ដោយ ដែន អយុធ្យា
2015-05-08
 |
ព្រះតេជព្រះគុណ គៀត ច័ន្ទធុច ព្រះចៅអធិការវត្តលើ ថ្លែងក្នុងសន្និសីទសារព័ត៌មាន កាលពីថ្ងៃទី២៥ ខែមេសា ឆ្នាំ២០១៥។
 RFA/Den Ayuthyea |
បញ្ហានេះប្រជាពុទ្ធបរិស័ទ និងព្រះសង្ឃអង្គខ្លះដែលត្រូវព្រះសង្ឃ គៀត ច័ន្ទធុច បណ្ដេញចេញពីវត្តហាក់មិនមានជំនឿទៅលើដំណោះស្រាយ របស់សភាសង្ឃនោះទេ ព្រោះកន្លងមកស្ថាប័នពាក់ព័ន្ធ នានា មិនហ៊ានចាត់ការ ព្រះចៅអធិការអង្គនេះទេ ហើយបានបន្តដំឡើងបុណ្យស័ក្ដិថែមទៀត។
មន្ត្រីនាំពាក្យក្រសួងធម្មការ និងសាសនា លោក សេង សុមុនី មានប្រសាសន៍ថា មកដល់ថ្ងៃសុក្រ ទី៨ ខែឧសភា មន្ត្រីគណៈសង្ឃនាយក ឬសភាសង្ឃ នៅមិនទាន់ឆ្លើយតបជាលាយលក្ខអក្សរ ទៅលើបទចោទ ព្រះចៅអធិការវត្តជោតញាណ ហៅវត្តលើ ព្រះនាម គៀត ច័ន្ទធុច មានទីតាំងក្នុងសង្កាត់លេខ ១ ក្រុងនិងខេត្តព្រះសីហនុ ថាបានប្រព្រឹត្តខុសវិន័យសង្ឃ ឬព្រះពុទ្ធសាសនានោះទេ។ ប៉ុន្តែសម្ដេច ព្រះពោធិវង្ស អំ លឹមហេង បានទូរស័ព្ទប្រាប់លោកថា កំពុងបើកកិច្ចប្រជុំជាបន្តបន្ទាប់ទៅលើសំណុំរឿង ព្រះសង្ឃ គៀត ច័ន្ទធុច ដោយយកទុកដាក់។
លោក សេង សុមុនី បានបន្តថា ពេលនេះ ខាងមន្ត្រីគណៈសង្ឃនាយកកំពុងស្នើសុំយោបល់ ឬឯកសារបញ្ជាក់បន្ថែមទៀត ពីអភិបាលខេត្តព្រះសីហនុ លោក ឈិត សុខុន និងមន្ត្រីពាក់ព័ន្ធខេត្តនេះ ដើម្បីបានជាមូលដ្ឋាន ឬភស្តុតាងទៅលើបទចោទទាំងនោះ ដើម្បីផ្ដល់យុត្តិធម៌ដល់ភាគីពាក់ព័ន្ធឲ្យបានត្រឹមត្រូវ មុននឹងចេញលទ្ធផលសម្រេចជាផ្លូវការ បែបណា ទៅលើព្រះចៅអធិការវត្តលើ គៀត ច័ន្ទធុច។
ទោះយ៉ាងណា មន្ត្រីនាំពាក្យក្រសួងធម្មការ ឲ្យដឹងថា មកដល់ពេលនេះ ក្រសួងនៅមិនទាន់ទទួលបានឯកសារបន្ថែមពី លោក ឈិត សុខុន អភិបាលខេត្តព្រះសីហនុនៅឡើយទេ ព្រោះលោកកំពុងជាប់រវល់ចូលរួមកម្មវិធី របស់កាកបាទក្រហម ក្នុងប៉ុន្មានថ្ងៃមកនេះ។
