ដោយ៖ ញឹម សុខន | ថ្ងៃអង្គារ ទី10 មិនា 2015,
ស្តាប់សំឡេង៖ | ចម្លងទុក |
ក្រុមការងារធ្វើកំណែទម្រង់ច្បាប់បោះឆ្នោតរបស់គណបក្សជាប់ឆ្នោតទាំងពីរ បានព្យាយាមពន្យល់ប្រាប់សាធារណជន និងតំណាងស្ថានទូតនានាថា គ.ជ.ប ថ្មីដែលកើតចេញពីការព្រមព្រៀងគ្នានាពេលនេះ នឹងបំពេញការងាររបស់ខ្លួនដោយឯករាជ្យតាមលទ្ធិប្រជាប្រជាធិបតេយ្យ ។
ការអះអាងរបស់ក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិពីឯករាជភាពរបស់គណៈកម្មាធិការរៀបចំការបោះឆ្នោតថ្មីនេះ បានធ្វើឡើងក្នុងសិក្ខាសាលាមួយនៅមន្ទីររដ្ឋសភា នាថ្ងៃទី៩ ខែមីនា ឆ្នាំ២០១៥ម្សិលមិញ ដែលមានអ្នកចូលរួមមកពីតំណាងកម្មកររោងចក្រ ក្រុមយុវជន សមាគមអង្គការសង្គមស៊ីវិល និងតំណាងស្ថានទូតបរទេសមួយចំនួនផងដែរ ។
ក្នុងសិក្ខាសាលានោះ ក្រុមការងារមួយរូបមកពីគណបក្សសង្គ្រោះជាតិ លោក យ៉ែម បុញ្ញឫទ្ធិ លើកឡើងថាការដាក់ គ.ជ.ប ឲ្យក្លាយជាស្ថាប័នធម្មនុញ្ញភាព ជាកត្តាជំរុញឲ្យស្ថាប័នជាតិមួយនេះមានអំណាចជាងមុន អាចបំពេញការងារដោយឯករាជ្យបាន ។
ម្យ៉ាងទៀតលោក យ៉ែម បុញ្ញឫទ្ធិ អះអាងទៀតថា រូបមន្តបែងចែកអំណាចសមាសភាព គ.ជ.ប ៤-៤-១ ជាយន្តការបង្ហាញពីតុល្យភាពអំណាច ក្នុងស្ថាប័នជាតិមួយនេះ រួមទាំងលក្ខខណ្ឌមួយចំនួនទៀត នៃច្បាប់នេះ ក៏ជាធាតុផ្សំជំរុញឲ្យមានតម្លាភាព នៃដំណើការបោះឆ្នោតទៅថ្ងៃអនាគតដែរ ។ លោកថា «មួយទៀតខុសប្លែកពីមុនគឺទាក់ទងនឹងបញ្ជីឈ្មោះបោះឆ្នោត ចំនុចនេះសំខាន់ណាស់ ព្រោះរាល់លើកយើងនិយាយពីបញ្ជីឈ្មោះបោះឆ្នោត ។ បញ្ជីឈ្មោះបោះឆ្នោតបច្ចុប្បន្នយើងបានឯកភាពគ្នាថាធ្វើបញ្ជីបោះឆ្នោតថ្មី ដោយយកឯកសារគោល ទិន្នន័យពីក្រសួងមហាផ្ទៃ ទៅយកឯកសារគោលពីបញ្ជីដែលមានពី គ.ជ.ប ជាមូលដ្ឋានខ្លះដើម្បីធ្វើការផ្ទៀងផ្ទាត់ ។ ក៏ប៉ុន្តែបញ្ជាក់ជូនអង្គសិក្ខាសាលា គឺយើងធ្វើបញ្ជីឈ្មោះបោះឆ្នោតថ្មីដោយមានចំនុចកំណត់គោលអត្តសញ្ញាណច្បាស់លាស់ គឺស្នាមម្រាមដៃ និងរូបថត ដូច្នេះជារឿងមួយថ្មី ដែលអាចកាត់បន្ថយការចុះឈ្មោះបានច្រើនដង ចំពោះប្រជាពលរដ្ឋមួយរូបៗ យោងទៅលើរូបថត យោងលើស្នាមម្រាមដៃ យើងទប់ស្កាត់ការចុះឈ្មោះបានពីរបីដង បានស្ទើតែ៩៩ភាគរយបាត់ទៅហើយ» ។
ក្រុមការងារមួយរូបទៀតមកពីគណបក្សប្រជាជនកម្ពុជា គឺលោក កើត រិទ្ធិ អះអាងដែរថា ច្បាប់ស្តីពីដំណើរការប្រព្រឹត្តទៅរបស់ គ.ជ.ប ថ្មី បាន ផ្តល់សិទ្ធិអំណាចគ្រប់គ្រាន់ ដល់មន្ត្រីជាន់ខ្ពស់ក្នុងស្ថាប័ននេះ ដូចជាការធានាសន្តិសុខផ្ទាល់ខ្លួន ព្រមទាំងក្រុមគ្រួសារ បើមានការស្នើឡើង និងការធានាមិនឲ្យមន្ត្រីទាំងនោះ ជាប់ពិរុទ្ធភាពផ្នែកព្រហ្មទណ្ឌ អំឡុងបំពេញការងារជាដើម។
