ភ្នំពេញៈ សមាជិកជាយុវជនប្រមាណ២០រូប ត្រូវកត់សម្គាល់ឃើញនៅក្នុងចំណោមសមាជិកគណៈកម្មាធិការកណ្តាលគណបក្សប្រជាជនទាំង ៣០៦ រូបដែលទើបនឹងទទួលបានការគាំទ្រក្នុងមហាសន្និបាតវិសាមញ្ញបក្សបីថ្ងៃ ដែលបានបញ្ចប់កាលពីល្ងាចម្សិលមិញ ជាមួយនឹងការដាក់ចេញសេចក្តីសម្រេចចិត្ត ៩ ចំណុច ដែលក្នុងនោះក៏ជំរុញអនុវត្តកិច្ចព្រមព្រៀងជាមួយគណបក្សសង្គ្រោះជាតិថ្ងៃទី២២ កក្កដា ឲ្យបានពេញលេញ និងដំណើរការធ្វើកំណែទម្រង់ការបោះឆ្នោត ដែលសេសសល់ឲ្យបានកាន់តែល្អប្រសើរផង។ តែយ៉ាងណា ក្នុងសេចក្តីសម្រេចនោះ មិនមាននិយាយដល់ការគាំទ្រលោក ហ៊ុន សែន សម្រាប់ជាបេក្ខភាពនាយករដ្ឋមន្ត្រីបន្តបន្ទាប់ដូចមុនៗនោះទេ។
មហាសន្និបាតវិសាមញ្ញទូទាំងប្រទេសគណបក្សប្រជាជនដែលមានសមាជិក ១៣៥៩នាក់ចូលរួមនិងបិទបញ្ចប់នៅម៉ោង ៦:៣០នាទីល្ងាចថ្ងៃទី១ ខែកុម្ភៈបន្ទាប់ពីដំណើរការអស់រយៈពេលបីថ្ងៃបានចេញសេចក្តីសម្រេចចិត្តមាន៩ ចំណុច ក្នុងនោះមានការប្តេជ្ញាខ្ពស់ ក្នុងការកែទម្រង់ស៊ីជម្រៅ និងបានវាយតម្លៃល្អិតល្អន់លើចំណុចខ្លាំងនិងចំណុចខ្សោយ លើការងារបោះឆ្នោតកន្លងមកដើម្បីបង្កើនប្រៀបឈ្នះសម្រាប់ការបោះឆ្នោតនៅពេលខាងមុខ។
តាមសេចក្តីសម្រេចចិត្ត ៩ ចំណុច មានជាង៣ទំព័រ មហាសន្និបាតក៏បានបោះឆ្នោតជ្រើសតាំងបន្ថែមសមាជិកថ្មីចំនួន ៣០៦ រូប ទៅក្នុងគណៈកម្មាធិការកណ្តាលបក្សដែរ។ ក្នុងបញ្ជីឈ្មោះដែលអ្នកព័ត៌មានទទួលបាន ក្នុងចំណោមសមាជិកបន្ថែមថ្មី ៣០៦រូបឃើញមានសមាជិកជាយុវជន ជាកូនមន្ត្រីជាន់ខ្ពស់ប្រមាណ១៩រូប និងអភិបាលខេត្តឡើងថ្មីគ្រប់ខេត្ត ត្រូវដាក់បញ្ចូលក្នុងគណៈកម្មាធិការកណ្តាលបក្ស ដែលមានការកែប្រែរចនាសម្ព័ន្ធពី ២៨៤ ឡើងដល់ ៥៤៥ រូបផងដែរ។
តាមសេចក្តីសម្រេចចិត្ត ក្នុងចំណុចទី៦ ក្នុងសមាជិកជ្រើស តាំងថ្មីទាំង៣០៦រូប មាន ២៧ រូបជំនួសអ្នកទទួលមរណភាព ១រូប ជំនួសអ្នកត្រូវបញ្ចេញពីបក្ស ១ រូប ជំនួសអ្នកលាលែង និងក្រៅពីនោះជាសមាជិកជ្រើសតាំងថ្មីបន្ថែម។
តាមបញ្ជីឈ្មោះសមាជិកគណៈកម្មាធិការកណ្តាលបក្សជ្រើសតាំងបន្ថែម មាន១៩ រូប កត់សម្គាល់ឃើញមានក្រុមយុវជនកូនមន្ត្រីជាន់ខ្ពស់មួយចំនួន ដូចជា លោកឧត្តមសេនីយ៍ឯកកងទ័ព ហ៊ុន ម៉ាណែត, លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ, លោក ហ៊ុន មានិត ជាកូនលោកនាយករដ្ឋមន្ត្រី ហ៊ុន សែន លោក យឹម លាង ប្រធានកងអង្គរក្ស លោក ជា ស៊ីម ប្រធានគណបក្ស ជាកូនលោកឧបនាយករដ្ឋមន្ត្រី យឹម ឆៃលី,លោកឌិត ទីណា មន្ត្រីនៅក្រសួងពាណិជ្ជកម្មជាកូនលោក ឌិត មុន្ទី ប្រធានតុលាការកំពូល លោក ឆាយ ឫទ្ធិសែន កូនទេសរដ្ឋមន្ត្រី រដ្ឋមន្ត្រីក្រសួងផែនការលោក ឆាយ ថន, លោក