សាក្សីនៅសាលាក្ដីខ្មែរក្រហម ជម្រាបអង្គជំនុំជម្រះសាលាដំបូងនៅថ្ងៃទី៤ កុម្ភៈ ថា អតីតតួកុនពីសង្គមចាស់ ២រូប ត្រូវពួកខ្មែរក្រហមសម្លាប់នៅគុក "ក្រាំងតាចាន់" ក្នុងស្រុកត្រាំកក់ ខេត្តតាកែវ។
Actor Nop Nem
សាក្សីថ្មីឈ្មោះ សយ សែន ដែលជាអតីតអ្នកទោសវ័យក្មេងមួយរូប នៅគុក "ក្រាំងតាចាន់" ផ្ដល់សក្ខីកម្មដល់អង្គជំនុំជម្រះថា លោកឃើញគេយកអតីតតួកុនពីសង្គមចាស់ឈ្មោះ ណុប ណែម និង គីម ណូវ៉ា ទៅសម្លាប់នៅគុកក្រាំងតាចាន់នោះ៖ «ឧទាហរណ៍ដូច គីម ណូវ៉ា ណុប ណែម អ៊ីចឹង ខ្ញុំបានស្គាល់ដោយសារប្រធានមន្ទីរគាត់អ្នកប្រាប់ខ្ញុំ។ គាត់ហ្នឹងហើយ ណុប ណែម តួកុនពីមុនមក។ ដល់ហើយ យកប្ដីទៅសម្លាប់ទៅ គាត់នៅញ៉េះញ៉ោះជាមួយប្រពន្ធ ណុប ណែម ហ្នឹង។ ខ្ញុំនៅធ្វើបោសសំរាមអីក្បែរគាត់ហ្នឹង គាត់នៅញ៉េះញ៉ោះឆឹកនាយឆឹកអាយ ឆឹកថ្ពាល់ គីម ណូវ៉ា ហើយកូនចេះតែសួរថា “ប៉ាទៅដល់ណាយូរម្ល៉េះម៉ាក់?” គាត់ថា ប៉ាហ្អែងមកដល់ឥឡូវហើយៗ។ ស្រាប់តែយកទៅសម្លាប់មួយសន្ទុះហើយ បកមកវិញមកយកប្រពន្ធមួយគ្រួសារគ្នាហ្នឹងទៅ។ ជួបប្ដីជួបប្រពន្ធ។ គាត់យកទៅទាំងអស់។ គីម ណូវ៉ា ខ្ញុំឃើញជាក់ស្ដែងនឹងភ្នែកតែម្ដង។ សម្លាប់ប្រហែលជាម៉ោង ៤ល្ងាច»។
Actress Kim Nova
សាក្សីរូបនេះ ឱ្យដឹងទៀតថា អ្នកទោសដែលជាប្រជាជនថ្មី ឬមានឋានៈខ្ពស់ដូចជាមន្ត្រីរដ្ឋការ នាយទាហាន ឬតួកុននេះ គេច្រើនតែសម្លាប់ភ្លាមៗ។ រីឯប្រជាជនមូលដ្ឋានអាចនៅជាប់ឃុំយូរ។ លោកបន្តថា ប្រធានគុកឈ្មោះ តាឆេន ទុកជីវិតឱ្យលោករស់ ក៏ព្រោះតែលោកនៅក្មេង និងមិនដឹងរឿងអី ហើយ តាឆេន ក៏នៅរស់នៅឡើយ នៅស្រុកអន្លង់វែងសព្វថ្ងៃ។
លោក សយ សែន ថ្លែងថា ជាប់គុក ក្រាំងតាចាន់ នោះ ពីឆ្នាំ១៩៧៤ រហូតដល់ថ្ងៃរបបខ្មែរក្រហមដួលរលំនៅឆ្នាំ១៩៧៩។ នៅទីនោះ លោកក៏ធ្លាប់ឃើញគេសម្លាប់កុមារវះយកប្រមាត់ដែរ។ ការផ្ដល់សក្ខីកម្មរបស់លោក សយ សែន នឹងធ្វើបន្តទៀតនៅថ្ងៃព្រហស្បតិ៍ ទី៥ កុម្ភៈ៕
3 comments:
រូបតួស្រីនេះមិនមែន គិម ណូវា ទេ
ប្រាកដមិនមែនគីម ណូវ៉ាឡើយ៕
This actress looks like Virak Dara from On euy Srey On.
Post a Comment