លោក កើត រិទ្ធិ ឲ្យដឹងទៀតថា មាត្រា១៣នៃច្បាប់នេះ បានធានាពីសិទ្ធិអំណាច របស់ គ.ជ.ប ដែលមិនអាចឲ្យគណបក្សនយោបាយណា មានអំណាចអាចជ្រែតជ្រែកបាន រួមទាំងលក្ខខណ្ឌច្បាប់មួយចំនួនទៀត ដែលលោកយល់ថា នឹងជំរុញឲ្យ គ.ជ.ប ថ្មីនេះ បំពេញកាតព្វកិច្ចរបស់ខ្លួន ដោយឯករាជ្យ និងយុត្តិធម៌តាមបែបប្រជាធិបតេយ្យ ហើយនឹងគ្មានការជាប់គាំងនយោបាយ។ លោកបញ្ជាក់ថា «ប្រធាន អនុប្រធាន និងសមាជិកគណៈកម្មការជាតិរៀបចំការបោះឆ្នោត ត្រូវទទួលបានការធានាការពារសន្តិសុខផ្ទាល់ខ្លួន និងគ្រួសារក្នុងករណីចាំបាច់តាមសំណូមពររបស់សមីខ្លួន ។ វាក្យខណ្ឌ(កថាខណ្ឌ)បន្ទាប់ក៏ជាការធានាការពារមួយដ៏មានសារៈសំខាន់ក្នុងការអនុវត្តតួនាទី ដោយវាក្យខណ្ឌនេះបានបញ្ជាក់ថា ប្រធាន អនុប្រធាន និងសមាជិកគណៈកម្មការជាតិរៀបចំការបោះឆ្នោតមិនត្រូវទទួលខុសត្រូវខាងបទព្រហ្មទណ្ឌទេ ឬបទរដ្ឋប្បវេនីណាមួយចំពោះការសម្រេចដែលបានធ្វើក្នុងក្របខណ្ឌសមត្ថកិច្ច និងមុខងាររបស់ខ្លួនឡើយ ។ នេះគឺជាការធានានូវឯករាជ្យនៃស្ថាប័ន គ.ជ.ប» ។
នាយកប្រតិបត្តិអង្គការឃ្លាំមើលការបោះឆ្នោតហៅកាត់ថាខុមហ្វ្រែល លោក គល់ បញ្ញា យល់ស្របទៅនឹងការលើកឡើង របស់មន្ត្រីធ្វើកំណែទម្រង់ការបោះឆ្នោត ពីសិទ្ធិអំណាច របស់ គ.ជ.ប ថ្មីនេះ ប៉ុន្តែលោកយល់ថា បក្សកាន់អំណាចនៅតែអាចដាក់សម្ពាធទៅស្ថាប័ននេះបាន ដោយបង្កការលំបាក តាមរយៈការដកប្រាក់ពីរតនាគារជាតិ មកប្រើប្រាស់។ លោកថា «អ៊ីចឹងបានយើងទាមទារថា ពេលបោះឆ្នោត ដូចមានសន្យាក្នុងថវិកាជាតិប៉ុន្មាន អាចឲ្យគាត់១០០ភាគរយហ្មងទៅ មានន័យថា ធ្វើបុរេទានផ្ទេរសាច់ប្រាក់ហ្នឹងឲ្យគាត់តែម្តង១០០ភាគរយ ដើម្បីឲ្យគាត់អាចធ្វើការបាន ។ បើយើងធ្វើការតាមរបៀបសព្វថ្ងៃនេះ គឺស្ថាប័នរដ្ឋហ្នឹងអាចដាក់គំនាបលើ គ.ជ.ប ក្នុងការផ្ទេរលុយសាច់ប្រាក់មក គ.ជ.ប មានការយឺតយ៉ាវ គេពិបាកធ្វើការ ធ្វើឲ្យប៉ះពាល់ដល់ការងារឯករាជ្យហ្នឹងហើយ» ។
យ៉ាងនេះក្តីក្រុមការងារធ្វើកំណែទម្រង់ច្បាប់បោះឆ្នោត របស់គណបក្សទាំងពីរ អះអាងថា គ.ជ.ប ថ្មីនេះ អាចសម្រេចកិច្ចការអ្វីមួយ ដោយការអនុម័តិសំឡេង៥០ភាគរយ+១ ឬ២ភាគ៣ តាមបែបលទ្ធិប្រប្រជាធិបតេយ្យ ហើយដំណើរការប្រព្រឹត្តិទៅរបស់ស្ថាប័ននេះ ក្រោមការតាមដានរស់រដ្ឋសភា និងម្យ៉ាងទៀត រដ្ឋាសភា អាចរំលាយ គ.ជ.ប នេះបាន ក្នុងករណីចាំបាច់ ដើម្បីបើកផ្លូវឲ្យដំណើរការលទ្ធិប្រជាធិបេត្យេ ៕
សូមសរសេរមកលោក ញឹម សុខន តាមរយៈ sokhorn@vodhotnews.com
2 comments:
ម្ដេចសម រង្សី នឺង គិម សុខា ល្ងង់ម្លេ៉ះ ឬក៏ចង់ចូលកាន់អំណាចជាមួយ ហ៊ុន សែន ទើបព្រមបង្កើតច្បាប់ផ្មី ដែលជាច្បាប់មួយអាក្រក់ សម្លាប់ខ្លួន ឯង នឺងប្រជាជាតិ ។
Begin of Drgunzet's comment.
Now CNRP and CPP together defend the same thing. hihihi...lots of hugs.
Are you guys gonna hate CNRP now?
-Drgunzet-
Post a Comment