Khmerization: Cambodian forests will never have a chance to be destroyed because they already have been completely destroyed. ព្រៃឈើកម្ពុជាគ្មានវាសនាហិនហោចដូចព្រៃឈើនៅសហគមន៍អឺរ៉ុបទេ ពីព្រោះវាបានហិនហោចអស់រលីងហើយ។
១៣-ឧសភា-២០១៣៖ គំនរឈើដែលក្រុមហ៊ុនអភិវឌ្ឍន៍របស់វៀតណាម កាប់រំលំដើម្បីយកដីដាំកៅស៊ូនៅតំបន់ព្រៃឡង់ ក្នុងស្រុកសណ្ដាន់ ខេត្តកំពង់ធំ។
RFA/Tin Zakariya
លោក ហ៊ុន សែន បានប្រកាសថា ប្រទេសអ្នកមានមិនអាចមើលងាយប្រទេសអ្នកក្របានទេ។ លោក ហ៊ុន សែន ថ្លែងនៅចំពោះមុខអគ្គរដ្ឋទូតសហភាពអឺរ៉ុបប្រចាំកម្ពុជា លោក ហ្សង់ ហ្រ្វង់ស័រ កូតាំង (Jean francois CAUTAIN) ថា កម្ពុជាមិនយកគំរូតាមប្រទេសសហភាពអឺរ៉ុបដែលកាប់ព្រៃឈើអស់នោះទេ។ តែមន្ត្រីអង្គការសង្គមស៊ីវិល ដែលធ្វើការការពារបរិស្ថាននោះ លើកឡើងថា រដ្ឋាភិបាលការពារការកាប់ព្រៃឈើគ្មានប្រសិទ្ធភាពនោះទេ ហើយថា កម្ពុជានឹងមានវាសនាហិនហោចព្រៃឈើដូចសហភាពអឺរ៉ុប នៅពេលខាងមុខ។
លោកនាយករដ្ឋមន្ត្រី ហ៊ុន សែន ប្រកាសថា បទពិសោធន៍របស់សហភាពអឺរ៉ុប ធ្វើឲ្យបាត់បង់ព្រៃឈើអស់នោះ កម្ពុជានឹងមិនយកគំរូតាមនោះទេ។
លោក ហ៊ុន សែន បញ្ជាក់នៅចំពោះមុខលោកអគ្គរដ្ឋទូតសហភាពអឺរ៉ុបនៅកម្ពុជា ក្នុងទិវាជាតិទីក្រុងស្អាតឆ្នាំ២០១៥ នៅថ្ងៃទី២៤ កុម្ភៈ ថា ប្រទេសអ្នកមានមួយចំនួនបានរិះគន់កម្ពុជា ទៅលើគម្រោងសាងសង់ទំនប់វារីអគ្គិសនី និងការកាប់ព្រៃឈើ ចុះប្រទេសមួយចំនួនទៀតធ្វើបរមាណូ ហេតុអីមិននិយាយពីការខូចបរិស្ថានផង៖ «ពួកអឺរ៉ុបកាប់ឈើខ្លួនឯងអស់តាំងពីជំនាន់ណាណោះ រួចមកប្រដៅតែគេ។ …ឯកម្ពុជា មិនធ្វើដូចអឺរ៉ុបទេ កាប់ទាល់តែខ្ទេចព្រៃ មិនធ្វើអ៊ីចឹងទេ យើងដកពិសោធន៍ពីកំហុសរបស់អឺរ៉ុបដែរ។ អឺរ៉ុបមិនកាប់ព្រៃឈើអស់ អូ! ស្មានតែវាលអ៊ីចឹងតាំងពីអើយ!»។
ការថ្លែងរបស់លោក ហ៊ុន សែន នេះ ធ្វើឡើងនៅបន្ទាប់ពីអង្គការឃ្លាំមើលពិភពលោក គ្លបល វីតនេស (Global Witness) បានសម្ដែងការសោកស្ដាយចំពោះការអះអាងរបស់មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ ដែលចាត់ទុកថា ការរកស៊ីឈើប្រណីតរបស់លោក ទ្រី ភាព ដែលគេស្គាល់ថា លោកបានកាប់បំផ្លាញព្រៃឈើនៅកម្ពុជា នោះ ថាជាជំនួញស្របច្បាប់។
