គណបក្សប្រឆាំង និងសង្គមស៊ីវិលព្រួយបារម្ភ ចំពោះការសុំផ្អាកកិច្ចពិភាក្សា កំណែទម្រង់ការបោះឆ្នោត របស់គណបក្សប្រជាជនកម្ពុជា ខណៈដែលពេលវេលាកំណត់កាន់តែជិតមកដល់។តែគណបក្សកាន់អំណាចថា អវត្តមានការជជែកមួយសប្ដាហ៍នេះ មិនប៉ះពាល់ដំណើរការពិភាក្សាទេ។
ការព្រួយបារម្ភរបស់បក្សប្រឆាំង និងសង្គមស៊ីវិល កើឡើងភ្លាមៗនៅពេលដែលក្រុមការងារចរចា កែទម្រង់ការបោះឆ្នោតភាគីគណបក្សប្រជាជនកម្ពុជា បានសុំផ្អាកកិច្ចចរចា ដោយសំអាងហេតុផលថា ពុំមានពេលវេលាសមស្របអោយពួកគេចូលរួមបាន។
មន្ត្រីជាន់ខ្ពស់គណបក្សសង្គ្រោះជាតិ លោក គួយ ប៊ុនរឿន ឲ្យដឹងថា ក្រុមការងារគណបក្សប្រជាជនកម្ពុជា ឲ្យដឹងថាមូលនៃការអាកខាននេះ ព្រោះមន្ត្រីគណបក្សប្រជាជនរវល់ធ្វើសមាជបក្ស និងលោក ប៊ិន ឈិន ប្រធានចរចាគណបក្សប្រជាជន មានភារៈផ្ទាល់ខ្លួន។ លោក គួយ ប៊ុនរឿន មិនយល់ទាស់ចំពោះសុំផ្អាកនេះទេ។ ប៉ុន្តែលោកទាមទារក្រុមការងារទាំងពីរ ពន្លឿនការងារដើម្បីឲ្យចប់សព្វគ្រប់ដូចការគ្រោងទុក៖ «យើងឃើញថាពេលវេលាកាន់តែខើចហើយ។ យើងសង្ឃឹមថា នៅខែកុម្ភៈក្រុមការងារនឹងបញ្ចប់ការងារនេះ»។
ប្រធានក្រុមចរចាមកពីគណបក្សប្រជាជនកម្ពុជា លោក ប៊ិន ឈិន មានប្រសាសន៍ ប្រាប់ក្រុមការងារគណបក្សសង្គ្រោះជាតិ កាលពីថ្ងៃទី២៣ ខែ មករា ថា ពេញមួយសប្ដាហ៍ក្រោយនេះ គណបក្សប្រជាជនកម្ពុជា មិនចូលរួមប្រជុំទេ ព្រោះជាប់រវល់ការងារបក្ស និងភារៈផ្ទាល់ខ្លួន។
ការសុំផ្អាកបណ្ដោះអាសន្ននេះដែរ គឺស្របពេលប្រមុខគណបក្សនយោបាយ ទាំងពីរថ្លែងសារនយោបាយខ្លាំងៗ ឌឺដងដាក់គ្នា រហូតលោកនាយករដ្ឋមន្ត្រី ហ៊ុន សែន ថាលោកមិនខ្វល់ពីការចរចាកែទម្រង់ការបោះឆ្នោត។
មន្ត្រីជាន់ខ្ពស់គណបក្សប្រជាជនកម្ពុជា ព្រំ សុខា បញ្ជាក់ថា ការអាក់ខានជួបគ្នានៅសប្ដាហ៍ក្រោយព្រោះ គណបក្សមន្ត្រីគណបក្សប្រជាជន រវល់ធ្វើការងារសំខាន់ និងហេតុផលមួយទៀត ក្រុមជំនាញបច្ចេកទេសបោះឆ្នោត របស់ប្រទេសជប៉ុន ត្រូវជួបមន្ត្រីបច្ចេកទេសនៃគណបក្សទាំងពីរដើម្បីផ្ដល់ជាគំនិត។ លោកបន្តថា គណបក្សប្រជាជនកម្ពុជា នៅតែមានឆន្ទៈ បញ្ចប់ការងារនេះនៅមុនដំណាច់ខែកុម្ភៈ ស្របតាមកិច្ចព្រមព្រៀងនយោបាយ គណបក្សទាំងពីរកាលពីថ្ងៃទី២២ខែកក្កដា៖ «ខ្ញុំគិតថាពេលចូលធ្វើការវិញ ពួកគេនឹងបង្កើនការជួបគ្នាឲ្យបានមួយសប្ដាហ៍បួនដង»។
