ដោយ៖ ពៅ មេត្តា | ថ្ងៃពុធ ទី4 មិនា 2015 |
ស្តាប់សំឡេង៖ | ចម្លងទុក |
រូបថតពីwww.cpp.org.kh
លោកនាយករដ្ឋមន្ត្រី ហ៊ុន សែន ដែលមានអាយុ៦៣ឆ្នាំគិតត្រឹមឆ្នាំ២០១៥នេះ ថ្លែងថា លោកសង្ឃឹមអាចរស់នៅបាន៣០ឆ្នាំទៅមុខទៀត។ លោក ហ៊ុន សែន ក៏ត្រូវគេគត់សម្គាល់ថា ជាមេដឹកនាំដែលកាន់អំណាចយូរលំដាប់លេខ៦ ក្នុងចំណោមមេដឹកនាំដែលកាន់អំណាចយូរបំផុតលើពិភពលោក។
ទោះជាលោក ហ៊ុន សែន អះអាងកាលពីថ្ងៃទី០៣ខែកុម្ភៈថា លោកអាចរស់នៅបាន៣០ឆ្នាំទៀត ឬរស់នៅដល់អាយុ៩០ឆ្នាំក៏ដោយ តែលោកថា នឹងមិនធ្វើជានាយករដ្ឋមន្ត្រីដល់អាយុ៩០ឆ្នាំទេ។ ការប្រកាសនេះគឺផ្ទុយពីការលើកឡើងកាលពី១០ឆ្នាំមុន ដែលលោក ហ៊ុន សែន អះអាងថា លោកនឹងបន្តធ្វើជានាយករដ្ឋមន្ត្រីរហូតដល់អាយុ៩០ឆ្នាំ ដរាបណាប្រជាពលរដ្ឋនៅតែត្រូវការ។
ការប្រកាសនឿយហត់ក្នុងតំណែងជានាយករដ្ឋមន្ត្រីរបស់លោក ហ៊ុន សែន ដែលបានដឹកនាំប្រទេសជាង៣០ឆ្នាំមកនេះ ធ្វើឡើងបន្ទាប់ពីគណបក្សរបស់លោក បានបាត់បង់សំឡេងគាំទ្រពីប្រជាពលរដ្ឋចំនួន២២អាសនៈក្នុងពេលបោះឆ្នោតអាណត្តិទី៥។
ពេលលោក ហ៊ុន សែន ប្រកាសពីគម្រោងឈប់ធ្វើនាយករដ្ឋមន្ត្រីនេះ ក៏មានការចោទសួរថា តើអនាគតរបស់គណបក្សប្រជាជនកម្ពុជាទៅជាយ៉ាងណា? មានការកើនឡើងប្រជាប្រិយភាព ឬ កាន់តែថយចុះប្រជាប្រិយភាព?
ប្រធានផ្នែកទំនាក់ទំនងនយោបាយ និង សន្តិសុខនៃវិទ្យាស្ថានទំនាក់ទំនងអន្តរជាតិលោក ឯម សុវណ្ណារ៉ា លើកឡើងថា អ្នកនយោបាយនៅស្រុកខ្មែរ ព្យាយាមផ្សព្វផ្សាយបុគ្គលឲ្យប្រជាពលរដ្ឋស្រលាញ់ នឹងបោះឆ្នោតឲ្យ ជាជាងការផ្សព្វផ្សាយពីគោលនយោបាយ។ លោកបន្តថា ពលរដ្ឋស្គាល់លោក ហ៊ុន សែន ច្រើនជាងស្គាល់បក្ស ដូច្នេះបើដូរលោក ហ៊ុន សែនចេញនោះ ប្រជាប្រិយភាពបក្សនឹងកាន់តែថយចុះថែមទៀត។ លោកមានប្រសាសន៍ថា «ទោះបីជាគណបក្សប្រជាជនរៀបចំបានការផ្ទេរអំណាច ឬក៏សមាសភាពថ្មីហ្នឹងបានល្អយ៉ាងម៉េចក៏ដោយ ក៏អ្នកថ្មីហ្នឹងមិនអាចរក្សាអំណាចដូចដែលគាត់ធ្វើបានដែរ ព្រោះគាត់ធ្វើយូរឆ្នាំ សមទ្ធិផលរបស់លោកវាច្រើន ក៏ប៉ុន្តែអ្នកថ្មីមិនអាចប្រៀបជាមួយគាត់បានទេ»។