មានតួនាទីជាព្រះមេគណ ខេត្តព្រះសីហនុ និងជាទីប្រឹក្សាផ្ទាល់សម្ដេចព្រះសង្ឃរាជ ទេព វង្ស ផងនោះ ព្រះចៅអធិការវត្តលើ គៀត ច័ន្ទធុច ត្រូវមន្ត្រីរាជការ ប្រជាពុទ្ធបរិស័ទ តាជីយាយជី និងព្រះសង្ឃអង្គខ្លះគង់ក្នុងវត្តនេះ ចោទថា បានឆាន់ស្រាជាប្រចាំ និងធ្លាប់ឃើញមានអាវុធខ្លីជាប់ខ្លួន ហើយបានធ្វើឲ្យផ្ទុះអាវុធមួយគ្រាប់ នៅក្នុងកុដិ ឬបណ្ណាល័យសម្ដេចសង្ឃ ជួន ណាត នៅក្នុងបរិវេណវត្តលើ នៅមុនពិធីបុណ្យចូលឆ្នាំៗនេះ។
ព្រះសង្ឃ និងប្រជាពុទ្ធបរិស័ទចោទថា ព្រះមេគណ គៀត ច័ន្ទធុច នៅពេលព្រះអង្គឆាន់ស្រាស្រវឹងជោគជាំម្តងៗ តែងបានរករឿងព្រះសង្ឃ ឬតាជីយាជីជាដើម ហើយបានប្រើថេរៈដីកា ឬពាក្យសម្តីមិនសមរម្យជាអ្នកបួស ឬមានតួនាទីក្នុងស្ថាប័នសង្ឃនោះទេ។
ទោះជាបែបនេះក្ដី ព្រះចៅអធិការវត្តជោតិញាណ ហៅវត្តលើ ព្រះនាម គៀត ច័ន្ធធុច មានថេរៈដីកា ទាំងនៅតាមបទសម្ភាសន៍តាមទូរស័ព្ទ និងក្នុងសន្និសីទកាសែតជាបន្តបន្ទាប់ ដោយបដិសេធថា ព្រះអង្គមិនបានប្រព្រឹត្តិខុសធម៌វិន័យព្រះពុទ្ធសាសនា ឬវិន័យសង្ឃដូចការចោទនោះទេ។
ជាងនេះ ព្រះសង្ឃ គៀត ច័ន្ទធុច ក្នុងបទសម្ភាសន៍ជាមួយវិទ្យុអាស៊ីសេរី បានចាត់ទុកក្រុមអ្នកចោទព្រះអង្គថា មានឆាន់ស្រា និងជាប់ពាក់ព័ន្ធបញ្ហាផ្សេងៗ គឺមានចេតនាបង្ខូចកិត្តិនាមព្រះអង្គ ដោយគ្រាន់តែឮពាក្យចរចាមអារាមតៗគ្នាតែប៉ុណ្ណោះ៖ «គ្រាន់តែជាពាក្យចរចាមអារាមទេ ព្រោះរឿងនេះគ្រាន់តែជាការបរិហារ ឬការចោទប្រកាន់ខ្វះការពិតទេ។ ហើយឆ្នាំនេះ អាត្មាភាពបានរៀបចំពិធីបុណ្យចូលឆ្នាំតាមប្រពៃណី និងមានប្រជាពុទ្ធបរិស័ទចេញចូលធ្វើបុណ្យជាធម្មតា»។
វិទ្យុអាស៊ីសេរី មិនអាចសុំការបំភ្លឺបន្ថែមពី លោក ឈិន សុខុន អភិបាលខេត្តព្រះសីហនុ ជុំវិញបញ្ហា របស់ លោក គៀត ច័ន្ទធុច បានទេ តាមទូរស័ព្ទនៅថ្ងៃទី៨ ខែឧសភា។ ប៉ុន្តែកន្លងមក លោកមានប្រសាសន៍ថា រាល់សេចក្ដីសម្រេចផ្សេងៗ ទាក់ទងបញ្ហា របស់ ព្រះចៅអធិការវត្តលើ គៀត ច័ន្ទធុច ត្រូវរងការចាំសេចក្ដីសម្រេចពី លោក មិន ឃិន រដ្ឋមន្ត្រីក្រសួងធម្មការ ពិសេសមន្ត្រីគណៈសង្ឃនាយក ឬស្ថាប័នពាក់ព័ន្ធថ្នាក់ជាតិជាអ្នកសម្រេច។ ជាងនេះលោកថា ទៅថ្ងៃអនាគត ព្រះមេគណ ឬព្រះចៅអធិការអង្គនេះ អាចគង់បន្តក្នុងវត្តជោតញាណ ឬវត្តលើជាបន្តទៀត ឬបែបណានោះ គឺវាអាស្រ័យទៅលើសភាសង្ឃ ព្រះសង្ឃ និងប្រជាពុទ្ធបរិស័ទចំណុះជើងវត្ត ខេត្តព្រះសីហនុ ជាអ្នកសម្រេច៖ «បើនិយាយពីវិន័យសង្ឃ គឺសង្ឃខុសធម៌វិន័យ ដូច្នេះខាងខេត្តត្រូវមានលិខិតមួយទៅក្រសួងធម្មការពិនិត្យ។ ប៉ុន្តែរឿងដាក់ទោសទណ្ឌបែបណានោះ គឺត្រូវទុកឲ្យខាងក្រសួងធម្មតា ឬសភាសង្ឃជាអ្នកសម្រេច។ ប៉ុន្តែបញ្ហានេះ បើកាលណាមានទំនាស់មិនប្រក្រតីកើតឡើង គឺព្រះសង្ឃជាប់ពាក់ព័ន្ធ ដែលមានបញ្ហានោះ មិនអាចគង់នៅក្នុងវត្តនេះបានទៀតទេ ហើយបញ្ហានេះ វាអាស្រ័យទៅលើប្រជាពុទ្ធបរិស័ទចំណុះជើងវត្ត យល់ព្រមឲ្យគង់នៅ ឬបែបណា គឺពួកគាត់ជាអ្នកសម្រេច»។
ចំណែក លោក ជួន ណារិន ស្នងការនគរបាលខេត្តព្រះសីហនុ ដែលទើបចូលកាន់តំណែងថ្មី បញ្ជាក់ថា ក្រោយពេលទទួលបានដំណឹង ព្រះសង្ឃ គៀត ច័ន្ធធុច មានប្រើប្រាស់អាវុធ ឬផ្ទុះអាវុធ និងស្រវឹងស្រា នៅមុខពិធីបុណ្យចូលឆ្នាំខ្មែរឆ្នាំនេះ រូបគាត់ក៏បានបញ្ជាមន្ត្រីក្រោមឱវាទចុះពិនិត្យ និងតាមដានសកម្មភាព របស់ព្រះចៅអធិការ គៀត ចន្ទធុច ប៉ុន្តែរកមិនឃើញកំហុសឆ្គងដូចការចោទទេ។ យ៉ាងណា លោកថា បើរកឃើញកំហុសឆ្គងដូចការចោទមែននោះ កម្លាំងសមត្ថកិច្ចលោក នឹងចាត់វិធានការតាមផ្លូវច្បាប់៖ «នៅក្នុងវត្តនោះ គ្រាន់តែខ្ញុំទទួលបានភ្លាម ខ្ញុំក៏បានចាត់លោក ភុល ភស្តា អធិការក្រុងព្រះសីហនុ ឲ្យចុះទៅពិនិត្យជាក់ស្ដែង។ ប៉ុន្តែឃើញមានចាក់ធុងបាសនៅមុនបុណ្យចូលឆ្នាំ ហើយមិនឃើញមានការប្រើអាវុធដូចការចោទនោះទេ»។
ទោះយ៉ាងណាព្រះសង្ឃគង់នៅវត្តលើ និងប្រជាពុទ្ធបរិស័ទមួយចំនួន បានអះអាងថា សកម្មភាពប្រព្រឹត្តិខុសធម៌វិន័យព្រះពុទ្ធសាសនា ឬវិន័យសង្ឃ ផ្ដើមដោយចៅអធិការវត្ត គៀត ច័ន្ទធុច មិនមែនទើបកើតឡើងថ្មីៗនេះទេ ប៉ុន្តែបានកើតមានជាយូរឆ្នាំមកហើយៗ គ្មានស្ថាប័នពាក់ព័ន្ធណាមួយចេញមុខឈឺឆ្អាលនោះទេ។