លោក ព្រាប កុល ប្រធានអង្គការតម្លាភាព យល់ថា ការផ្អាកនេះ គឺមន្ត្រីគណបក្សនយោបាយ យកពេលទៅពិភាក្សាគ្នា ជាមួយថ្នាក់ដឹកដើម្បីសុំមតិយោបល់បន្ថែម។
ប៉ុន្តែ លោក គល់ បញ្ញា នាយកប្រតិបត្តិនៃអង្គការឃ្លាំមើលការបោះឆ្នោតនៅកម្ពុជា ខុមហ្វ្រែល (Comfrel)។ លោកមានប្រសាសន៍ថា ការផ្អាកនេះអាចប៉ះពាល់ផែនការកំណែទម្រង់ការបោះឆ្នោត ខណៈដែលពេលវេលាកាន់តែកៀកមកដល់ទៅហើយនោះ។ ដូច្នេះ លោក គល់ បញ្ញា ទាមទារឲ្យក្រុមការងារបក្សជួបគ្នាឲ្យបានច្រើនថ្ងៃ ក្នុងមួយសប្ដាហ៍ និងត្រូវធ្វើការសងថ្ងៃដែលមិនបានជួបគ្នា៖ «ធម្មតាការវរល់យើងជៀសសមិនផុតទេ។ ប៉ុន្តែយើងមានផែនការរបស់យើងនឹងបញ្ចប់វា នៅមុនដំណាច់ខែកុម្ភៈ»។
ក្រុមចរចាកំណែទម្រង់ការបោះឆ្នោត គណបក្សប្រជាជនកម្ពុជា និងគណបក្សសង្គ្រោះជាតិ តែងតែជួប គ្នាមួយសប្ដាហ៍ពីរដងនៅថ្ងៃចន្ទ និងថ្ងៃសុក្រ នាមន្ទីររដ្ឋសភា។ ក្រុមការងារបានធ្វើដល់ជំពួក៨ និង២៧មាត្រា ដោយមានចំណុចខ្លះពួកគេនៅខ្វែងគំនិតគ្នារួមមាន៖ រយៈពេលឃោសនា ការបញ្ជីចុះឈ្មោះបោះឆ្នោត កម្រិតនៃប្រព័ន្ធផ្សព្វផ្សាយ តួនាទី របស់កងកម្លាំងប្រដាប់អាវុធ និងមន្ត្រីតុលាការ ជាពិសេសនោះ ចុងក្រោយ គឺខ្លឹមសារនៃច្បាប់ រឹតត្បិតមិនឲ្យអង្គការសង្គមស៊ីវិល រិះគន់លើគោលនយោបាយ របស់គណបក្សក្នុងថ្ងៃឃោសនាបោះឆ្នោត។
មន្ត្រីជាន់ខ្ពស់គណបក្សប្រជាជនកម្ពុជា លោក ព្រំ សុខា ថាប្រសិនចាំបាច់ ក្រុមបច្ចេកទេសអាចជួប គ្នាក្នុងមួយសប្ដាហ៍បីថ្ងៃ ទៅតាមការជាក់ស្ដែង៕
1 comment:
what the meaning of talk because when talk it look agree each other but soon after it turn 360 degree and I see cnrp look not to good because Hun sen close all the door and It may be Hun Sen going to Jail more cnrp if every thing won't go Hun Sen way .you don't believe it. you can wait and see.
Post a Comment