(ចុះផ្សាយនៅថ្ងៃ 
18-02-2015,) | ដោយ ធឿន បញ្ញាឬទិ្ធ
18-02-2015,) | ដោយ ធឿន បញ្ញាឬទិ្ធត្រឹមតែរយៈពេល១ ខែ ១៣ ថ្ងៃតែប៉ុណោះ មន្ត្រីជាន់ខ្ពស់គណបក្សសង្គ្រោះជាតិ ២រូបបានចាកចេញពីគណបក្ស ក្នុងនោះមានមន្ត្រីម្នាក់ ត្រូវបក្សជាអ្នកបណ្តេញចេញ និងមួយរួបទៀតចាកចេញដោយខ្លួនឯង។ អ្នកស្រី ឡាក់ សុភាព អតីតជំនួយការផ្ទាល់លោក កឹម សុខា និងជាសមាជិកគណៈកម្មាធិការនាយកបក្ស ជាមន្ត្រីដែលបក្សបណ្តេញចេញ កាលពីថ្ងៃទី ៣០ ធ្នូ ឆ្នាំ ២០១៤ ក្រោមហេតុផលថា អ្នកស្រីចោទប្រកាន់លោក កឹម សុខា និងលោក សម រង្ស៊ី ថា ប្រព្រឹត្តអំពើពុករលួយដោយគ្មានភស្តុតាង។ ចំណែកលោក វ៉ាន សំអឿន ទើបតែចាកចេញពីបក្ស និងលាពីតំណែងតំណាងរាស្ត្រដោយចិត្តឯង កាលពីថ្ងៃទី ១៣ ខែកុម្ភៈ ឆ្នាំ ២០១៥ ទៅចូលជាមួយបក្សកាន់អំណាច ដោយសំអាងថា ក្នុងពេលរូបលោកធ្វើតំណាងរាស្ត្រមណ្ឌលកំពតរបស់គណបក្សប្រឆាំង លោកគ្មានឱកាសបម្រើប្រទេសជាតិតាមឆន្ទៈ និងបទពិសោធន៍របស់ខ្លួន ។
ចំពោះករណីអ្នកស្រី ឡាក់ សុភាព លោក នាយករដ្ឋមន្ត្រី ហ៊ុន សែន មិនធ្វើអត្ថាធិប្បាយអ្វីឡើយ ពីព្រោះអ្នកស្រី មិនបានប្រកាសសុំជ្រោកកោណជាមួយគណបក្សប្រជាជនកម្ពុជា។ តែចំពោះការលាលែងរបស់លោក វ៉ាន សំអឿន វិញ លោក ហ៊ុន សែន មិនបង្អង់យូរក្នុងការថ្លែងការពារលោកអតីតតំណាងរាស្ត្របក្សប្រឆាំងរូបនេះ ឆ្លើយតបនឹងការចោទប្រកាន់មន្ត្រីបក្សប្រឆាំងមួយចំនួនថា លោក វ៉ាន សំអឿន លក់ខ្លួនឲ្យគណបក្សកាន់អំណាចនោះទេ ។លោកនាយករដ្ឋមន្ត្រី ហ៊ុន សែន បានអះអាងថា គណបក្សប្រជាជនកម្ពុជារបស់លោកមិនបានប្រើលុយទិញតំណាងរាស្ត្រគណបក្សសង្គ្រោះជាតិ លោក វ៉ាន សំអឿន ឲ្យចុះចូលជាមួយគណបក្សប្រជាជនកម្ពុជាទាល់តែសោះ។ លោក ថែមទាំងចាត់ទុកការចោទប្រកាន់របស់មន្ត្រីបក្សប្រឆាំងទៅលើលោក វ៉ាន សំអឿន ថា ត្រូវបានគណបក្សប្រជាជនកម្ពុជាទិញនោះ ជាការលាបពណ៌បង្ខូចកិត្តិយសលោក វ៉ាន សំអឿន ។
លោក ហ៊ុន សែន បានបញ្ជាក់នៅក្នុងពិធីចែកសញ្ញាបត្រដល់និស្សិតសកលវិទ្យាល័យធនធានមនុស្សកាលពីថ្ងៃអង្គារ ទី ១៧ ខែកុម្ភៈយ៉ាងនេះថា៖ « មនុស្សមិនមែនទំនិញទេ ។ ក្បាលមនុស្សអី ក៏ថោកម្លេះ ឲ្យទិញស្រួលៗនោះ ខ្ញុំមិនសំបូរលុយទេ ។ ហើយមនុស្សម្នាក់ទិញធ្វើអ្វី បើគណបក្សប្រជាជនកម្ពុជា មានបណ្ឌិតមិនខ្វះនោះ ។ សូមមេត្តាកុំលាបពណ៌ ។ ពេលគេលែងគាំទ្រ ចាត់ទុកគេជាឈើពុក សាច់ស្អុយ» ។
ដោយឡែកសម្រាប់ការបាត់បង់មន្ត្រីគណៈកម្មាធិការនាយក និងតំណាងរាស្ត្ររបស់គណបក្សសង្គ្រោះជាតិនេះ លោក សុខ ទូច អ្នកវិភាគនយោបាយ មើលឃើញថា គណបក្សសង្គ្រោះជាតិកំពុងតែមានបញ្ហាផ្ទៃក្នុងបក្ស ។ លោកថា កន្លងមកគោលការណ៍បែបលទ្ធិប្រជាធិបតេយ្យរបស់គណបក្សប្រឆាំងនោះ បានតែបង្ហាញប្រាប់គេទេ តែបក្សនេះមិនបានអនុវត្តនោះឡើយ ពោលគឺគណបក្សនេះនៅតែដឹកនាំបែបកុម្មុយនីស្ដ ដោយយកសំដីមេដឹកនាំជាធំ ដែលបណ្ដាឲ្យមានភាពមិនចុះសម្រុងក្នុងបក្ស។
អ្នកវិភាគរូបនេះ បញ្ជាក់ដូច្នេះថា៖« គណបក្សនេះមានបញ្ហាផ្ទៃក្នុងបក្ស ហើយទំនងជាមន្ត្រីដែលចាកចេញនោះ មើលឃើញថាបក្សអត់មានគោលការណ៍អ្វីថ្មីសម្រាប់គាត់។ ព្រោះគោលការណ៍គណបក្សប្រឆាំងតាមលទ្ធិប្រជាធិបតេយ្យនោះគឺនៅលើតែការប្រកាស តែការអនុវត្តជាក់ស្ដែង គណបក្សនេះយកសំដីមេដឹកនាំជាធំ ដែលធ្វើឲ្យមានការមិនពេញចិត្តពីសហការី ។ ម្យ៉ាងទៀត បក្សនេះ ចេញពីបក្សពីរ គឺគណបក្សសម រង្ស៊ី និងគណបក្សសិទ្ធិមនុស្ស ដែលអាចធ្វើឲ្យមន្ត្រីមកពីផ្សេងៗគ្នា មិនទាន់ធ្វើការចុះសម្រុងគ្នា »។លោក សុខ ទូច វាយតម្លៃថា បើគណបក្សសង្គ្រោះជាតិ មិនដោះស្រាយបញ្ហាឲ្យទាន់ពេលទេនោះ គណបក្សប្រឆាំងមួយនេះនឹងប្រឈមភាពផុយស្រួយជាងគណបក្សប្រជាជនកម្ពុជាទៅទៀត៕
No comments:
Post a Comment