A power struggle within the newly-refurbished Funcinpec Party between Nhiek Bun Chhay's and Prince Ranariddh's supporters ទើប​ទទួល​ទ្រង់ រណឫទ្ធិ មក​ធ្វើ​ជា​ប្រធាន​វិញ ស្រាប់​តែ​ផ្ទុះ​រឿង​​«ឈ្លោះ​គ្នា»​ទៀត

ព្រះអង្គម្ចាស់ នរោត្ដម រណឫទ្ធិ ត្រឡប់មកគង់ជា«ម្លប់» របស់គណបក្ស មិនបានប៉ុន្មានផង ស្រាប់តែបរិវាចាស់ថ្មី ឈ្លោះគ្នាយ៉ាងអាណោចអធមទៀត។ អគ្គលេខាថ្មី និងអគ្គលេខាចាស់ ចោទគ្នាទៅវិញទៅមក ខណៈតំណែងព្រះប្រធាន«ថ្មី» ដូចជាឮសូរមិនសូវស្រួល។

ព្រះអង្គម្ចាស់ នរោត្ដម រណឫទ្ធិ។ (រូបថត monoROOM.info/ Channita)

•  ដោយ: ដារា រិទ្ធ
 
•  February 22, 2015
 
•  ប្រធានបទ: នយោបាយ
 
•  សម្រាំងបច្ចុប្បន្នភាព, សម្រាំងជាខេមរភាសា, គ្រប់អត្ថបទជាខេមរភាសា, បច្ចុប្បន្នភាពក្នុងលោក, កម្ពុជា, នយោបាយ

មើលទៅ គណបក្សហ៊ុនស៊ីនប៉ិច ចង់ទៅមុខ ឬចង់ដើរទៅណា? នៅក្នុងលិខិត«បំភ្លឺ»មួយ ដែល​ទស្សនាវដ្ដី​មនោរម្យ.អាំងហ្វូទើបនឹងទទួលបាន ក្នុងយប់ថ្ងៃទី២១ ចូលមកថ្ងៃទី២២ ខែកុម្ភៈនេះ អគ្គលេខាធិការដ្ឋាន ដែល​គេដឹងថាស្ថិតក្រោយការគ្រប់គ្រង របស់លោក ញឹក ប៊ុនឆៃ អគ្គលេខាចាស់របស់គណបក្សនោះ បាន​ប្រកាស​ទាត់​ចោល នូវសេចក្ដីប្រកាសមួយ ដែលចុះហត្ថលេខា ដោយអគ្គលេខាប្រតិបត្តិ (ឬនិយាយឲ្យខ្លី អគ្គលេខា​ថ្មី) លោក សាយ ហាក់ ដែលទើបនឹងបានតំណែងនេះ កាលពីពេលថ្មីៗនេះ។

លិខិតរបស់អគ្គលេខាធិការដ្ឋាន គណបក្ស ហ្វ៊ិនស៊ិនប៉ិច នោះបានសរសេរបញ្ជាក់ថា «សហជីវិន សាយ ហាក់ ពុំ​ទាន់មានឋានៈ និងតួនាទីអ្វីក្នុងគណបក្សហ៊្វុនស៊ិនប៉ិចទេ ព្រោះតែក្នុងលក្ខន្តិកៈ គណបក្ស​ហ៊្វុនស៊ិនប៉ិច​ ដែលនៅ​ជាធរមាន ពុំមានរចនាសម្ព័ន្ធ ស្តីពីអគ្គលេខាធិការប្រតិបត្តិគណបក្សទេ»។ ចំណែក​លទ្ធផល នៃសមាជ​វិសាមញ្ញ​គណបក្ស ហ៊្វុនស៊ិនប៉ិច ថ្ងៃទី១៩ ខែមករា ឆ្នាំ២០១៥កន្លងទៅ ដែលមានបញ្ជាក់ថា លោក សាយ ហាក់ ជាប់ជា​អគ្គលេខា«ប្រតិបត្តិ»នោះ មិនទាន់ត្រូវបានក្រសួងមហាផ្ទៃ ទទួលស្គាល់ជាផ្លូវការនៅឡើយ ដោយគ្រាន់​តែក្រសួង​មហាផ្ទៃ បញ្ជាក់ថា «បានទទួលរួចហើយ នូវជូនដំណឹងរបស់គណបក្ស ហ្វ៊ិនស៊ិនប៉ិច ស្តីពីលទ្ធផលសមាជ ថ្ងៃ​ទី​១៩ ខែមករា ឆ្នាំ២០១៥»។

ការចេញលិខិតខាងលើនេះ បានធ្វើឡើង បន្ទាប់ពីលិខិតមួយចុះហត្ថលេខា ដោយលោក សាយ ហាក់ កាលពី​ថ្ងៃ​ទី២០ ខែកុម្ភៈ ឆ្នាំ២០១៥ បានសរសេរបរិហាលោក ញឹក ប៊ុនឆៃ ដែលទើបនឹងជាប់ជាអនុប្រធានទី២ នៃ​គណបក្ស ថាបានយកត្រាគណបក្ស ទៅប្រើប្រាស់លើលិខិតអញ្ជើញ និងលិខិតផ្សេងៗ ដោយពុំមានលិខិតផ្ទេរសិទ្ធិពី សម្តេច​ក្រុមព្រះ នរោត្តម រណប្ញទ្ធិ ព្រះប្រធានគណបក្ស ហ៊្វុនស៊ិនប៉ិច។ លិខិតដដែល បានសរសេរទៀតថា លិខិតស្នាម​ទាំងនោះ ពុំអាចចាត់ទុកជាលិខិតផ្លូវការបាននោះទេ។

ប៉ុន្តែរឿង មិនមែននៅត្រឹមតែលិខិតឆ្លើយឆ្លងគ្នា ពីរសន្លឹកនេះទេ។ តែទំនងជាមានទាក់ទងដោយ សម្ដេច​«ព្រះ​ប្រធាន​ថ្មី» ព្រះនាម នរោត្ដម រណឫទ្ធិ នោះផង។ ប្រភពដែលស្និតនឹងលោក ញឹក ប៊ុនឆៃ បានបង្ហើបឲ្យ​ទស្សនាវដ្ដី​ដឹងថា ព្រះអង្គម្ចាស់ព្រះប្រធានថ្មី បានរំលាយគណៈកម្មាធិការ នាយកនិងអចិន្ត្រៃយ៍ និងតែងតាំងលោក សាយ ហាក់ ជាអគ្គលេខាប្រតិបត្តិគណបក្ស ដោយអត្តនោម័តតែអង្គឯង និងដោយមិនបានឆ្លងយោបល់ ជាមួយ​សមាជិក​គណៈកម្មការនាយក និងអចិន្ត្រៃយ៍ទេ។ ប្រភពដដែលបន្តទៀតថា ក្នុងពេលខាងមុខ សមាជិកគណបក្សទាំងអស់ អាចនឹងធ្វើញត្តិមួយ ប្រឆាំងនឹងការសម្រេចព្រះទ័យនេះ។

នៅយប់ដដែលនេះ ទស្សនាវដ្ដីមិនអាចសុំការបកស្រាយ ពីពីលោក ប៉ែន សង្ហា មន្ត្រីអ្នកនាំពាក្យសម្ដេចក្រុមព្រះ នរោត្ដម រណឫទ្ធិ ទាក់ទងនឹងករណីខាងលើនេះ បាននៅឡើយ៕

ចុចពីលើរូប ដើម្បីពង្រីកអាន៖