ដោយ អ៊ុំ រង្សី
2015-05-27 rfa
ក្រុមសង្គមស៊ីវិលបង្ហាញថា អំពើពុករលួយកំពុងវាយលុកទៅលើអាជីវកម្មសហគ្រាសធុនតូច និងមធ្យមនៅប្រទេសកម្ពុជា។ ករណីនេះ គឺជាបញ្ហាប្រឈម និងជាផលប៉ះពាល់ដល់កំណើនសេដ្ឋកិច្ច និងការអភិវឌ្ឍនៅកម្ពុជា មិនអាចប្រព្រឹត្តទៅដោយឈរលើគោលការណ៍សមធម៌ សុចរិតភាព និងដើម្បីធានាឲ្យបាននូវផលប្រយោជន៍ដល់ពលរដ្ឋគ្រប់រូបនោះទេ។
ការពុំសូវយល់ដឹងពីសុចរិតភាពនៃអាជីវកម្ម កង្វះព័ត៌មានជុំវិញដំណើរការអាជីវកម្ម ការចំណាយក្រៅផ្លូវការ ភាពធូររលុងនៃវិធានការច្បាប់ ការសូកប៉ាន់ដើម្បីទ្រទ្រង់អាជីវកម្មរបស់ខ្លួន ព្រមទាំងបញ្ហាមួយចំនួនទៀត គឺជាអំពើពុករលួយដែលផ្តល់ផលអវិជ្ជមានដល់អាជីវកម្មកម្ពុជា។
ថ្លែងនៅក្នុងសន្និសីទថ្នាក់ជាតិស្ដីពីសុចរិតភាពធុរកិច្ចនៅរាជធានីភ្នំពេញ ប្រធានក្រុមប្រឹក្សាភិបាលនៃអង្គការតម្លាភាពកម្ពុជា លោក ឱក សេរីសោភក្តិ៍ មានប្រសាសន៍ថា អំពើពុករលួយបានគំរាមកំហែងដល់អាជីវកម្មនៅកម្ពុជា ទាំងខ្នាតតូច និងមធ្យម ហើយវាមិនត្រឹមតែប៉ះពាល់ដល់កំណើនសេដ្ឋកិច្ចជាតិនោះទេ វាក៏ប៉ះពាល់ដល់អនាគតប្រទេសជាតិផងដែរ។
លោកបន្តថា អំពើពុករលួយទៅលើអាជីវកម្មកម្ពុជា ធ្វើឲ្យមានចំណាយខ្ពស់ធ្វើឲ្យមានការប្រកួតប្រជែងធ្វើឲ្យវិនិយោគិនបាក់ទឹកចិត្ត ព្រមទាំងបង្កើតឲ្យមានការប្រព្រឹត្តខុសច្បាប់ជាដើម។ លោកថា ដើម្បីដោះស្រាយបញ្ហានេះលោកស្នើឲ្យរឹតបន្តឹងប្រព័ន្ធតុលាការ៖ «ខ្ញុំគិតថា យើងត្រូវតែធ្វើកំណែទម្រង់ប្រព័ន្ធតុលាការ ដើម្បីឲ្យមានភាពត្រជាក់ ព្រោះថា អ្នករកស៊ី និងអ្នកវិនិយោគដែលមកប្រទេសយើង គេនៅមានភាពខ្លាចញញើតចំពោះប្រព័ន្ធតុលាការ បញ្ហានេះហើយជាកត្តារារាំងដល់អាជីវកម្មកម្ពុជា»។
ស្របជាមួយគ្នានេះ ប្រធានផ្នែកសហប្រតិបត្តិការអភិវឌ្ឍ ស្ថានទូតប្រទេសស៊ុយអែត នៅកម្ពុជា អ្នកស្រី គ្រីស្ទីណា ឃូណែល (Kristina Kuhnel) បានចាត់ទុកថា អាជីវកម្មទាំងខ្នាតតូច និងមធ្យមនៅកម្ពុជា គឺវាបានផ្ដល់ប្រយោជន៍ដល់កំណើនសេដ្ឋកិច្ចកម្ពុជា។
អ្នកស្រីបានឲ្យដឹងទៀតថា កម្ពុជាជាប់លេខ ១៣៥ ក្នុងចំណោមប្រទេស ១៨៩ ស្ដីពីសន្ទុះនៃការធ្វើអាជីវកម្មរបស់ធនាគារពិភពលោក ដែលបង្ហាញថា កម្ពុជាជាប្រទេសដែលមានសំណូកនៅក្នុងដំណើរការអាជីវកម្មខ្ពស់ ហើយអ្នកស្រីស្នើឲ្យមានវិធានការបន្ទាន់លើបញ្ហានេះ។