ប្រជាពលរដ្ឋ និងព្រះសង្ឃគង់នៅវត្តលើ មានថេរៈដីកាថា បញ្ហារបស់ព្រះចៅអធិការ គៀត ច័ន្ធធុច បានកើតឡើងជាថ្មីទៀត នៅមុនពិធីបុណ្យចូលឆ្នាំថ្មីឆ្នាំនេះ តែប៉ុន្មានថ្ងៃ ដោយសារចៅអធិការអង្គនេះ បានឆាន់ស្រាស្រវឹងជោកជាំ ២ទៅ ៣ថ្ងៃជាប់ៗគ្នា និងបានបណ្ដេញព្រះសង្ឃមួយអង្គ ព្រះនាម ជួន វុទ្ធី មិនឲ្យគង់ក្នុងវត្តនេះរហូតមកដល់ពេលនេះ។
ព្រះភិក្ខុ នាម ជួន វុទ្ធី ដែលត្រូវចៅអធិការវត្តលើ គៀត ច័ន្ធធុច បណ្ដេញចេញពីវត្តមុនពិធីបុណ្យចូលឆ្នាំថ្មីឆ្នាំនេះ មានថេរៈដីកា ដោយស្នើដល់លោក មិន ឃិន រដ្ឋមន្ត្រីក្រសួងធម្មការ ពិសេសមន្ត្រីគណៈសង្ឃនាយកត្រូវចុះអង្កេត ឬទប់ស្កាត់ចំពោះទង្វើ និងសកម្មភាព របស់ព្រះចៅអធិការវត្តលើ គៀត ច័ន្ធធុច ឲ្យបានត្រឹមត្រូវ ដើម្បីកុំប៉ះពាល់ធ្ងន់ធ្ងរដល់វិស័យព្រះពុទ្ធសាសនា។
ព្រះភិក្ខុអង្គនេះ ត្រូវបានប្រជាពុទ្ធបរិស័ទ និងព្រះសង្ឃគង់ក្នុងវត្តនេះ ទទួលស្គាល់ថា ជាព្រះសង្ឃមួយអង្គ ចេះធម៌វិន័យជ្រៅជ្រះ និងបានសម្ដែងព្រះធម្មទេសនាតាមប្រព័ន្ធផ្សព្វផ្សាយស្ទើរជារៀងរាល់ថ្ងៃ តាមប៉ុស្តិ៍វិទ្យុនាខេត្តព្រះសីហនុ មុនត្រូវព្រះសង្ឃ គៀត ច័ន្ទធុច បណ្ដេញចេញពីវត្ត។
ព្រះភិក្ខុ ជួន វុទ្ធី មានថេរៈដីកា សំណូមពរដល់ក្រសួងធម្មការ ឬស្ថាប័នសភាសង្ឃ ជួយជ្រោមជ្រែងទីអារាមជាព្រះកិត្តិនាម របស់ សម្ដេចសង្ឃ ជួន ណាត និងអតីតព្រះមហាក្សត្រ សម្ដេចព្រះនរោត្តម សីហនុ កសាងមកនេះ ឲ្យមានកេរ្តិ៍ឈ្មោះល្អឡើងវិញ៖ «សំខាន់មិនមែនមានតែប្រជាពលរដ្ឋរស់នៅខេត្តព្រះសីហនុទេ ដែលដឹងឮលើករណីព្រះសង្ឃ គៀត ច័ន្ទធុច ប្រព្រឹត្តិខុសធម៌វិន័យសង្ឃ។ សូម្បីប្រជាពុទ្ធបរិស័ទមកពីខេត្តដទៃទៀត ក៏បានដឹងឮរឿងហ្នឹងដែរ ព្រោះ បានប្រព្រឹត្តិដូចនេះជាយូរឆ្នាំមកហើយ។ ប៉ុន្តែមិនមានស្ថាប័ន ឬបុគ្គលណាមួយហ៊ានប៉ះពាល់សង្ឃអង្គនេះទេ ព្រោះបានអួតអាងយកខ្នងបង្អែកអ្នកធំនេះ អ្នកធំនោះ មកនិយាយបង្ហាញធ្វើជាខ្នង ឬជារនាំងជាដើម»។