មន្ត្រីនៅក្នុងជួរគណបក្សប្រជាជនកម្ពុជាតែងតែលើកឡើងឈ្មោះ និង គុណសម្បត្តិរបស់លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំ ឬ នៅពេលចុះជួបជាមួយប្រជាពលរដ្ឋដូចជាការលើកឡើងថា លោក ហ៊ុន សែន ជាអ្នករំដោះប្រទេសពីសម័យខ្មែរក្រហម ជាបង្រួបបង្រួមជាតិជាដើម។ នៅតាមសាលារៀនជាច្រើន រួមទាំងអគារសាធារណៈមួយចំនួនផង បានដាក់ឈ្មោះលោកនាយករដ្ឋមន្ត្រី ហ៊ុន សែន។
ឈ្មោះរបស់លោកនាយករដ្ឋមន្ត្រីកាន់តែល្បី ហើយឮតាមប្រព័ន្ធផ្សព្វផ្សាយនានា និងនៅតាមបដាតាមដងផ្លូវផង នៅក្នុងពេលឃោសនាបោះឆ្នោតនៅអាណត្តិទី៥កន្លងទៅនេះ។ សារនយោបាយដែលគេគត់សម្គាល់គឺ បើស្រលាញ់ បើអាណិត បើចូលចិត្ត និង នៅតែត្រូវការហ៊ុន សែន គឺបោះឆ្នោតឲ្យគណបក្សប្រជាជនកម្ពុជា។
ប៉ុន្តែលទ្ធផលនៃការបោះឆ្នោតដែលគណបក្សប្រជាជនកម្ពុជាអះអាងថា ជាលទ្ធផលត្រឹមត្រូវ គឺគណបក្សកាន់អំណាចមួយនេះ បានបាត់បង់អាសនៈចំនួន២២។ តាមរយៈសារនយោបាយ និងការបាត់បង់សំឡេងគាំទ្រ នាំឲ្យមានការបកស្រាយថា ម្ចាស់ឆ្នោតប្រហែលកាត់បន្ថយការត្រូវការលោក ហ៊ុន សែន ហើយបានកាត់បន្ថយការបោះឆ្នោតគាំទ្រគណបក្សប្រជាជនកម្ពុជានោះ។
អ្នកវិភាគបញ្ហាសង្គមលោក អ៊ូ វីរៈ លើកឡើងថា ប្រជាប្រិយភាពគណបក្សប្រជាជនកម្ពុជាកើនឡើង ឬ ថយចុះនោះអាស្រ័យលើគោលនយោបាយថ្មីរបស់គណបក្សនេះ។ លោកបន្តថា បច្ចុប្បន្នគណបក្សប្រជាជនកម្ពុជាធ្វើតែនយោបាយអតីតកាលគឺ រំលឹកតែរឿងអតីតកាលដូចជា ការផ្តូលរំលំរបបខ្មែរក្រហម ការបញ្ចប់សង្គ្រាម ឬ ប្រវត្តិនៃការកសាងប្រទេសដែលជួបការលំបាកជាដើម។
លោក អ៊ូ វីរៈ យល់ថា ប្រសិនជាលោកនាយករដ្ឋមន្ត្រី ហ៊ុន សែន សម្រេចធ្វើជាប្រធានគណបក្សជំនួសលោកជា ស៊ីម ហើយរកអ្នកដែលមានសមត្ថភាពមួយរូប ឲ្យទទួលតំណែងជានាយករដ្ឋមន្ត្រីវិញនោះ ប្រហែលអាចស្តារប្រជាប្រិយភាពរបស់គណបក្សប្រជាជនកម្ពុជាឡើងវិញបាន។ លោកមានប្រសាសន៍ថា «ជារឿងល្អ បើសិនជាគាត់សម្រេចឈប់ធ្វើនាយករដ្ឋមន្ត្រី ហើយធ្វើជាប្រធានបក្សនៅក្នុងឆ្នាំ២០១៦ហ្នឹង ហើយប្រកាសឈប់ឈរឈ្មោះទៅ។ អាហ្នឹងគឺគាត់អាចធ្វើជារូបភាពលើសពីអ្នកនយោបាយក្នុងផ្ទៃក្នុងបក្សគាត់ អញ្ចឹងគាត់អាចជាមនុស្សមួយសម្រាប់បង្រួបបង្រួមផ្ទៃក្នុងបក្ស។ អាហ្នឹងគឺចំពោះខ្ញុំគឺល្អសម្រាប់បក្សប្រជាជន ឲ្យគណបក្សប្រជាជនខ្លាំងជាងមុន»។