សង្គមស៊ីវិលទាំងជាតិ និងអន្តរជាតិ ដែលបានចូលរួមសន្និសីទថ្នាក់ជាតិនោះ បានផ្ដល់អនុសាសន៍ថា ប្រសិនបើប្រទេសកម្ពុជា កាត់បន្ថយអំពើពុករលួយនៅក្នុងអាជីវកម្ម កម្ពុជានឹងទទួលបានចំណូលមធ្យមនៅក្នុងឆ្នាំ២០២២ និងឆ្នាំ២០២៣ ខាងមុខនេះ។
ឆ្លើយតបនឹងបញ្ហាអំពើពុករលួយនៅក្នុងដំណើរការអាជីវកម្មនេះ ប្រធាននាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្ម លោក ឱម តារាឫទ្ធិ មានប្រសាសន៍ថា កន្លងមកបញ្ហាអំពើពុករលួយកើតឡើងដោយសារតែម្ចាស់អាជីវកម្ម ឬម្ចាស់ក្រុមហ៊ុនបើកអាជីវកម្មមិនបានទៅស្វែងរកសេវាពីក្រសួងពាណិជ្ជកម្មដោយផ្ទាល់នោះទេ។
លោកថា ក្រសួងពាណិជ្ជកម្ម បានបង្កើតការចុះបញ្ជីអាជីវកម្មតាមប្រព័ន្ធអនឡាញ នឹងដាក់ឲ្យដំណើរការឲ្យប្រើប្រាស់នៅចុះឆ្នាំ២០១៥ ខាងមុខ ហើយក្រសួងពាណិជ្ជកម្មជឿថា ប្រព័ន្ធនេះ នឹងបង្កភាពងាយស្រួលដល់ម្ចាស់អាជីវកម្ម និងកាត់បន្ថយអំពើពុករលួយ៖ «ក្រសួងពាណិជ្ជកម្មជឿថា ការចុះបញ្ជីអាជីវកម្មតាមប្រព័ន្ធអនឡាញ នឹងកាត់បន្ថយអំពើពុករលួយ ព្រោះថា អ្នកធ្វើអាជីវកម្មគ្រាន់តែនៅផ្ទះរបស់ខ្លួន ហើយចូលទៅកាន់គេហទំព័រក្រសួង មិនបានចំណាយពេលវេលាមកកាន់ក្រសួងពាណិជ្ជកម្ម ផ្ទាល់នោះ និងមិនចាំបាច់ចំណាយផ្សេងទៀត ចំណុចនេះហើយជាផលចំណេញដល់អ្នកធ្វើអាជីវកម្មនៅកម្ពុជា»។
របាយការណ៍ដែលបានផ្សព្វផ្សាយនៅថ្ងៃទី២៧ ខែឧសភា ដែលចេញដោយអង្គការតម្លាភាពកម្ពុជា បង្ហាញថា «ប្រាក់ទឹកតែ» ជាតថភាពមួយមិនអាចជៀសរួចបានសម្រាប់សហគ្រាសធុនតូច និងមធ្យមនៅកម្ពុជា។ របាយការណ៍ក៏បានបង្ហាញទៀតថា សហគ្រាសធុនតូច និងមធ្យមជាច្រើនចូលចិត្តប្រតិបត្តិការក្រៅផ្លូវការ ហើយក្នុងចំណោមសហគ្រាសចំនួន ១០០ ដែលត្រូវស្ទង់មតិ មានតែ ៦១ នៃអ្នកដែលត្រូវសម្ភាសន៍តែប៉ុណ្ណោះបានចុះបញ្ជីជាមួយក្រសួងពាណិជ្ជកម្ម ឬមន្ទីរពាណិជ្ជកម្មខេត្ត។ លើសពីនេះ របាយការណ៍បានបន្តថា ពួកគេបានបង់សេវាក្រៅផ្លូវការនៅពេលចុះបញ្ជីនៅក្រសួងពាណិជ្ជកម្ម ឬនាយកដ្ឋានពន្ធដារ នៅពេលដែលមានអធិការកិច្ច។ លើសពីនេះអ្នកឆ្លើយតបភាគច្រើនបានលើកឡើងថា មន្ត្រីរាជការទទួលប្រាក់សំណូក ពីព្រោះពួកគេទទួលបានប្រាក់ខែទាប៕
No comments:
Post a Comment