លោក សុខ សូកាន បេក្ខជនតំណាងរាស្ត្រ មណ្ឌលខេត្តតាកែវ ជំនួសលោក សូ ឃុន។
Photo Facebook
គណៈកម្មាធិការអចិន្ត្រៃយ៍រដ្ឋសភា នៅថ្ងៃទី២ កុម្ភៈ បានប្រជុំអនុម័តសំណើសុំប្រកាស ទទួលស្គាល់លោក សុខ សូកាន កូនរបស់ឧបនាយករដ្ឋមន្ត្រី សុខ អាន ជាតំណាងរាស្ត្រថ្មីនៃមណ្ឌលតាកែវ ជំនួសលោក សូ ឃុន ដែលបានទទួលមរណភាព កាលពីខែមករា កន្លងទៅ។ អង្គការដែលធ្វើការឃ្លាំមើលការ បោះឆ្នោត គិតថា ការដាក់ឲ្យកូនប្រុស អ្នកមានឥទ្ធិពលរបស់គណបក្សប្រជាជនកម្ពុជា ជាតំណាងរាស្ត្រនៅ ពេលនេះមិនមានតម្លាភាព។
រដ្ឋសភានឹងប្រកាសសុពលភាព នៃអាណត្តិរបស់លោក សុខ សូកាន ជាសមាជិករដ្ឋសភានីតិកាល ទី៥ នៅក្នុងសម័យប្រជុំរដ្ឋសភា នាពេលខាងមុខ បន្ទាប់ពីគណៈកម្មាធិការអចិន្ត្រៃយ៍រដ្ឋសភា សម្រេចទទួលស្គាល់លោក ជាតំណាងរាស្ត្រថ្មី នៃមណ្ឌលខេត្តតាកែវ ជំនួសលោក សូ ឃុន។
លោក សុខ សូកាន ជាសមាជិកគណៈកម្មការសាធារណការដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្មរ៉ែ ថាមពល ពាណិជ្ជកម្ម រៀបចំដែនដីនគរូបនីយកម្ម និងសំណង់។ លោកមានវ័យ៣៣ ឆ្នាំ ជាកូនប្រុសទី៣របស់លោក សុខ អាន ដែលជាសមាជិកអចិន្ត្រៃយ៍ គណៈកម្មាធិការកណ្ដាលរបស់គណបក្សប្រជាជនកម្ពុជា។
ការស្នើសុំរបស់គណបក្សប្រជាជនកម្ពុជា ឲ្យលោក សុខ សូកាន ជាតំណាងរាស្ត្រជំនួស លោក សូ ឃុន នៅពេលនេះធ្វើឲ្យមានមន្ទិលសង្ស័យជាច្រើន ពីភាពមិនប្រក្រតី ពាក់ព័ន្ធនឹងការផ្លោះលេខរៀង នូវបញ្ជីផ្លូវការបេក្ខជនឈរឈ្មោះបោះឆ្នោត ជ្រើសតាំងតំណាងរាស្ត្រនីតិកាលទី៥ កាលពីឆ្នាំ ២០១៣។
លោក សុខ សូកាន ជាបេក្ខជនពេញសិទ្ធិលេខរៀងទី៨ ក្នុងបញ្ជីឈ្មោះបោះឆ្នោត របស់គណបក្ស ប្រជាជនកម្ពុជានៅមណ្ឌលខេត្តតាកែវ។ ខណៈដែរគណបក្សនេះមានបេក្ខជន៤រូប ជាប់ជា តំណាង។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោត ដោយសេរីនិងយុត្តិធម៌នៅកម្ពុជា ហៅកាត់ថាខុមហ្វ្រែល (COMFREL)គិតថា ការដែលដាក់ឈ្មោះលោក សុខ សូកាន ជាតំណាងរាស្ត្រ ជំនួសលោក សូ ឃុន មិនមានតម្លាភាពឡើយ។ តាមច្បាប់ស្ដីពីការបោះឆ្នោត ជ្រើសតាំងតំណាងរាស្ត្រ អ្នកដែលជំនួសតំណែងលោក សូ ឃុន បានគឺបេក្ខជនឈរលេខរៀង បន្ទាប់ ឬមានន័យថាលេខរៀងទី៥ ក្នុងបញ្ជីឈ្មោះបោះឆ្នោតនៅមណ្ឌលខេត្តតាកែវ របស់គណបក្ស ប្រជាជនកម្ពុជា គឺមិនទាន់ដល់វេនលោក សុខ សូកាន ដែលមានលេខរៀងទី៨ត្រូវជំនួសនោះ ឡើយ។
