធ្នូនេះ ដើម្បីត្រួតពិនិត្យពីចំណូលអង្គរ និងបញ្ហាជាក់ស្ដែងដែលបានកើតឡើងនៅតំបន់នោះ។ បើតាមលោក សុន ឆ័យ ការត្រួតពិនិត្យពីចំណូលអង្គរនេះ មានភាពមិនត្រឹមត្រូវនោះ លោកនឹងបន្ដយន្ដការដាក់ទៅតុលាការ ដើម្បីចាត់វិធានការលើបញ្ហានេះ។
លោក សុន ឆ័យ អនុប្រធានគណៈកម្មាការទី២នៃរដ្ឋសភា នឹងចុះទៅជាមួយអាជ្ញាធរអប្សារា និងអាជ្ញាធរខេត្ត ដើម្បីត្រួតពិនិត្យពីចំណូលអង្គរ និងបញ្ហាជាក់ស្ដែងដែលបានកើតឡើងនៅតំបន់នោះឲ្យបានច្បាស់លាស់។ បើតាមលោក សុន ឆ័យ គោលបំណងចុះទៅនេះគឺលោកចង់ពិនិត្យជាក់ស្ដែងពីតួនាទីរបស់អាជ្ញាធរអប្សរា និងបញ្ហាពាក់ព័ន្ធប៉ះពាល់ដល់ប្រជាពលរដ្ឋកន្លងមក ដែលលោកទទួលបានរួមមាន បញ្ហាហាមឃាត់ប្រជាពលរដ្ឋមិនឲ្យសាងសង់លំនៅដ្ឋាននៅទីនោះ ការយកដីប្រជាពលរដ្ឋទៅឲ្យក្រុមហ៊ុន ដំណើរការជួសជុលប្រាសាទ និងការលក់សំបុត្រនៅតំបន់អង្គរជាដើម។ លើសពីនេះលោក សុន ឆ័យ ក៍នឹងជួបជាមួយអាជ្ញាធរខេត្ត ដើម្បីត្រួតពិនិត្យពីការចាយវាយថវិការ ការគ្រប់គ្រងរបស់អាជ្ញាធរនៅតំបន់នោះ និងការផ្លាស់ប្ដូរទីតាំងសាលាខេត្ត។
លោកសុនឆ័យបន្ថែម៖«ការចុះទៅនេះគឺយើងចង់ត្រួតពិនិត្យជាក់ស្ដែងពីតួនាទីអាជ្ញាធរអប្សរា និងអាជ្ញាធរក្រុង ព្រោះយើងចង់ដឹងថាពួកគេធ្វើអ្វីខ្លះកន្លងមក។ ហើយការត្រួតពិនិត្យនេះ ព្រោះមានប្រជាពលរដ្ឋមួយចំនួនបានប្ដឹងថា មានការហាមឃាត់ពីអាជ្ញាធរមិនឲ្យសាងសងលំនៅដ្ឋាននៅទីនោះ យកពីប្រជាពលទៅឲកយក្រុមហ៊ុនសាងសង ពីការជួសជុលប្រាសាទដំណើរការដល់ណា ជាពិសេសការលក់សំបុត្រនៅតំបន់អង្គរនេះ ។ តើមានលក់សំបុត្រនេះ ទទួលបានចំណូលយ៉ាងម៉េចដែរ?»។
ទាក់ទងនឹងការលក់សំបុត្រនេះ កន្លងមកអាជ្ញាធរអប្សរាធ្លាប់បង្ហាញឲ្យដឹងថា ចំណូលដែលបានមកពីការលក់សំបុត្រជូនភ្ញៀវទេសចរនៅតំបន់អង្គរនេះ ទទួលបានជាមធ្យម ជាង៣០លានដុល្លារក្នុងមួយឆ្នាំ។
ដោយឡែកសម្រាប់លោក សុន ឆ័យ អនុប្រធានគណៈកម្មាការទី២នៃរដ្ឋសភា យល់ឃើញថា ចំណូលពីការលក់សំបុត្រជាង៣០លានដុល្លារក្នុងមួយឆ្នាំនេះគឺមិនត្រឹមត្រូវនោះទេ។ បើតាមការអះអាងរបស់លោក សុន ឆ័យ ចំណូលពីការលក់សំបុត្រតាមទិន្នន័យដែលលោកទទួលបាន គឺមានចំនួនយ៉ាងតិច១៦០លានដុល្លារក្នុងមួយឆ្នាំ។ លោកពន្យល់ថា៖«កាលពីពេលថ្មីៗនេះខ្ញុំទទួលបានទិន្នន័យមួយបង្ហាញថា ចំណូលអង្គរនេះគឺយ៉ាងតិច១៦០ដុល្លារក្នុងមួយឆ្នាំ ហើយវាមិនមែនតិចតួចនោះទេ»។
លោកសុន ឆ័យ បញ្ជាក់ទៀតថា បើសិនជាការចុះត្រួតពិនិត្យនេះ មានភាពមិនប្រក្រតី មានការបាត់ថវិការជាតិនោះ លោកនឹងបន្ដយន្ដការ ដាក់ពាក្យប្ដឹងទៅតុលាការ ដើម្បីស៊ើបអង្កេតស្នើរឲ្យដកក្រុមហ៊ុន (សុខ គង់) វិនិយោគនៅតំបន់អង្គរនេះ។ ចំណែកមន្ត្រីនៅតំបន់នោះ ដែលមានការពុករលួយ ពាក់ព័ន្ធឃុបឃិតជាមួយក្រុមហ៊ុនកេងប្រវ័ញ្ចចំណូលជាតិ លោកនឹងរៀបចំឯកសារដាក់ទៅកាន់អង្គការភាពប្រឆាំងអំពើពុករលួយ ដើម្បីឲ្យចាត់វិធានការតាមផ្លូវច្បាប់ចំពោះបញ្ហានេះ៕
No comments:
Post a Comment