ដោយ សូត សុខប្រាថ្នា
2015-05-09
2015-05-09
 |
សហគមន៍ជនជាតិដើមភាគតិចកួយ បំបួសដើមឈើក្នុងគោលបំណងរក្សាការពារព្រៃឈើ ក្នុងខេត្តព្រះវិហារ នៅថ្ងៃទី១៤ ខែមីនា ឆ្នាំ២០១៤។
Photo: RFA
|
ព្រះសង្ឃ និងយុវជនជាច្រើនក្រុម គ្រោងនឹងចុះទៅបំបួសដើមឈើនៅតំបន់ព្រៃឡង់ ដើម្បីបញ្ចៀសការកាប់បំផ្លាញពីសំណាក់ក្រុមឈ្មួញ។ ក្រៅពីនេះ ក្រុមដដែលនឹងដើរល្បាតពិនិត្យពីស្ថានភាពព្រៃឡង់ ដែលកំពុងគំរាមកំហែងដោយការកាប់បំផ្លាញយ៉ាងធ្ងន់ធ្ងរនៅពេលបច្ចុប្បន្ន។
ចំណែកមន្ត្រីជំនាញរដ្ឋបាលព្រៃឈើថា ពួកគេរីករាយនឹងសហការ ប្រសិនបើសកម្មភាពនោះមានបេសកកម្មត្រឹមត្រូវ និងមិនបង្កការលំបាកដល់អាជ្ញាធរ។
យុវជនជាច្រើនក្រុម នឹងធ្វើដំណើរទៅខេត្តមួយចំនួនដែលជាប់តំបន់ព្រៃឡង់ ដូចជា ខេត្តក្រចេះ ស្ទឹងត្រែង កំពង់ធំ និងខេត្តព្រះវិហារ ដើម្បីបំពេញបេសកកម្មបំបួសដើមឈើ និងពិនិត្យស្ថានភាពរបស់ក្រុមហ៊ុនសម្បទានសេដ្ឋកិច្ចនៅតំបន់ទាំងនោះ។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ដែលនឹងដឹកនាំក្រុមយុវជនមួយក្រុមរួមមានទាំងព្រះសង្ឃប្រមាណ ៥០អង្គនិងនាក់ ទៅតំបន់ព្រៃឡង់ក្នុងខេត្តកំពង់ធំ ឲ្យដឹងថា គោលបំណងសំខាន់ គឺដើម្បីនាំយុវជនឲ្យពួកគាត់កាន់តែយល់ច្បាស់ពីតំបន់ព្រៃដ៏ធំធេងមួយនេះ។ លើសពីនេះទៀត ដើម្បីអង្កេតពីសកម្មភាពក្រុមហ៊ុនសម្បទានមួយចំនួននៅទីនោះ ដែលបានធ្វើសកម្មភាពរបស់ខ្លួនមិនបានត្រឹមត្រូវនាពេលកន្លងមក៖ «ការបំបួសព្រៃឈើវាគ្រាន់តែជាផ្នែកតូចមួយ ព្រោះយើងជានិស្សិតហ្នឹង គឺអស់សង្ឃឹម ឬក៏មិនមានជម្រើសណាទៀត ដើម្បីការពារព្រៃទេ។ យើងមានតែវិធីសាស្ត្របំបួសព្រៃឈើ ដើម្បីបង្ហាញមហាជនដើម្បីបង្ហាញប្រជាពលរដ្ឋខ្មែរមើលឃើញថា ព្រៃឈើមានសារសំខាន់ណាស់សម្រាប់ជីវិត»។
ក្រុមនិស្សិត នឹងធ្វើដំណើរទៅតំបន់ព្រៃឡង់ក្នុងខេត្តកំពង់ធំ មានចំនួនពីរក្រុម ដោយមួយក្រុមត្រូវស្នាក់នៅចំនួន ២ថ្ងៃ និងមួយក្រុមទៀតត្រូវស្នាក់នៅរយៈពេល ៤ថ្ងៃ គឺចាប់ផ្ដើមពីថ្ងៃទី១៣ ឧសភា ទៅ។ ដោយឡែកមួយក្រុមទៀត នឹងត្រូវទៅសិក្សាស្រាវជ្រាវនៅតំបន់ព្រៃឡង់ក្នុងខេត្តក្រចេះ និងស្ទឹងត្រែង។ ប្រធានសមាគមនិស្សិតបញ្ញវន្តខ្មែរដដែលយល់ថា ប្រសិនមិនមានការយកចិត្តទុកដាក់ចំពោះព្រៃឈើនៅតំបន់មួយនេះទេ មិនយូរឡើយ ព្រៃឡង់នឹងអាចវិនាសជាក់ជាមិនខាន។