លោក គល់ បញ្ញា គិតថាការផ្លោះបេក្ខជនដាក់ជំនួសលោក សូ ឃុន គឺជាការរំលោភច្បាប់ ហើយ គណៈកម្មាធិការជាតិរៀបចំការបោះឆ្នោត តែងតែបណ្ដោយឲ្យគណបក្សប្រជាជនកម្ពុជា ផ្លាស់ប្តូរ បេក្ខជនតាមអំពើចិត្ត ដោយមិនខ្វល់ពីលំដាប់លំដោយលេខរៀងរបស់បេក្ខជន។
អ្នកវិភាគបញ្ហានយោបាយ លោកបណ្ឌិត សុខ ទូច គិតថា ប្រសិនបើលោក សុខ សូកាន មិនមាន លេខរៀងបន្ទាប់ពីលោក សូ ឃុន ហើយត្រូវឡើងតំណែងជំនួស នោះគឺជាការធ្វើឡើងតាមរយៈ បក្ខពួកនិយម។ ឥទ្ធិពលរបស់បក្ស ដែលគេដឹងថា លោក សុខ អាន ជាសមាជិកអចិន្ត្រៃយ៍ គណៈកម្មាធិការកណ្ដាលរបស់គណបក្សប្រជាជនកម្ពុជា កំពុងគ្របដណ្តប់ លើការសម្រេចចិត្ត ដាក់កូនប្រុសរបស់លោក ឲ្យផ្លោះដើម្បីទទួលយកតំណែងមួយនេះ។
វិទ្យុអាស៊ីសេរី មិនអាចទាក់ទងសុំការបំភ្លឺពីមន្ត្រីគណបក្សប្រជាជនកម្ពុជា សួរនាំពីបញ្ហានេះបាន ទេ នៅថ្ងៃទី២ ខែកុម្ភៈ។
ប៉ុន្តែអគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា បញ្ជាក់ថាការ សម្រេចដាក់លោក សុខ សូកាន ជំនួសលោក សូ ឃុន ដែលស្លាប់នេះ ជាការត្រឹមត្រូវតាមច្បាប់។ លោកបញ្ជាក់ថា បេក្ខជនឈរឈ្មោះបោះឆ្នោត៣នាក់ ដែលមានលេខរៀងបន្ទាប់ពីលោក សូ ឃុន បានដាក់ពាក្យសុំលាលែង ទៅ គ.ជ.ប កាលពីសប្ដាហ៍មុន ដូច្នេះលោក សុខ សូកាន ជាបេក្ខជនពេញសិទ្ធិមួយរូបគត់ ដែលត្រូវទទួលតំណាងនេះ។
យ៉ាងណា លោក គល់ បញ្ញា គិតថាការសុំលាលែងរបស់បេក្ខជនលេខរៀងបន្ទាប់ ត្រូវមានមូល ហេតុច្បាស់លាស់ ហើយត្រូវប្រកាសជាសាធារណៈ ឬយ៉ាងហោចណាស់ត្រូវប្រកាសឲ្យពលរដ្ឋ ជាម្ចាស់ឆ្នោត នៅខេត្តតាកែវបានដឹងពីរឿងនេះ។ ប៉ុន្តែគ្មាននរណាបានដឹងពីការសុំលាលែងរបស់ បេក្ខជនលេខរៀងបន្ទាប់ទាំងនោះទេ៕
1 comment:
He still a baby to go inside the parliament.
Post a Comment