ស្ដាប់ ឬ ទាញយកសំឡេង
លោក ហង្ស ពុទ្ធា ដែលជាសមាជិកទី៩ របស់ គ.ជ.ប ចេញពីសង្គមស៊ីវិល និងដែលទើបត្រូវបានគេជ្រើសរើសឲ្យធ្វើជាអ្នកនាំពាក្យរបស់ គ.ជ.បថ្មី ផ្ដល់បទសម្ភាសន៍ដល់វិទ្យុអាស៊ីសេរី នៅថ្ងៃទី២៤ ខែមេសា ឆ្នាំ២០១៥។
RFA/Yeang Socheametta
ប្រទេសជប៉ុន និងសហភាពអឺរ៉ុប នឹងបញ្ជូនអ្នកជំនាញផ្នែកបោះឆ្នោតមកកម្ពុជា នៅខែឧសភា ដើម្បីជួយគណៈកម្មាធិការជាតិរៀបចំការបោះឆ្នោតដែលទើបបង្កើតថ្មី ក្នុងការរៀបចំបញ្ជីឈ្មោះអ្នកបោះឆ្នោតថ្មី។ ការប្រកាសនេះ ធ្វើឡើងនៅពេលដែលគណៈប្រតិភូសហគមន៍អឺរ៉ុប និងជប៉ុន ជួបជាមួយមន្ត្រី គ.ជ.ប នៅរសៀលថ្ងៃទី២៤ មេសា នាទីស្នាក់ការ គ.ជ.ប ក្នុងបរិវេណក្រសួងមហាផ្ទៃ។
នេះ គឺជាជំនួបដំបូងបង្អស់របស់ប្រតិភូសហភាពអឺរ៉ុប និងប្រទេសជប៉ុន ជាមួយសមាជិកគណៈកម្មាធិការជាតិរៀបចំការបោះឆ្នោតទាំង ៩រូប ចាប់តាំងពីពួកគេបានប្រកាសចូលកាន់តំណែងកាលពីថ្ងៃទី១៣ មេសា។
ជំនួបរយៈពេលជិត ២ម៉ោងរវាងមន្ត្រី គ.ជ.ប និងប្រតិភូសហភាពអឺរ៉ុប ដែលដឹកនាំដោយអគ្គរដ្ឋទូតសហភាពអឺរ៉ុប ប្រចាំកម្ពុជា លោក ហ្សង់ ហ្វ្រង់ស្វ័រ កូតាំង (Jean-François Cautain) និងប្រតិភូជប៉ុន ដឹកនាំដោយឯកអគ្គរាជទូតជប៉ុន ប្រចាំកម្ពុជា លោក យូជី កុម៉ាម៉ារុ (Yuji Kumamaru) បានពិភាក្សាលើរឿងរ៉ាវជាច្រើនពាក់ព័ន្ធនឹងការបោះឆ្នោត ជាពិសេសអំពីការរៀបចំបញ្ជីឈ្មោះអ្នកបោះឆ្នោតថ្មី។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ប្រាប់អ្នកកាសែតនៅក្រោយជំនួបនោះថា សហភាពអឺរ៉ុប និងរដ្ឋាភិបាលជប៉ុន នឹងបញ្ជូនអ្នកជំនាញផ្នែកបោះឆ្នោតមកកម្ពុជា នៅខែក្រោយ ដើម្បីសិក្សាអំពីដំណើរការរៀបចំការបោះឆ្នោតជាទូទៅនៅកម្ពុជា។ ប៉ុន្តែ លោក ហង្ស ពុទ្ធា បញ្ជាក់ថា អ្វីដែល គ.ជ.ប ចង់ឲ្យជប៉ុន និងសហភាពអឺរ៉ុប ជួយក្នុងដំណាក់ការដំបូងនោះ គឺអប់រំអ្នកបោះឆ្នោតអំពីច្បាប់ និងនីតិវិធីនានាទាក់ទងនឹងការបោះឆ្នោត និងរៀបចំបញ្ជីឈ្មោះអ្នកបោះឆ្នោតថ្មីសម្រាប់ការបោះឆ្នោតនៅពេលខាងមុខ។ យ៉ាងណាក៏ដោយ លោកបញ្ជាក់ថា អ្វីៗនឹងអាចធ្វើព្រមគ្នាតែម្តង៖ «យើងមិនទាន់កំណត់បានថាចាប់ផ្ដើមនៅពេលណាទេ ប៉ុន្តែអ្វីដែលយើងចាប់ផ្ដើម គឺយើងចាប់ផ្ដើមទាំងអស់តែម្តង ទាំងកំណែទម្រង់នៅក្នុង គ.ជ.ប ក៏ដូចជាកំណែទម្រង់ទៅលើរឿងផ្សេងៗទៀតជាដើម»។
