អ្នកតំណាងរាស្ត្រគណបក្សប្រឆាំងមណ្ឌលខេត្តបាត់ដំបង នៅព្រឹកថ្ងៃទី៣ កុម្ភៈ ចុះធ្វើអន្តរាគមន៍ជួយដល់ប្រជាពលរដ្ឋចំនួន ៦០០គ្រួសារ ដែលអាជ្ញាធរក្រុងបាត់ដំបង ចេញសេចក្ដីជូនដំណឹងឲ្យរុះរើផ្ទះ និងផលដំណាំចេញពីកន្លែងស្នាក់នៅ ដើម្បីនាំបញ្ហានេះដាក់ទៅរដ្ឋសភា និងក្រសួងពាក់ព័ន្ធ ឲ្យដោះស្រាយជូនប្រជាពលរដ្ឋ។
កិច្ចអន្តរាគមន៍របស់អ្នកតំណាងរាស្ត្រនេះ ធ្វើឡើងបន្ទាប់ពីប្រជាពលរដ្ឋប្រតិកម្មនឹងសេចក្ដីជូនដំណឹងរបស់សាលាក្រុងបាត់ដំបង ហើយអាជ្ញាធរមូលដ្ឋានដឹកនាំកម្លាំងទៅកាប់បំផ្លាញដើមឈើ និងឲ្យប្រជាពលរដ្ឋរុះរើផ្ទះដែលប៉ះពាល់ចេញពីលំនៅឋាន កាលពីថ្ងៃទី១៩ និងថ្ងៃទី២៦ មករា កន្លងទៅ។
ក្រុមប្រជាពលរដ្ឋថ្លែងប្រាប់អ្នកតំណាងរាស្ត្រនៅតំបន់ដីមានជម្លោះ នៅភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង នៅថ្ងៃទី៣ កុម្ភៈ ថា សកម្មភាពរបស់អាជ្ញាធរ រួមមានមន្ត្រីប៉ូលិស ទាហាន និងមន្ត្រីកងរាជអាវុធហត្ថក្រុង បានបណ្ដេញពួកគេឲ្យចេញដីពីលំនៅឋាននេះ ធ្វើឡើងដោយអយុត្តិធម៌មកលើប្រជាពលរដ្ឋក្រីក្រ និងគ្មានអំណាច៖ «កន្លងមករដ្ឋាភិបាលតែងតែនិយាយថាជួយប្រជាពលរដ្ឋក្រីក្រ តែពេលនេះហេតុអីបានជាពួកអ្នកមានលុយគាបសង្កាត់យកដីពីអ្នកក្រទៅ ហើយអាជ្ញាធរមិនដោះស្រាយ។ ហេតុអីបានជាធ្វើបានពួកខ្ញុំអ្នកក្រអីចឹង។ បើសិនជារដ្ឋយកដីនេះយកទៅធ្វើផ្លូវថ្នល់ ខ្ញុំមិនតវ៉ាទេ តែគេយកដីខ្ញុំទៅក្នុងផលប្រយោជន៍ផ្សេង»។
ទាក់ទងនឹងបញ្ហានេះ អ្នកតំណាងរាស្ត្រមណ្ឌលខេត្តបាត់ដំបង អ្នកស្រី មូរ សុខហួរ មានប្រសាសន៍ខណៈជួបប្រជាពលរដ្ឋនៅតំបន់ដីមានជម្លោះនោះថា អ្នកស្រីនឹងនាំពាក្យបណ្ដឹងរបស់ប្រជាពលរដ្ឋដាក់ទៅរដ្ឋសភា និងក្រសួងពាក់ព័ន្ធ រួមមានក្រសួងមហាផ្ទៃ និងក្រសួងការពារជាតិ ជាដើម ដើម្បីចាត់វិធានការទៅលើមន្ត្រីទាំងនោះ ឲ្យបញ្ឈប់បណ្ដេញប្រជាពលរដ្ឋចេញពីដីដែលពួកគាត់ស្នាក់នៅ៖ «តើអាជ្ញាធរយកដីពីប្រជាពលរដ្ឋដោយអះអាងថាយកទៅចែកឲ្យប្រជាពលរដ្ឋក្រីនោះ មានបានសួរនាំពួកគាត់ទេ? ចំណុចត្រង់នេះបញ្ជាក់ឲ្យឃើញថា សេចក្ដីសម្រេចរបស់អាជ្ញាធរនេះ គឺមិនអាចយកជាការបានឡើយ។ ច្បាប់អ្វីក៏ដោយ គឺការអភិវឌ្ឍត្រូវផ្ដើមចេញពីប្រជាពលរដ្ឋដែលនៅទីកន្លែងនោះ ដោយមានការឯកភាពពីពួកគាត់ ទើបអាចដំណើរការទៅបាន»។
