ដោយ៖ ណាត សុភាព | ថ្ងៃអាទិត្យ ទី11 មករា 2015 |

លោក សម រង្ស៊ី ប្រធានគណបក្សសង្គ្រោះជាតិ ពេលកន្លងមក

លោក សម រង្ស៊ី ប្រធានគណបក្សសង្គ្រោះជាតិថ្លែងនៅព្រឹកថ្ងៃអាទិត្យនេះថា ប្រជាពលរដ្ឋខ្មែរនៅឯនាយសមុទ្រនៅតែគាំទ្របក្សសង្គ្រោះជាតិ ខណៈមានការរិះគន់ច្រើនថា បក្សនេះកំពុងបែកបាក់ផ្ទៃក្នុងទាំងនៅក្នុង និងក្រៅប្រទេសនោះ ។

លោក សម រង្ស៊ី ថ្លែងបែបនេះនៅអាកាសយានដ្ឋានអន្តរជាតិភ្នំពេញ បន្ទាប់ពីបំពេញបេសកកម្មនៅអឺរ៉ុបមួយរយៈមក ។ លោកថាប្រជាពលរដ្ឋខ្មែរនៅឯនាយសមុទ្រ នៅតែបន្តគាំទ្រគណបក្សសង្គ្រោះជាតិ ដោយសារគណបក្សនេះជាក្តីសង្ឃឹម និងជាកិត្តិយសរបស់ប្រទេសកម្ពុជាសម្រាប់ប្រជារាស្ត្រខ្មែរ ។

ប៉ុន្តែនៅពេលអ្នកសារព័ត៌មានសួរលោក សម រង្ស៊ី ថាហេតុអ្វីបានជាដកលោកស្រី ឡាក់ សុភាព ចេញពីតួនាទីគណៈកម្មាធិកានាយករបស់គណបក្សមួយនេះ លោកឆ្លើយយ៉ាងខ្លីថា មិនចាប់អារម្មណ៍និងការលើកឡើងរបស់លោកស្រី ឡាក់ សុភាព នោះទេ «ខ្ញុំចាប់អារម្មណ៍អ្វីដែលជាការពិត និងមានប្រយោជន៍» ។

កាលពីថ្មីៗនេះលោកស្រី ឡាក់ សុភាព អតីតសមាជិកគណៈកម្មាធិការនាយក និងជាលេខារបស់អនុប្រធានគណបក្សសង្គ្រោះជាតិ លោក កឹម សុខា ត្រូវបានប្រធានគណៈកម្មាធិការវិន័យរបស់គណបក្សសង្គ្រោះជាតិ លោក អ៊ូ ច័ន្ទឫទ្ធិ សម្រេចដកតំណែងលោកស្រីចេញពីបក្ស បន្ទាប់ពីស្ត្រីរូបនោះចោទថាបក្សប្រឆាំងមួយនេះកំពុងបែកបាក់ផ្ទៃក្នុង និងទទួលប្រាក់ពីបក្សកាន់អំណាចប្រមាណ២០ ទៅ៤០លានដុល្លារ ដើម្បីបញ្ចប់ជម្លោះនយោបាយ ។ នៅពេលនោះដែរ គណបក្សសង្គ្រោះជាតិក៏បានបដិសេធថា មិនមានបែកបាក់ផ្ទៃក្នុងនៅក្រៅ និងក្នុងប្រទេសដូចការលើកឡើងរបស់លោកស្រី ឡាក់ សុភាពនោះទេ ៕

សូមសរសេរមកលោក ណាត សុភាព តាមរយៈ sopheap@vodhotnews.com