ទាក់ទងនឹងគម្រោងចុះទៅតំបន់ព្រៃឡង់របស់យុវជននោះ នាយខណ្ឌរដ្ឋបាលព្រៃឈើខេត្តកំពង់ធំ លោក តឹប ញាតា មានប្រសាសន៍ថា ខាងអាជ្ញាធររីករាយសហការជាមួយ ប្រសិនបើការចុះទៅរបស់ពួកគាត់មានកំណត់គោលបំណងច្បាស់លាស់ និងមិនបង្កការលំបាកដល់អាជ្ញាធរទេនោះ៖ «បើគាត់សុំច្បាប់សុំទម្លាប់អីត្រឹមត្រូវ ដោយបង្ហាញពីគោលដៅទស្សនទានច្បាស់លាស់ ហើយមានឧត្តមអភិបាលគាំទ្រហើយ អានោះគឺជារឿងជួយវិញ»។
លោកបញ្ជាក់ថា មន្ត្រីជំនាញ និងអាជ្ញាធរ តែងបង្ក្រាបករណីបទល្មើសព្រៃឈើនៅតំបន់ព្រៃឡង់ក្នុងខេត្តកំពង់ធំ ជានិច្ច។ ដោយឡែកនៅត្រីមាសទី១ ឆ្នាំ២០១៥ គឺអាជ្ញាធរបង្ក្រាបបានជាង ៤០ករណីក្នុងមួយខែៗ រាប់បញ្ចូលទាំងការកាប់រុករានដីព្រៃ និងការស្តុកឈើទុកក្នុងព្រៃខុសច្បាប់ ជាដើម។
ការចាប់អារម្មណ៍តំបន់ព្រៃឡង់ពីសំណាក់ក្រុមយុវជនពេលនេះ ត្រូវបានអ្នកសិក្សាបញ្ហាសង្គម លោកបណ្ឌិត កែម ឡី យល់ថា យុវជននឹងយល់កាន់តែច្បាស់ពីប្រព័ន្ធជីវចម្រុះនៅតំបន់ព្រៃឡង់ និងសក្ដានុពលនៃតំបន់មួយនេះ។ បន្ថែមពីនេះទៀត ព័ត៌មានអំពីព្រៃឡង់ នឹងធ្វើឲ្យសាធារណជនទាំងក្នុងប្រទេស និងក្រៅប្រទេស កាន់តែចាប់អារម្មណ៍ និងចូលរួមទប់ស្កាត់ការបំផ្លាញព្រៃឈើទាំងអស់គ្នា។ ម្យ៉ាងទៀត សកម្មភាពនេះ គឺជាការដាស់ស្មារតីមន្ត្រីរាជរដ្ឋាភិបាល ឲ្យមានវិធានការបន្ថែមទៀតទៅលើកិច្ចការពារព្រៃឈើ ដែលនៅសេសសល់ចុងក្រោយនេះ៖ «ខ្ញុំគិតថា អាចឲ្យយុវជនដឹង ហើយប្រាប់ទៅអាជ្ញាធរបានដឹងថា តំបន់នេះ គឺជាតំបន់ព្រៃឡង់មានសក្ដានុពលតំបន់ទេសចរណ៍ ឬអេកូទេសចរណ៍សម្បើមណាស់»។
លោកបន្ថែមថា ព្រៃឈើនៅតំបន់ព្រៃឡង់ អាចនឹងឈានទៅរកស្ថានភាពវិនាស ប្រសិនបើក្រុមហ៊ុនទទួលបានដីសម្បទានសេដ្ឋកិច្ចពីរាជរដ្ឋាភិបាលជាង ៥០ក្រុមហ៊ុនចាប់ដំណើរការ។ ជាងនេះទៀត ការផ្ដល់ដីសម្បទានសង្គមកិច្ចឲ្យក្រុមហ៊ុនដែលមានភាពមិនច្បាស់លាស់ផង រួមនឹងកិច្ចសហការគ្នាដើម្បីកាប់បំផ្លាញព្រៃឈើជាប្រព័ន្ធនៅក្នុងប្រទេសកម្ពុជា ផង៕
No comments:
Post a Comment