លោក ហង្ស ពុទ្ធា ដែលជាសមាជិកទី៩ របស់ គ.ជ.ប ចេញពីសង្គមស៊ីវិល និងដែលទើបត្រូវបានគេជ្រើសរើសឲ្យធ្វើជាអ្នកនាំពាក្យរបស់ គ.ជ.បថ្មីនេះ បានឲ្យដឹងដែរថា ប្រតិភូសហភាពអឺរ៉ុប និងជប៉ុន បានសម្ដែងការគាំទ្រ គ.ជ.បថ្មី ដែលបានលេចចេញជារូបរាងនៅពេលនេះ។ លោកថា ពួកគេប្ដេជ្ញាសហការជាមួយ គ.ជ.បថ្មីបន្តទៀត។
សហភាពអឺរ៉ុប និងប្រទេសជប៉ុន តែងបានបង្ហាញការគាំទ្រដល់ការកែទម្រង់ការបោះឆ្នោតនៅកម្ពុជា។ កន្លងមក ប្រទេសជប៉ុន បានអះអាងថា នឹងបញ្ជូនអ្នកបច្ចេកទេសផ្នែកបោះឆ្នោតមកកម្ពុជា និងជួយរៀបចំបញ្ជីឈ្មោះអ្នកបោះឆ្នោតថ្មីទៀតផង។ ចំណែកសហភាពអឺរ៉ុប វិញ ក៏បានស្វាគមន៍ចំពោះការជ្រើសតាំងសមាជិក គ.ជ.បថ្មី។ សហភាពអឺរ៉ុប ចាត់ទុកថា ការបង្កើត គ.ជ.បថ្មីនេះ គឺជាការអភិវឌ្ឍថ្មីមួយ ហើយសហភាពអឺរ៉ុប ត្រៀមខ្លួនជាស្រេច ដើម្បីនាំយកជំនួយដល់ប្រទេសកម្ពុជា ដើម្បីធានាថា ការបោះឆ្នោតក្នុងពេលអនាគតមានតម្លាភាព និងអាចទុកចិត្តបាន។
លោក ហ្សង់ ហ្វ្រង់ស្វ័រ កូតាំង មានប្រសាសន៍នៅក្រោយជំនួបនោះថា វាជាជំនួបមួយមានលក្ខណៈវិជ្ជមាន ជាពិសេសដើម្បីឲ្យបានដឹងថា តើ គ.ជ.បថ្មីនេះ នឹងមានគម្រោងការធ្វើអ្វីជាបន្តបន្ទាប់ទៀត ហើយថា តើសហភាពអឺរ៉ុប និងប្រទេសជប៉ុន អាចចូលរួមចំណែកជួយកម្ពុជា បានយ៉ាងម៉េចខ្លះក្នុងការកែទម្រង់ការបោះឆ្នោត។
ទាក់ទងនឹងការងារបច្ចុប្បន្នរបស់ គ.ជ.ប វិញ លោក ហង្ស ពុទ្ធា អះអាងថា អ្វីដែល គ.ជ.ប កំពុងធ្វើក្នុងដំណាក់ការដំបូងពេលនេះ គឺពិនិត្យលើព្រះរាជក្រឹត្យស្ដីពីក្របខ័ណ្ឌមន្ត្រីរាជការរបស់ គ.ជ.ប និងជំហានបន្ទាប់ គឺការពិនិត្យទៅលើការរៀបចំអគ្គលេខាធិការដ្ឋាន គ.ជ.ប ព្រមទាំងបទបញ្ជាផ្ទៃក្នុងផងដែរ៕
No comments:
Post a Comment