សាយ សំអាល់ កូនលោក សាយ ឈុំ អគ្គលេខាធិការគណបក្សនិងជាអនុប្រធានទី១ ព្រឹទ្ធសភា, លោក គឹម រិទ្ធី កូនប្រុសលោក គន់ គីម អគ្គមេបញ្ជាការរងកងយោធពលខេមរភូមិន្ទ, លោក ស សុខា កូនលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ,លោក ទៀ ទីហា កូនលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់, លោក ជាម ច័ន្ទសោភ័ណ កូនបណ្ឌិតរដ្ឋ ជាម យៀប តំណាងរាស្ត្រមណ្ឌលព្រៃវែង,លោក សំហេង បុរស កូនលោករដ្ឋមន្ត្រីក្រសួងការងារ អ៊ិត សំហេង, លោក ឡាយ វណ្ណៈ អភិបាលខេត្តតាកែវ ជាកូនប្រុសលោក ស៊ូ ភិរិន្ទហើយនិង លោក កើត រិទ្ធ រដ្ឋលេខាធិការក្រសួងយុត្តិធម៌, លោកស្រី គឹម សេដ្ឋានី មន្ត្រីនៅក្រសួងអប់រំ, លោក កែវ រតនៈ ប្រធានអាជ្ញាធរអគ្គិសនីកម្ពុជា, លោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានី សុទ្ធជាយុវជនមានសមត្ថភាព ហើយស្និទ្ធនឹងថ្នាក់ដឹកនាំជាន់ខ្ពស់។
ក្រៅពីនេះក្នុងសេចក្តីសម្រេចចិត្តទាំង ៩ ចំណុចនោះ ក្រៅពីវាយតម្លៃខ្ពស់លើការវិវត្តដ៏ល្អលើគ្រប់ផ្នែក ក៏បានលើកឡើងបន្តអនុវត្តគោលនយោបាយចតុកោណដំណាក់កាលទី៣ ក្រោមការដឹកនាំអនុវត្តពីលោកនាយករដ្ឋមន្ត្រី ហ៊ុន សែន រួមមានបញ្ហាសន្តិភាព ស្ថិរភាពនយោបាយ បញ្ហាលទ្ធិប្រជាធិបតេយ្យ ការរក្សាកំណើនសេដ្ឋកិច្ច ប្រចាំឆ្នាំក្នុងរង្វង់ ៧ភាគរយ និងអតិផរណាត្រឹម ៣-៤ភាគរយ ជំរុញការដំឡើងបៀវត្សរ៍មន្ត្រីរាជការឲ្យដល់១លានរៀល និងបង្កើនប្រាក់ឈ្នួលគោលកម្មករឲ្យដល់ ១៦០ដុល្លារ។ល។ ចំណុចផ្សេងទៀត មានការជំរុញធ្វើកំណែទម្រង់បក្ស,ពង្រឹងសាមគ្គីផ្ទៃក្នុងឲ្យកាន់តែរឹងមាំ ព្រមទាំងសន្យារក្សាកិច្ចព្រមព្រៀងបញ្ចប់វិបត្តិនយោបាយថ្ងៃ ២២ កក្កដា ២០១៤ ជាមួយគណបក្សសង្គ្រោះជាតិ ដើម្បីពង្រីកវប្បធម៌សន្ទនាជាចម្បងផង។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានជម្រាបក្រុមអ្នកកាសែតក្រោយបញ្ចប់មហាសន្និបាតនៅកោះពេជ្រថា គណបក្សបានបង្កើនសមាជិកគណៈកម្មាធិការកណ្តាលសម្រាប់អ្នកជំនាន់ថ្មី ប៉ុន្តែក៏ត្រូវរក្សាទុកនូវសមាជិកចាស់ ដែលមានបទពិសោធផងដែរ។
លោកបន្តថា៖«យើងមិនចង់ឱ្យមានគម្លាតរវាងអ្នកជំនាន់ថ្មីនិងចាស់ៗទេ។ គោលការណ៍របស់យើងគឺស្មារតីនៃការឯកភាពគ្នា និងវប្បធម៌ជួយគ្នាទៅវិញទៅមក មានន័យថា ការប្រមូលអ្នកជំនាន់ថ្មី និងចាស់ ដើម្បីបំពេញកាតព្វកិច្ច [ដើម្បីនិរន្តរភាពនៃគណបក្ស»។
លោក ខៀវ កាញារីទ្ធ មានប្រសាសន៍ថា ៖« ខ្ញុំចង់សង្កត់ធ្ងន់ថា ក្នុងអំឡុងមហាសន្និបាតរយៈពេល ៣ ថ្ងៃ នេះ មន្ត្រីគណបក្សប្រជាជនបានបង្ហាញភាពចាស់ទុំខាងនយោបាយ ដែលបានសម្តែងពីសេរីភាពដោយមិនវាយប្រហារលើគណបក្សណាទេ»។