របាយការណ៍របស់ គ្លបល វីតនេស (Global Witness) ដែលចេញផ្សាយកាលពីសប្ដាហ៍មុន ក៏បានបញ្ជាក់ផងដែរថា ការរកស៊ីឈើរបស់លោក ទ្រី ភាព គឺប្រាសចាកពីអនុសញ្ញាស្ដីពីការហាមប្រាមក្នុងការធ្វើពាណិជ្ជកម្មអន្តរជាតិនៃសត្វព្រៃ និងព្រៃឈើដែលជិតផុតពូជ។
មិនមែនជាលើកទី១ទេ ដែលលោកនាយករដ្ឋមន្ត្រី ហ៊ុន សែន ប្រកាសឲ្យបង្ក្រាបបទល្មើសព្រៃឈើ និងវិធានការការពារព្រៃឈើនៅកម្ពុជា លោកថែមទាំងប្ដេជ្ញាចិត្តថា លោកនឹងកាត់កលោកចេញ បើសិនជាលោកការពារព្រៃឈើមិនបាន។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង មានប្រសាសន៍ថា រដ្ឋាភិបាលមិនអាចការពារព្រៃឈើនៅកម្ពុជា បានទេ ដោយសាររដ្ឋាភិបាលបានវិនិយោគឲ្យក្រុមហ៊ុនឯកជនជាអ្នកកាប់ព្រៃឈើ ដែលក្រុមឈ្មួញទាំងនោះកាប់ព្រៃឈើដោយសេរី។ លោកបញ្ជាក់ថា បច្ចុប្បន្ននេះ គេដឹកឈើចេញតាមច្រកកំពង់ផែអន្តរជាតិកំពង់សោម ក្នុង ១ខែចន្លោះពី ៩០០ ទៅ ១.០០០កុងទឺន័រ៖ «ក្រុមគ្រួសារលោកនាយករដ្ឋមន្ត្រីក៏ស្រលាញ់ព្រៃឈើដែរ ដូចជាផ្ទះលោក ហ៊ុន តូ បានដាំដើមឈើ ផ្ទះលោកនាយករដ្ឋមន្ត្រីជាដើម តែគាត់បែរជាបំផ្លាញព្រៃឈើទៅវិញ ដូច្នេះលោកនាយករដ្ឋមន្ត្រីត្រូវតែពិចារណាក្នុងការការពារព្រៃឈើនេះ»។
កន្លងមកមន្ត្រីការពារបរិស្ថានតែងតែទទួលរងការប្ដឹងផ្ដល់ទៅតុលាការ និងការគំរាមកំហែងពីក្រុមឈ្មួញកាប់ព្រៃឈើ។ លើសពីនេះទៀត មានអ្នកកាសែត និងសកម្មជនការពារព្រៃឈើ ដូចជាលោក ឈុត វុទ្ធី ជាដើម ត្រូវបានគេបាញ់សម្លាប់។
អង្គការធ្វើការលើផ្នែកបរិស្ថាន គ្លបល វីតនេស ដែលមានមូលដ្ឋាននៅប្រទេសអង់គ្លេស បានស្នើរាជរដ្ឋាភិបាលកម្ពុជា ស៊ើបអង្កេតទ្រព្យសម្បត្តិ និងការរកស៊ីឈើរបស់លោកឧកញ៉ា ទ្រី ភាព បន្ទាប់ពីអង្គការនេះបានរកឃើញថា លោក ទ្រី ភាព ជាអ្នករកស៊ីឈើខុសច្បាប់ និងនាំចេញឈើជាច្រើនរយម៉ែត្រគូបក្នុងមួយថ្ងៃទៅក្រៅប្រទេស។
ទាក់ទងនឹងបញ្ហានេះ លោក អ៊ូច ឡេង អះអាងថា ព្រៃឈើនៅកម្ពុជា នឹងមានវាសនាបាត់បង់មិនខុសពីសហភាពអឺរ៉ុបនោះឡើយនៅពេលខាងមុខ៕
2 comments:
you cannot see it because you have only one eye......
Ah Maha Kbot Cheat Hun Sen,
The mega-dam will not start until 2018 ??
Ah Roleuy,
Cambodia and Khmer people don't want that DAM.
We knew that you are blind, are you deaf too??
93 years old woman
Post a Comment