ដោយ៖ ស៊ុន ណារិន | ថ្ងៃអាទិត្យ ទី1 កុម្ភៈ 2015,
មហាសន្និបាតវិសាមញ្ញរបស់គណបក្សប្រជាជនកម្ពុជាដែលត្រូវបានធ្វើឡើងរយៈពេល៣ថ្ងៃចាប់ពីថ្ងៃទី៣០ខែមករាដល់ថ្ងៃទី០១ខែកុម្ភៈ បានសម្រេចជំរុញឲ្យមានការអនុវត្តកិច្ចព្រមព្រៀងនយោបាយ ដែលត្រូវបានធ្វើឡើងជាមួយគណបក្សសង្រ្គោះជាតិ កាលពីថ្ងៃទី២២ ខែកក្កដា ឆ្នាំ២០១៤។
មហាសន្និបាតវិសាមញ្ញនេះ ត្រូវបានចូលរួមពីសមាជិក សមាជិកានៃគណៈកម្មការធិការកណ្តាល មន្រ្តីគណបក្សជាសមាជិក សមាជិកានៃរដ្ឋសភា ព្រឹទ្ធសភា រាជរដ្ឋាភិបាល អនុរដ្ឋលេខាធិការ មន្រ្តីជាន់ខ្ពស់ និងតំណាងមកពីគណៈកម្មាការធិការគណបក្សគ្រប់គ្រងក្រសួង ស្ថាប័ន រាជធានី ខេត្ត ក្រុង ស្រុក ខណ្ឌសរុបចំនួន១៣៥៩រូប។
សេចក្តីសម្រេចរបស់មហាសន្និបាតចេញផ្សាយភ្លាមៗបន្ទាប់ពីមហាសន្និបាតបញ្ចប់នៅល្ងាចថ្ងៃអាទិត្យនេះ ឲ្យដឹងថាមហាសន្និបាតបានសម្រេច៩ចំណុច ដែលក្នុងនោះមហាសន្និបាតក៏បានជំរុញយ៉ាងសកម្មនូវការអនុវត្តកិច្ចព្រមព្រៀងរវាងគណបក្សប្រជាជនកម្ពុជា និងគណបក្សសង្រ្គោះជាតិ ឲ្យទទួលបានលទ្ធផលពេញលេញគ្រប់ជ្រុងជ្រោយ ដើម្បីឆ្លើយតបនឹងបំណងប្រាថ្នារបស់ប្រជាជន។ សេចក្តីសម្រេចបន្តថា«ក្នុងស្មារតីនេះ គណបក្សប្រជាជនកម្ពុជា គាំទ្រចំពោះដំណើរការកែទម្រង់ការបោះឆ្នោត ដែលបាននិងកំពុងប្រព្រឹត្តទៅនេះ សំដៅធានាឲ្យការបោះឆ្នោតបន្តបន្ទាប់ទៀតមានលក្ខណៈកាន់តែល្អប្រសើរឡើងដោយខិតខំបន្តដោះស្រាយរាល់បញ្ហាដែលនៅសេសសល់ តាមរយៈការពង្រីកវប្បធម៌នៃការសន្ទនាគ្នា ដោយឈរលើមូលដ្ឋានគោរពឧត្តមប្រយោជន៍ជាតិ និងប្រជាជន គោលការណ៍នៃលទ្ធិប្រជាធពិតេយ្យ និងនីតិរដ្ឋ។ វប្បធម៌នៃការសន្ទនានេះ គប្បីបានពង្រីកនៅគ្រប់កម្រិតរហូតដល់មូលដ្ឋាន»។
ក្នុងមហាសន្និបាតនេះ គណបក្សប្រជាជនកម្ពុជាក៏បានអំពាវនាវដល់គ្រប់គណបក្សនយោបាយ និងមជ្ឈដ្ឋាននានាក្នុងសង្គម ធ្វើការសហប្រតិបត្តិការ និងរួមកម្លាំងគ្នាដោះស្រាយបញ្ហានានារបស់ជាតិ ហើយចៀសវាងការធ្វើសេចក្តីថ្លែងការណ៍ជាសាធារណៈ ឬសកម្មភាពណា ដែលពុំផ្តល់ប្រយោជន៍ដល់ការពង្រឹងសាមគ្គីភាព និងស្ថិរភាពសង្គម។