លោកបញ្ជាក់ថា គណបក្សប្រជាជននឹងបន្តធ្វើការយ៉ាងជិត ស្និទ្ធជាមួយនឹងគណបក្សសង្គ្រោះជាតិ ដើម្បីធានានូវវប្បធម៌សន្ទនាគ្នា ហើយថ្មីៗនេះលោក សម រង្ស៊ី (ប្រធានគណបក្សសង្គ្រោះជាតិ)បានបញ្ជាក់ជាថ្មី ពីគោលបំណងរបស់លោកក្នុងការពង្រីកវប្បធម៌សន្ទនាទៅដល់ថ្នាក់មូលដ្ឋាន ហើយគណបក្សប្រជាជនសូមស្វាគមន៍។
ក្នុងសេចក្តីថ្លែងការណ៍ខួបជ័យជម្នះ ៧ មករា កន្លងទៅនិងក្នុងសេចក្តីសម្រេចចិត្តក្នុងមហាសន្និបាតបក្សកាលពីម្សិលមិញ ត្រូវក្រុមអ្នកវិភាគនិងតាមដាននយោបាយកត់សម្គាល់ឃើញថា មិនឃើញមានការប្រកាសគាំទ្រលោកហ៊ុន សែន ជាបេក្ខភាពនាយករដ្ឋមន្ត្រីសម្រាប់អាណត្តិបន្តបន្ទាប់ដូចលើកមុនៗនោះទេ។
លោក កែម ឡី អ្នកវិភាគសង្គមកត់សម្គាល់ឃើញថា គណបក្សប្រជាជនមិនលើកបញ្ហាដាក់បេក្ខភាពនាយករដ្ឋមន្ត្រី លោក ហ៊ុន សែន ខុសពីមុនដែលធ្លាប់តែយកជីវិតនយោបាយលោក ហ៊ុន សែន ជាចម្បងទៀតឡើយ ដែលពេលនេះគណបក្សប្រជាជនមិនមែនមិនដឹងថា ប្រជាជនឈប់គាំទ្រលោក ហ៊ុន សែន ទេ។ ហេតុនេះ គណបក្សអាចនឹងប្តូរយុទ្ធសាស្ត្រសម្រាប់ការបោះឆ្នោតឆ្នាំ ២០១៧ - ២០១៨។ លោកបន្តថា គណបក្សនេះមិនទាន់ប្រកាសបេក្ខភាពនាយករដ្ឋមន្ត្រី ដោយសារមិនទាន់មានការស្រុះស្រួលក្នុងបក្សនៅឡើយផង ហើយអាចថា លោក ហ៊ុន សែន មិនទាន់មានការគាំទ្រពេញលេញផងដែរ។
ប៉ុន្តែ លោក កែម ឡី មើលឃើញចំណុចថ្មីមួយ គឺការផ្លាស់ប្តូរក្នុងជួរមេដឹកនាំបក្សប្រជាជន ដោយផ្ទេរអំណាចទៅក្រុមយុវជនជំនួសវិញ។ លោកថ្លែងថា៖«បើ CPP ដាក់សមាសភាពយុវជនជំនួសក្នុងមុខតំណែងនៅគណៈរដ្ឋមន្ត្រី និងថ្នាក់ដឹកនាំខេត្តនៅក្នុងការបោះឆ្នោតខាងមុខនោះ ខ្ញុំគិតថា គណបក្សនេះនឹងដាក់នាយករដ្ឋមន្ត្រីជាយុវជនដើម្បីបង្កើនប្រជាប្រិយភាពជំនួសលោកហ៊ុន សែន»។
លោកបន្តថា៖«បើសិន CPP នៅតែមើលមិនឃើញរឿងនេះទេ នៅពេលដ៏ខ្លីខាងមុខនេះ CPP នឹងមានវាសនាមិនខុសពីហ្វ៊ុនស៊ិនប៉ិចឡើយ»៕
1 comment:
Children's of Youn party that cause khmer's Koh tral folks,please take a good look at them,this next generations of Hanoi's party will cause Khmer "Cambodia" Cambodia that we all love will be CHAMPA kingdom if not Laos or Kampuchea krom.Their parents all Khmer Rouge left over gave Koh tral to Hanoi to get power and wealth and now their childrens will follows their parents footsteps giving whole Cambodia to Hanoi an exchange for protections,after Hanoi succeeds Hanoi will kill them all... Why can we learn from CHAMPA -KINDOM?
Post a Comment