ស្ដាប់ ឬ ទាញយកសំឡេង
ភ្ញៀវទេសចរចូលទៅទស្សនាតំបន់រមណីយដ្ឋានទឹកធ្លាក់ក្បាលឆាយ នាខេត្តព្រះសីហនុ ក្នុងពិធីបុណ្យចូលឆ្នាំចិន-វៀតណាម កាលពីថ្ងៃទី១៩ ខែកុម្ភៈ ឆ្នាំ២០១៥។
RFA/Den Ayuthyea
មន្ត្រីមន្ទីរទេសចរណ៍ខេត្តព្រះសីហនុ បានអះអាងថា ចំនួនទេសចរចូលមកទស្សនាខេត្តនេះក្នុងពិធីបុណ្យចូលឆ្នាំចិន-វៀតណាម រយៈពេល ៣ថ្ងៃ មានចំនួនកើនច្រើន។ រីឯបញ្ហាគ្រោះថ្នាក់ចរាចរណ៍ និងបញ្ហាកកស្ទះវិញ មន្ត្រីនគរបាលចរាចរណ៍អះអាងថា មិនកើតមានបញ្ហាធំដុំគួរឲ្យព្រួយបារម្ភនោះទេ។
ប្រធានមន្ទីរទេសចរណ៍ ខេត្តព្រះសីហនុ លោក នូ សុផល មានប្រសាសន៍នៅថ្ងៃសៅរ៍ ទី២១ ខែកុម្ភៈ ថា កំណើនភ្ញៀវទេសចរជាតិ និងអន្តរជាតិ ចូលមកទស្សនាខេត្តព្រះសីហនុ ក្នុងរយៈពេល ៣ថ្ងៃ នៃពិធីបុណ្យចូលឆ្នាំចិន-វៀតណាម បានកើនជិត ៣០ភាគរយ បើធៀបឆ្នាំ២០១៤។ លោកបន្តថា គិតចាប់ពីថ្ងៃទី១៨ ដល់ថ្ងៃទី២០ ខែកុម្ភៈ មានភ្ញៀវទេសចរចំនួនជិត ៦ម៉ឺន ៣ពាន់នាក់ (៦២.៩៧៦) គឺកើនឡើងជិត ៣០ភាគរយ។ ក្នុងនោះភ្ញៀវទេសចរជាតិ មានចំនួនជាង ៥ម៉ឺន ៦ពាន់នាក់ (៥៦.០៦០) និងភ្ញៀវអន្តរជាតិមានជិត ៧ពាន់នាក់ (៦.៩១៦) កើនជិត ១២ភាគរយ។
លោកបន្តថា ឆ្នាំនេះភ្ញៀវទេសចរទាំងជាតិ និងអន្តរជាតិ គេនិយមទៅទស្សនាដីកោះ មានកោះរ៉ុង ជាដើម ដោយក្នុងមួយថ្ងៃៗ មានចំនួនរាប់ពាន់នាក់៖ «»។
ទន្ទឹមការកើនឡើងនៃចំនួនភ្ញៀវទេសចរចូលមកទស្សនាខេត្តព្រះសីហនុ លោក នូ សុផល បញ្ជាក់ថា ក៏នៅមានបញ្ហាដំឡើងតម្លៃសេវាស្នាក់នៅរបស់ម្ចាស់សណ្ឋាគារ ឬផ្ទះសំណាក់ជាដើម មានតម្លៃខ្ពស់ គឺកើនគុណនឹង២។
លោកមានជំនឿថា កំណើនភ្ញៀវទេសចរទាំងជាតិ និងអន្តរជាតិ អាចនឹងកើនឡើងថែមទៀតនៅថ្ងៃអនាគត បើម្ចាស់បម្រើសេវាកម្មទេសចរណ៍បានកំណត់តម្លៃសេវាស្នាក់នៅ ឬអាហារហូបចុកឲ្យមានតម្លៃថេរទៅតាមការណែនាំរបស់សាលាខេត្ត ឬមន្ទីរទេសចរណ៍៖ «»។