អង្គការជាតិ និង អន្តរជាតិ បានបង្ហាញរបាយការណ៍ ជាបន្តបន្ទាប់ថា គណបក្សប្រជាជនកម្ពុជាបាត់បង់សំឡេងគាំទ្រពីពលរដ្ឋ ដោយសារបញ្ហាមួយចំនួនដូចជា អំពើពុករលួយចាក់គ្រឹះពីលើដល់ក្រោម បក្ខពួកនិយម ការរំលោភសិទ្ធិដីធ្លី សេវាសាធារណៈខ្សោយ ការបំផ្លាញធនធានធម្មជាតិ កសិផលកសិករមិនមានទីផ្សារលក់ ឬលក់ក្នុងតម្លៃថោកជាដើម។
លទ្ធផលមហាសន្និបាតរបស់គណបក្សប្រជាជនកម្ពុជា កាលពីខែមករាឆ្នាំ២០១៥ មិនបានប្រកាសគាំទ្រលោក ហ៊ុន សែន ជាបេក្ខភាពនាយករដ្ឋមន្ត្រីនៅអាណត្តិក្រោយទៀតនោះទេ គឺផ្ទុយពីពេលកន្លងមកលទ្ធផលសមាជតែងប្រកាសគាំទ្រលោក ហ៊ុន សែន ធ្វើជានាយករដ្ឋមន្ត្រីនៅអាណត្តិក្រោយៗ។
លោក អ៊ូ វីរៈ មើលឃើញថា បញ្ហាធំរបស់គណបក្សប្រជាជនកម្ពុជាបច្ចុប្បន្នគឺ មន្ត្រីចាស់ដែលមានគុណសម្បត្តិនៅក្នុងបក្សក្រាញអំណាច។
អ្នកជំនាញខាងវិទ្យាសាស្ត្រនយោបាយ តែងប្រៀបប្រដូចប្រជាពលរដ្ឋដូចត្រីនៅក្នុងបឹងមួយ ដូច្នេះបើត្រីរស់នៅក្នុងទឹកដដែលៗមានបញ្ហាជាង៣០ឆ្នាំមកនោះ នៅពេលដែលទឹកថ្មីហូរមកដល់នោះ ត្រីប្រាកដជាស្វាគមន៍ទឹកថ្មីនោះហើយ។ ដូចគ្នានេះដែរ អ្នកវិភាគខ្លះក៏បានផ្តល់អនុសាសន៍ថា លោក ហ៊ុន សែន គួរតែផ្តល់ឱកាសជាបេក្ខភាពនាយករដ្ឋមន្ត្រីឲ្យអ្នកថ្មី ដែលមានគំនិតថ្មី រៀបចំគោលនយោបាយថ្មី ទើបអាចស្តារប្រជាប្រិយភាពបក្សបានឡើងវិញ។
លោក អ៊ូ វីរៈ មើលឃើញថា បញ្ហាធំរបស់គណបក្សប្រជាជនកម្ពុជាបច្ចុប្បន្នគឺ មន្ត្រីចាស់ដែលមានគុណសម្បត្តិនៅក្នុងបក្សក្រាញអំណាច។
អ្នកជំនាញខាងវិទ្យាសាស្ត្រនយោបាយ តែងប្រៀបប្រដូចប្រជាពលរដ្ឋដូចត្រីនៅក្នុងបឹងមួយ ដូច្នេះបើត្រីរស់នៅក្នុងទឹកដដែលៗមានបញ្ហាជាង៣០ឆ្នាំមកនោះ នៅពេលដែលទឹកថ្មីហូរមកដល់នោះ ត្រីប្រាកដជាស្វាគមន៍ទឹកថ្មីនោះហើយ។ ដូចគ្នានេះដែរ អ្នកវិភាគខ្លះក៏បានផ្តល់អនុសាសន៍ថា លោក ហ៊ុន សែន គួរតែផ្តល់ឱកាសជាបេក្ខភាពនាយករដ្ឋមន្ត្រីឲ្យអ្នកថ្មី ដែលមានគំនិតថ្មី រៀបចំគោលនយោបាយថ្មី ទើបអាចស្តារប្រជាប្រិយភាពបក្សបានឡើងវិញ។
សូមសរសេរមកលោក ពៅ មេត្តា តាមរយៈ minpov@vodhotnews.com
1 comment:
Yuon can not let him go. It ia very impossible for Yuon to find a replacement like Hun sen. Yuon needs Hun sen to stay until he'll turn 99, Yuon will guaranty full protection.
Post a Comment