ឆ្លើយតបនឹងបញ្ហានេះ អភិបាលក្រុងបាត់ដំបង លោក សៀង ឯមវូនស្ហី មានប្រសាសន៍កាលពីថ្ងៃទី១ កុម្ភៈ ថា ដីដែលប្រជាពលរដ្ឋអះអាងជាកម្មសិទ្ធិនោះ ជាដីគម្រោងសួនសាធារណៈរបស់រដ្ឋ ហើយអ្នកភូមិទៅតាំងទីលំនៅដោយខុសច្បាប់។ ទោះយ៉ាងនេះក្ដី លោកថា សមត្ថកិច្ចពុំបានបណ្ដេញប្រជាពលរដ្ឋចេញ ហើយយកដីទៅលក់ដូចការលើកឡើងរបស់អ្នកភូមិនោះទេ គឺសមត្ថកិច្ចចុះទៅពិនិត្យនៅតំបន់នោះ ដើម្បីរៀបចំបែងចែកដីឲ្យប្រជាពលរដ្ឋក្រីក្រដែលរស់នៅក្នុងក្រុង ហើយពុំមានដីធ្លី៖ «ដីហ្នឹងចែកឲ្យប្រជាពលរដ្ឋក្រីក្រ ធ្វើឡើងដោយមានការឯកភាពពីអភិបាលខេត្តបាត់ដំបង ហើយម្យ៉ាងទៀត យើងក៏បានប្រកាសផ្សព្វផ្សាយជូនពួកគាត់ហើយដែរ»។
តែយ៉ាងណា ជំទប់ទី២សង្កាត់ព្រែកព្រះស្ដេច លោក ខាន់ ប៊ុនផេង មានប្រសាសន៍ឲ្យដឹងថា ដីដែលអាជ្ញាធរឲ្យប្រជាពលរដ្ឋរុះរើផ្ទះចេញនោះ មានទំហំទទឹងប្រមាណ ៤០ម៉ែត្រ និងបណ្ដោយប្រមាណ ១.៧០០ម៉ែត្ររបស់ប្រជាពលរដ្ឋប្រមាណជាង ៦០០គ្រួសារ ឋិតនៅចំណុចភូមិអូរខ្ជាយ ភូមិ៧មករា និងភូមិចម្ការឫស្សី សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។ លោកថា ដើមឡើយដីនោះជាដីគម្រោងសួនសាធារណៈរបស់រដ្ឋ ប៉ុន្តែចាប់តាំងពីឆ្នាំ២០០៦ មក ដីនៅតំបន់នោះបានប្ដូរទៅជាដីសម្បទានសង្គមកិច្ចសម្រាប់ចែកជូនប្រជាពលរដ្ឋក្រីក្រដែលគ្មានដីធ្លី។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា សកម្មភាពទាំងឡាយណាដែលកាប់បំផ្លាញ ឬរុះរើផ្ទះសម្បែង និងធ្វើឲ្យខូចទ្រព្យសម្បត្តិដែលជាកម្មសិទ្ធិស្របច្បាប់របស់ប្រជាពលរដ្ឋ ដោយពុំមែនជាសេចក្ដីសម្រេចរបស់តុលាការ ចាត់ជាអំពើរំលោភសិទ្ធិមនុស្សដោយខុសច្បាប់៕
No comments:
Post a Comment