បញ្ហានេះដែរ លោក កែម ឡី អ្នកស្រាវជ្រាវ និងឃ្លាំមើលការអភិវឌ្ឍសង្គម ហាក់មិនមានទំនុកចិត្តទោសលើការវិនិច្ឆ័យកំហុសឆ្គងព្រះសង្ឃ ប្រព្រឹត្តិខុសធម៌វិន័យផ្សេងៗ របស់ មន្ត្រីសភាសង្ឃ ឬមន្ត្រីគណៈសង្ឃនាយកនោះទេ ព្រោះយល់ថាមិនឯករាជ្យ មានបក្សពួកនិយម និងមានជាប់ពាក់ព័ន្ធគណបក្សនយោបាយបក្សកាន់អំណាចផង។
អ្នកវិភាគរូបនេះសង្កេតឃើញថា វិន័យសង្ឃនាពេលបច្ចុប្បន្ននេះ មានភាពធូរលុង ហើយបញ្ហានេះ តែងឃើញប្រព័ន្ធផ្សព្វផ្សាយមួយចំនួន បានចុះផ្សាយ ព្រះសង្ឃអង្គខ្លះ ឬព្រះចៅអធិការអង្គខ្លះ មានចិញ្ចឹមស្រីស្នេហ៍ក្មេងៗ ឬមានលបលួចដោះស្បង់ចីវរ ចេញដើរផឹកស៊ីច្រៀងរាំ នៅតាមក្លឹបរាត្រីជាដើម។
ងាកមកករណីបទចោទព្រះចៅអធិការវត្តលើ ព្រះនាម គៀត ច័ន្ទធុច ប្រព្រឹត្តិខុសធម៌វិន័យវិញ លោក កែម ឡី បានស្នើឲ្យស្ថាប័នពាក់ព័ន្ធ ត្រូវបើកការស៊ើបអង្កេត ឲ្យបានត្រឹមត្រូវ ដើម្បីយុត្តិធម៌ ពិតប្រាកដ ដល់ភាគីពាក់ព័ន្ធទាំងពីរស្ងប់អារម្មណ៍៖ «យើងអត់អាចប្រើតែប្រព័ន្ធពីថ្នាក់លើ ដើម្បីចាត់ការទៅលើបញ្ហា របស់ព្រះសង្ឃនោះទេ។ ពីដើមយើងអនុញ្ញាតឲ្យមានការចូលរួមពីប្រជាពលរដ្ឋជាភ្នែកជាច្រមុះ ដើម្បីលើកតម្កើងព្រះពុទ្ធសាសនា។ តាមដាននិងសម្រេចខ្លះដោយពលរដ្ឋនៅជុំវិញវត្ត ឬនៅជុំវិញស្រុកភូមិ ជាជាងយកដាវអាជ្ញាសឹកពីលើ ដើម្បីធ្វើការគាបសង្កត់ដល់ព្រះសង្ឃ»។
ទាក់ទិនបញ្ហានេះ អតីតអ្នកតំណាងរាស្ត្រគណបក្សកំពុងកាន់អំណាច ប្រជាពលរដ្ឋ មន្ត្រីរាជការនៅតាមមន្ទីរ ស្ថាប័នរដ្ឋភាគច្រើន នាខេត្តព្រះសីហនុ ពិសេសមន្ត្រីចូលនិវត្តន៍ សុទ្ធតែបានដឹងឮថា ព្រះសង្ឃ គៀត ច័ន្ទធុច ពិតជាបានញៀនស្រាជាប្រចាំកន្លងមក។ ហើយករណីនេះ ពួកគេក៏ចង់ឃើញថ្នាក់ដឹកនាំក្រសួងធម្មការ សភាសង្ឃ ឬស្ថាប័នថ្នាក់ជាតិ បើកការស៊ើបអង្កេតដ៏ឯករាជ្យមួយ ទៅលើបញ្ហា របស់ព្រះចៅអធិការវត្តជោតញាណ ហៅវត្តលើ ព្រះនាម គៀត ច័ន្ទធុច ដើម្បីកុំឲ្យប៉ះពាល់ធ្ងន់ធ្ងរដល់វិស័យព្រះពុទ្ធសាសនានាថែមទៀតនាថ្ងៃអនាគត៕
No comments:
Post a Comment