លោក វ៉ាន់ សំអឿន តំណាងរាស្ត្រលាលែងតំណែង។ រូប រដ្ឋសភា
ភ្នំពេញៈ មន្រ្តីគណបក្សប្រឆាំងបានចោទថា លោក វ៉ាន់ សំអឿន អតីតតំណាងរាស្រ្តគណបក្សប្រឆាំង ដែលបានផ្តាច់ខ្លួនទៅចុះចូលជាមួយនឹងគណបក្សប្រជាជនកម្ពុជា កាលពីថ្ងៃសុក្រនោះ បានជួបជាមួយនឹងលោកនាយករដ្ឋមន្រ្តី ហ៊ុន សែន ជាសម្ងាត់ មុនដាក់លិខិតលាលែង។
មន្រ្តីជាន់ខ្ពស់នៃគណបក្សប្រជាជនកម្ពុជា បានបញ្ជាក់កាលពីម្សិលមិញថា លោក វ៉ាន់ សំអឿន បានទទួលតំណែងជាន់ខ្ពស់ ក្នុងទីភ្នាក់ងារអភិវឌ្ឍន៍របស់រដ្ឋាភិបាល។
អតីតអ្នកតំណាងរាស្រ្តគណបក្សសង្គ្រោះជាតិរូបនេះ ជាជនជាតិខ្មែរសញ្ជាតិអាមេរិក ដែលបានជាប់ឆ្នោតជាតំណាងរាស្រ្តសម្រាប់មណ្ឌលខេត្តកំពត ក្នុងការបោះឆ្នោតឆ្នាំ ២០១៣ បានប្រកាសលាលែង ក្នុងលិខិតមួយដែលផ្ញើជូនលោក ហេង សំរិន ប្រធានរដ្ឋសភា និងលោក កឹម សុខា អនុប្រធានទី១ នៃរដ្ឋសភា កាលពីថ្ងៃសុក្រកន្លងទៅ។
លោកបញ្ជាក់ក្នុងនោះថា លោកបានលាលែងពីគណបក្សសង្គ្រោះជាតិ ព្រោះលោកមិនអាចបម្រើប្រទេសជាតិតាមឆន្ទៈ និងបទពិសោធរបស់លោកបាន។
មន្រ្តីជាន់ខ្ពស់នៃគណបក្សសង្គ្រោះជាតិ ដែលបដិសេធមិនបញ្ចេញឈ្មោះ បានឲ្យដឹងកាលពីម្សិលមិញថា ការផ្តាច់ខ្លួននេះ បានធ្វើឡើង បន្ទាប់ពីជំនួបផ្ទាល់រយៈពេល ៣ ម៉ោង ជាមួយនឹងលោក ហ៊ុន សែន នៅគេហដ្ឋានរបស់លោកនៅរាជធានីភ្នំពេញកាលពីថ្ងៃសុក្រ។
មន្រ្តីរូបនោះបានបញ្ជាក់ថា៖ «គាត់បានជួប [លោក ហ៊ុន សែន] ៣ ម៉ោង [ពីថ្ងៃសុក្រ]។ គាត់ប្រាប់ថា គាត់ចង់ផ្តាច់ខ្លួនដោយសារមានមូលហេតុផ្ទាល់ខ្លួន»។
លោក ជា ប៉ូច តំណាងរាស្រ្តគណបក្សសង្គ្រោះជាតិ ប្រចាំមណ្ឌលខេត្តកំពត ដែលជាប្រធានគណបក្សនេះប្រចាំខេត្ត បានថ្លែងថា លោក វ៉ាន់ សំអឿន ក៏ត្រូវបានតែងតាំងជាអនុប្រធានក្រុមប្រឹក្សាអភិវឌ្ឍន៍កសិកម្ម និងជនបទ ជាទីភ្នាក់ងាររបស់រាជរដ្ឋាភិបាល ដែលមានលោកឧបនាយករដ្ឋមន្រ្តី យឹម ឆៃលី ជាប្រធាន។
លោក ជា ប៉ូច បានអះអាងថា ៖ «គាត់បានលាលែង មិនមែនដោយសារគណបក្សទេ។ គាត់ថា គាត់ចង់បម្រើប្រទេស ក្នុងជួរបក្សប្រជាជនកម្ពុជា ព្រោះថា គាត់មិនបានបម្រើប្រទេសពេញលេញទេ នៅក្នុងគណបក្សសង្គ្រោះជាតិ»។
លោកបញ្ជាក់ថា គណបក្សមិនទាន់បានសម្រេចថា តើអ្នកណានឹងត្រូវជំនួសតំណែងអតីតអ្នកតំណាងរាស្រ្តរូបនេះនៅឡើយទេ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានលើកឡើងថា ការផ្តាច់ខ្លួននេះមិនសំខាន់ទេ។
លោកលើកឡើងថា៖ «វាមិនប៉ះពាល់ដល់គណបក្សទេ។ យើងទទួលបានសំឡេងឆ្នោតកាន់តែច្រើន រាល់ការបោះឆ្នោត។ យើងមិនអាចដឹងមូលហេតុនៃការផ្តាច់ខ្លួនរបស់គាត់ទេ។មានតែគាត់ទេ ទើបដឹងការពិត»។
លោក ឈឹម ផលវរុណ អ្នកនាំពាក្យគណបក្សកាន់អំណាច បានបញ្ជាក់ថា លោក វ៉ាន់ សំអឿន ត្រូវបានតែងតាំងជាអនុប្រធានក្រុមប្រឹក្សាអភិវឌ្ឍន៍កសិកម្ម និងជនបទ។
លោក ឈឹម ផលវរុណ បានលើកឡើងថា ៖ «គាត់បាននិយាយហើយថា គាត់គណបក្សប្រឆាំង គាត់មិនមានឱកាសបម្រើប្រទេសកម្ពុជា តាមឆន្ទៈនិងបទពិសោធដែលគាត់មាន។ ប្រសិនបើយើងឈរលើសុចរិតភាពទាំងសងខាង យើងត្រូវផ្តល់គុណតម្លៃ ដែលជាបុព្វហេតុធ្វើឲ្យគាត់បោះបង់តំណែងតំណាងរាស្ត្រ។ អ៊ីចឹងរាជរដ្ឋាភិបាលដែលដឹកនាំដោយ គណបក្សប្រជាជនកម្ពុជា គឺផ្តល់គុណតម្លៃហ្នឹង។ អ៊ីចឹងរាជរដ្ឋាភិបាលកម្ពុជាបានផ្តល់តំណែងជាអនុប្រធានក្រុមប្រឹក្សាមួយដែលជាស្ថាប័នរបស់រាជរដ្ឋាភិបាលជូនទៅឯកឧត្តម វ៉ាន់ សំអឿន គឺជាការឆ្លើយតបទៅនឹងឆន្ទៈរបស់សាមីខ្លួន ដែលចង់ប្រើឱកាសក្នុងការចូលរួមកសាងប្រទេស ដោយភ្ជាប់ ជាមួយឆន្ទៈនិងបទពិសោធ ដែលគាត់មាន ដូចនេះគឺជាការត្រឹមត្រូវ»៕ TK
No comments:
Post a Comment