ដោយ ម៉ម មុនីរតន៍
2015-05-28
 |
លោក យឹម សុវណ្ណ មន្ត្រីនាំពាក្យ និងជាប្រធានក្រុមការងារគណបក្សសង្គ្រោះជាតិ ប្រចាំមណ្ឌលភ្នំពេញ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៥ ខែវិច្ឆិកា ឆ្នាំ២០១៣។
 Photo: RFA |
មន្ត្រីនាំពាក្យរបស់គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា ពេលវេលានៃការជ្រើសរើសអគ្គលេខាធិការ គ.ជ.បថ្មីនេះ ប្រហែលជាត្រូវការចន្លោះពី ២ខែទៅ ៣ខែទៀត។ ភាពយឺតយ៉ាវនេះ ត្រូវបាន លោក ហង្ស ពុទ្ធា ថ្លែងថា ដោយសារ គ.ជ.ប ត្រូវចាំព្រះរាជក្រឹត្យដែលកំណត់អំពីមុខងារនៃក្របខ័ណ្ឌរបស់ស្ថាប័ន គ.ជ.ប ជាមុនសិន។
ពាក់ព័ន្ធរឿងនេះ មន្ត្រីគណបក្សប្រឆាំងចាត់ទុកថា ប្រសិនបើកិច្ចការនេះនៅតែពន្យារពេលទៀត ហើយបន្តប្រើប្រាស់អគ្គលេខាធិការនៃ គ.ជ.បចាស់ នឹងនាំឲ្យមានមន្ទិលសង្ស័យ និងបាត់បង់ជំនឿចិត្តពីឯករាជ្យរបស់ គ.ជ.ប។
ការអះអាងពីពេលវេលារបស់មន្ត្រីនាំពាក្យ គ.ជ.ប ដែលថានឹងមានការរុះរើសមាសភាពនៃអគ្គលេខាធិការ និងអគ្គលេខាធិការរង គ.ជ.បថ្មីនេះ ធ្វើឡើងក្នុងរយៈពេល ៤ថ្ងៃបន្ទាប់ពីមានការថ្លែងរិះគន់ជាសាធារណៈពីមន្ត្រីគណបក្សប្រឆាំងដែលចំអកថា គ.ជ.ប ហាក់មានភាពអល់អែកក្នុងការពន្លឿននីតិវិធី ជុំវិញការជ្រើសរើសសមាសភាព ឬអ្នកដែលត្រូវមកអង្គុយកៅអីរបស់អគ្គលេខាធិការថ្មីនេះ។
លោក យឹម សុវណ្ណ មន្ត្រីនាំពាក្យ និងជាប្រធានក្រុមការងារគណបក្សសង្គ្រោះជាតិ ប្រចាំមណ្ឌលភ្នំពេញ ឲ្យដឹងកាលពីថ្ងៃទី២៤ ឧសភា ថា លោកហាក់មិនយល់ពីនីតិវិធីរបស់ គ.ជ.ប នៅឡើយទេ ដែលរហូតមកដល់ពេលនេះទៅហើយ នៅមិនទាន់អាចជ្រើសរើសអគ្គលេខាធិការនៃស្ថាប័ននេះបាននៅឡើយទៀត។ លោកថ្លែងបែបចំអកនៅចំពោះមុខអ្នកគាំទ្រប្រមាណជាង ១ពាន់នាក់ ក្នុងខណ្ឌសែនសុខ ថា នេះពុំមែនមានន័យថា លោកលូកដៃចូលកិច្ចការផ្ទៃក្នុងរបស់ គ.ជ.ប នោះទេ ក៏ប៉ុន្តែការពន្យារពេលនេះ តើអាចនឹងរក្សាទុកអគ្គលេខាធិការចាស់បន្តទៀត ឬយ៉ាងណានោះទេ? ជុំវិញរឿងនេះ លោក យឹម សុវណ្ណ ទទូចសុំឲ្យ គ.ជ.ប ពន្លឿននីតិវិធីក្នុងការរុះរើសមាសភាព គ.ជ.ប ឲ្យបានឆាប់ ដើម្បីជម្រះមន្ទិលសង្ស័យអំពីភាពមិនឯករាជ្យ នៃការបំពេញមុខងាររបស់អគ្គលេខាធិការនេះ។ លោកបន្តថា «សូមអំពាវនាវកុំពន្យារពេលយូរពេក ប្រយ័ត្នភ្លេចខ្លួន។ ឥតជ្រៀតជ្រែកកិច្ចការផ្ទៃក្នុង គ.ជ.ប ទេ ប៉ុន្តែជូនយោបល់ក្នុងនាមជាអ្នកតំណាងរាស្ត្រមួយរូប។ កុំអូសបន្លាយតទៅណា ប្រញាប់ប្រញាល់ឡើង។ តិចថាសម្ងំៗភ្លេចខ្លួនរបូតអគ្គលេខាធិការ គ.ជ.ប ដដែល អៃយ៉ា»។