ទាក់ទិនបញ្ហានេះ លោកវរសេនីយ៍ឯក អ៊ី សុខា ស្នងការរងនគរបាលខេត្តព្រះសីហនុ និងជាប្រធានការិយាល័យកណ្តាលនគរបាលសណ្ដាប់ធ្នាប់សាធារណៈ មានប្រសាសន៍ថា បុណ្យចូលឆ្នាំចិន-វៀតណាម ៣ថ្ងៃ នៅខេត្តព្រះសីហនុ មិនមានគ្រោះថ្នាក់ចរាចរណ៍នាំឲ្យបាត់បង់អាយុជីវិតមនុស្សទេ។ លោកថា គ្រោះថ្នាកចរាចរណ៍បានកើតឡើងចំនួន ៣ករណី និងមានមនុស្សរងរបួសចំនួន ២នាក់។
ចំណែកបញ្ហាស្ទះចរាចរណ៍ក៏មិនមានធំដុំដែរ ទោះបីចំនួនភ្ញៀវទេសចរមានចំនួនច្រើនបែបណាក្តី ព្រោះមន្ត្រីនគរបាលចរាចរណ៍ ឬកម្លាំងកងរាជអាវុធហត្ថជាដើម បានដាក់ពង្រាយនៅតាមផ្លូវកែង ពិសេសផ្លូវមានមនុស្សឆ្លងកាត់ច្រើន មានទីផ្សារ និងតំបន់ឆ្នេរមានភ្ញៀវនិយមទៅទស្សនាជាដើម៖ «»។
បញ្ហានេះដែរ សម្រាប់អាជីវករលក់ម្ហូបអាហារ នៅតាមភោជនីយដ្ឋានភាគច្រើន នាខេត្តព្រះសីហនុ បានបង្ហាញអារម្មណ៍រីករាយនៅពេលមានអតិថិជន ឬភ្ញៀវចូលទទួលទានអាហារនៅក្នុងហាងរបស់ពួកគេពេញៗហាង។
ម្ចាស់ភោជនីយដ្ឋានមួយកន្លែងមានទីតាំងនៅម្តុំកែងរ៉ារទេះភ្លើង ជិតកំពង់ផែខេត្តព្រះសីហនុ បានប្រាប់វិទ្យុអាស៊ីសេរីថា បុណ្យចូលឆ្នាំចិន-វៀតណាម ឆ្នាំនេះ ក្នុង១ថ្ងៃៗ មានភ្ញៀវកុម្ម៉ង់បាយភ្លៅមាន់ចៀនទទួលទានជិត ១ពាន់ចាន។ ចំនួននេះមិនទាន់គិតពីការកុម្ម៉ង់គុយទាវ ឬបាយមុខម្ហូបផ្សេងៗទៀតនោះទេ។ ម្ចាស់ហាងរូបនេះថ្លែងថា តម្លៃម្ហូបអាហារពួកគេលក់ក្នុងតម្លៃដូចថ្ងៃធម្មតា គឺមិនដំឡើងតម្លៃទេ ទោះជាថ្ងៃបុណ្យទានបែបណាក្តី។
ត្រង់ចំណុចនេះ លោក នូ សុផល ប្រធានមន្ទីរទេសចរណ៍ខេត្តព្រះសីហនុ បញ្ជាក់ថា នឹងមានកិច្ចប្រជុំរវាងថ្នាក់ដឹកនាំសាលាខេត្តសហការជាមួយមន្ត្រីមន្ទីរទេសចរណ៍ និងវិស័យឯកជន ដើម្បីពង្រឹងតម្លៃសេវាផ្សេងៗជូនភ្ញៀវទេសចរឲ្យបានសមរម្យ ដើម្បីជាការទាក់ទាញចំនួនភ្ញៀវទេសចរឲ្យចូលមកទស្សនាខេត្តទេសចរណ៍មួយនេះបានច្រើនថែមទៀតនៅថ្ងៃអនាគត៕
No comments:
Post a Comment