មហាសន្និបាតក៏បានពិនិត្យវាយតម្លៃយ៉ាងល្អិតល្អន់ចំពោះការងារបោះឆ្នោតរបស់គណបក្ស ទាំងចំណុចខ្លាំង ចំណុចខ្សោយ ដោយបានដកស្រង់មេរៀនពិសោធន៍មួយចំនួន ព្រមទាំងបានកំណត់ទិសដៅភារកិច្ចសំខាន់ៗ សំដៅត្រៀមលក្ខណៈឲ្យបានគ្រប់គ្រាន់ ដើម្បីធានារក្សាប្រៀបឈ្នះ និងបង្កើនប្រៀបឈ្នះរបស់គណបក្សប្រជាជនក្នុងពេលបោះឆ្នោតនាពេលខាងមុខទៀត។
សេចក្តីសម្រេចរបស់មហាសន្និបាតឲ្យដឹងទៀតថាមហាសន្និបាតគាំទ្រយ៉ាងពេញទំហឹងចំពោះការប្រឹងប្រែងរបស់រាជរដ្ឋាភិបាលនីតិកាលទី៥ ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន ក្នុងការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៣។ មហាសន្និបាតក៏បានជំរុញខ្លាំងដំណើរការកែទម្រង់ដ៏ទូលំទូលាយ និងស៊ីជម្រៅដែលត្រូវបានអនុវត្ត និងកំពុងអនុវត្តប្រកបដោយផ្លែផ្កា ដោយកំណត់ថាកំណែទម្រង់ គឺជាការងារដ៏មានសារសំខាន់បំផុតសម្រាប់អាយុជីវិតរបស់ជាតិ និងរបស់គណបក្សប្រជាជនកម្ពុជា។
គួររំឮកថា រហូតមកដល់ពេលនេះ ក្រុមការងារចរចាកំណែទម្រង់ការបោះឆ្នោតរបស់គណបក្សទាំងពីរកំពុង ខ្វែងគំនិតគ្នាលើចំណុចមួយចំនួននៃការកែទម្រង់ការបោះឆ្នោត ដូចជាចំនួនថ្ងៃឃោសនាបោះឆ្នោត ការកំណត់ឲ្យមិនមន្រ្តីរាជការ កងកម្លាំងចូលឃោសនាបោះឆ្នោត និងបញ្ហាផ្សេងៗមួយចំនួនទៀត ដោយទុកឲ្យថ្នាក់ដឹកនាំរបស់គណបក្សទាំងពីរជាអ្នកសម្រេច។ ក្រុមការងារកំពុងតែជួបចរចាគ្នាលើជំពូកទី៨នៃច្បាប់បោះឆ្នោត ដែលនិយាយពីការបោះឆ្នោត ការរាប់សន្លឹកឆ្នោត ការបោះឆ្នោត ការបូកសរុបលទ្ធផលបោះឆ្នោត និងការប្តឹងទៅក្រុមប្រឹក្សាធម្មនុញ្ញ។
តាមគម្រោង ការពិភាក្សាពីកំណែទម្រង់ការបោះឆ្នោត នឹងត្រូវបញ្ចប់នៅចុងខែកុម្ភៈ ឆ្នាំ២០១៥។ ក្រុមការងារជំនាញរបស់គណបក្សទាំងពីរនឹងបន្តជួបពិភាក្សាគ្នាលើការងារកំណែទម្រង់ចាប់ពីថ្ងៃចន្ទស្អែកនេះបន្តទៀត៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
No comments:
Post a Comment