Hun Sen: The job as prime minister is not an easy job [If it is not easy, you should give it up a long time ago, but why instead you killed hundreds of your opponents just to cling to the job for the last 35 years?] លោក ហ៊ុន សែន៖តំណែងនាយករដ្ឋមន្រ្តីមិនមែនតំណែងស្រួលនោះទេ​

Khmerization: បើដំណែងនាយករដ្ឋមន្ត្រីមិនស្រួលទេ ហេតុអីក៏ ហ៊ុន សែន នៅតែក្រាញននៀលនឹងដំណែងនេះអស់រយៈ៣៥ឆ្នាំមកហើយ ហើយមិនព្រមចុះចេញសោះ។

ដោយ៖​ ស៊ុន ណារិន​ | ថ្ងៃចន្ទ ទី23 មិនា 2015, 

លោកនាយក​រដ្ឋមន្រ្តី ហ៊ុន សែន កាលពីកន្លង​ទៅ​

លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះថ្លែងថាការងារជានាយករដ្ឋមន្រ្តីដឹកនាំប្រទេសកម្ពុជាមិនមែនជាតំណែងស្រួលនោះទេ ដោយលោកបានរអ៊ូរទាំថាលោកមិនមានពេលគ្រប់គ្រាន់សម្រាប់ទទួលទានអាហារឲ្យបានសមរម្យ។

ក្នុងពិធីសម្ពោធដាក់ឲ្យប្រើប្រាស់សមិទ្ធិផលនានានៅជ្រោយចង្វាខាងកើត ចាប់ពីគល់ស្ពានជ្រោយចង្វារ ដល់សណ្ឋាគារសុខាអូតែល លោកនាយករដ្ឋមន្រ្តីបានថ្លែងបែបរអ៊ូរទាំនឹងការងារប្រចាំថ្ងៃដែលលោកកំពុងបំពេញ ដែលពេលខ្លះលោកត្រូវធ្វើការដល់ថ្ងៃសៅរ៍អាទិត្យ។ លោកបន្តថាឯកសារមួយចំនួនដែលត្រូវរៀបចំនៅថ្ងៃចុងសប្តាហ៍ត្រូវកាត់ចេញ ដើម្បីអាចឲ្យលោករកពេលសម្រាកបាន។

លោកនាយករដ្ឋមន្រ្តីលើកឡើងបែបនេះ ខណៈលោក សុខ គង់ ដែលជាម្ចាស់សណ្ឋាគារប្រេស៊ីដង់សុខាភ្នំពេញ បានអញ្ជើញរូបលោក និងគ្រួសារមកទទួលទានអាហារនៅសណ្ឋាគាររបស់លោក។  លោកបញ្ជាក់ថា«ខ្ញុំមិនមែនជាមនុស្សដែលមានសេរីភាពទេ ក៏ប៉ុន្តែឯកឧត្តម លោកឧកញ៉ា​ សុខ គង់ ក៏បានអញ្ជើញខ្ញុំ និងក្រុមគ្រួសារ ឲ្យមកទទួលទានអាហារ ដើម្បីមើលទេសភាពនៅសណ្ឋាគារនេះ ក៏ប៉ុន្តែមិនទាន់មានពេលទេ រកតែពេលស៊ីបាយនៅហ្នឹងផ្ទះឲ្យចូលមាត់គ្រប់ វាមិនស្រួលផង យូរៗបានម្តងអញ្ចឹងទៅ ។ ប៉ុន្តែអាការងារយូរៗបានម្តងនេះ វាទាមទារឲ្យមានការដកចេញនូវឯកសារ អាថ្ងៃសៅរ៍ និងថ្ងៃអាទិត្យ អត់ឲ្យដាក់»។

លោកនាយករដ្ឋមន្រ្តីបានបញ្ជាក់ថាក្នុងនាមជានាយករដ្ឋមន្រ្តី បើការសម្រេចចិត្តខុស នឹងនាំឲ្យមនុស្សស្លាប់ ដូចដែលកម្ពុជាបានឆ្លងកាត់កន្លងមក។ លោកថ្លែងថា«អញ្ចឹងបានថាអាតំណែងនាយករដ្ឋមន្រ្តី មិនមែនតំណែងស្រួលទេណា ហើយអាតំណែងហ្នឹងដឹកនាំមិនស្រួល នាំគេទៅងាប់»។ លោក ហ៊ុន សែន បានលើកឡើងពីរបបលន់ នល់ និងរបបប៉ុល ពត ចាប់ពីឆ្នាំ១៩៧០ដល់ឆ្នាំ១៩៧៩ ដែលការដឹកនាំបណ្តាលឲ្យមានមនុស្សស្លាប់។ 

គួរកត់សម្គាល់ថា ថ្មីៗនេះ លោកនាយករដ្ឋមន្រ្តី ហ៊ុន សែន បានចូលរួមជាអធិបតីភាពក្នុងកម្មវិធីជាច្រើនដូចជាកម្មវិធីចែកសញ្ញាបត្រដល់និស្សិត កម្មវិធីបិទមហាសន្និបាតបូកសរុបការងាររបស់​ក្រសួង​ស្ថាប័ន​រដ្ឋាភិបាល​ កម្មវិធីជាតិនានា និងជួបជាមួយភ្ញៀវបរទេសជាបន្តបន្ទាប់។ 

លោក ហ៊ុន សែន បានកាន់តំណែងជានាយករដ្ឋមន្រ្តីជាង៣០ឆ្នាំមកហើយ គឺ​ចាប់​តាំងពីឆ្នាំ១៩៨៥។ កន្លង​ទៅ​ លោកធ្លាប់បានប្រកាសជាសាធារណៈថាលោកនឹងមិនធ្វើជានាយករដ្ឋមន្រ្តីដល់អាយុ៩០ឆ្នាំនោះ​ទេ​។

គួររំឮកថា កាលពីខែឧសភា ឆ្នាំ២០១៣ លោកនាយករដ្ឋមន្រ្តី ហ៊ុន សែន បានថ្លែងថាលោកនឹងកាន់អំណាចប្រហែល១៥ឆ្នាំទៀត ដោយសន្យាចុះចេញពីតំណែងក្នុងចន្លោះអាយុលើពាក់កណ្តាល៧០ឆ្នាំ ដូចជាអតីតមេដឹកនាំមួយចំនួននៅវៀតណាម និងប្រទេសចិន។ លោកបានថ្លែងកាលនោះថា«ខ្ញុំនឹងមានអាយុ៦៦ឆ្នាំនៅក្នុងឆ្នាំ ២០១៨ ហើយខ្ញុំនឹងមានអាយុ៧១ឆ្នាំ នៅឆ្នាំ ២០២៣ ហើយដូច្នេះអ្នកត្រូវតែរង់ចាំ។ ខ្ញុំជារដ្ឋមន្រ្តីការបរទេសនៅអាយុ២៧ឆ្នាំ ហើយក្លាយជាឧបនាយករដ្ឋមន្រ្តីនៅក្នុងអាយុ២៩ឆ្នាំ និងក្លាយជានាយករដ្ឋមន្រ្តីនៅអាយុ៣២ឆ្នាំ»៕

សរសេរមកកាន់លោក ស៊ុន ណារិន តាមរយៈsun_narin@vodhotnews.com