ឆ្លើយតបរឿងនេះ លោក ហង្ស ពុទ្ធា មន្ត្រីនាំពាក្យ គ.ជ.បថ្មី បញ្ជាក់ថា គណៈកម្មាធិការជាតិរៀបចំការបោះឆ្នោតប្រហែលជាត្រូវការពេលវេលាបន្ថែមទៀត មិនលើសពី ៣ខែ ក្នុងការរុះរើអគ្គលេខាធិការនៃ គ.ជ.ប ទេ ក៏ប៉ុន្តែលោកហាក់រារែកក្នុងការអត្ថាធិប្បាយពីភាពប្រាកដនិយមនៃពេលវេលាជាក់លាក់នេះ ដោយហេតុថា នីតិវិធីត្រូវរង់ចាំព្រះរាជ្យក្រឹត្យជាមុនសិន។ លោកបន្តថា «ពេលវេលាប្រហែលជាពិបាកនិយាយតិចដែរ ដោយសារមិនមែនជាស្ថាប័ន គ.ជ.ប ខ្លួនឯងជាអ្នកសម្រេចចុងក្រោយ។ អ៊ីចឹងខ្ញុំពិបាកនិយាយថា ប្រហែលជារយៈពេលប៉ុន្មាន ប៉ុន្តែខ្ញុំអាចនិយាយបានប៉ុណ្ណេះថា មិនលើសពី ២ ទៅ ៣ខែទេបាទ»។
បើតាម លោក ហង្ស ពុទ្ធា បច្ចុប្បន្ន ព្រះរាជ្យក្រឹត្យស្ដីពីការកំណត់មុខងារក្របខ័ណ្ឌដោយឡែកមន្ត្រីរាជការ គ.ជ.ប បានពិគ្រោះយោបល់រួចហើយជាមួយក្រសួងមុខងារសាធារណៈ នៅតែត្រូវបញ្ជូនបន្តដើម្បីសុំព្រះរាជទានពីព្រះមហាក្សត្រ ដើម្បីឡាយព្រះហស្តលេខាប៉ុណ្ណោះ។ ទន្ទឹមនឹងនេះ គ.ជ.ប ក៏កំពុងពិគ្រោះយោបល់ និងពិភាក្សាអំពីអនុក្រឹត្យមួយផ្សេងទៀត ជុំវិញអគ្គលេខាធិការដ្ឋាន និងបទបញ្ជាផ្ទៃក្នុងរបស់ គ.ជ.ប។ ប៉ុន្តែ ដើម្បីឲ្យអនុក្រឹត្យនេះចេញរួច គឺត្រូវរង់ចាំព្រះរាជ្យក្រឹត្យជាមុនសិន។ បើទោះជាអគ្គលេខាធិការថ្មី មិនទាន់អាចដំណើរការទៅបានក៏ដោយ ក៏ លោក ហង្ស ពុទ្ធា អះអាងថា នៅខែសីហា ខាងមុខនេះ ដំណើរការចុះឈ្មោះសាកល្បងនឹងត្រូវចាប់ផ្ដើម។ ដោយឡែកការចុះឈ្មោះជាផ្លូវការ នឹងត្រូវចាប់អនុវត្តចន្លោះពីខែមីនា និងខែឧសភា ដើមឆ្នាំ២០១៦។
យ៉ាងណាក៏ដោយ អគ្គលេខាធិការនៃ គ.ជ.ប នេះ ជាចាំបាច់ត្រូវតែមាន ព្រោះមុខងារមួយនេះ គឺជាសេនាធិការដ៏មានសក្ដានុពលរបស់ គ.ជ.ប ហើយអនុលោមទៅតាមច្បាប់ថែមទៀតផង សម្រាប់ប្រតិបត្តិការលើកិច្ចការបោះឆ្នោត។
ច្បាប់ស្ដីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតថ្មី ចែងថា អគ្គលេខាធិការ និងអគ្គលេខាធិការរងនៃ គ.ជ.ប ត្រូវតែងតាំងដោយព្រះរាជក្រឹត្យតាមសំណើរបស់ប្រធានគណៈកម្មាធិការជាតិរៀបចំការបោះឆ្នោត បន្ទាប់ពីសមាជិក គ.ជ.ប ទាំង ៩រូប បានបោះឆ្នោតជ្រើសរើសដោយសំឡេងភាគច្រើនដាច់ខាត។
បើទោះជាយ៉ាងនេះក៏ដោយចុះ លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) ហាក់ស្ទាក់ស្ទើរក្នុងការអត្ថាធិប្បាយជុំវិញភាពយឺតយ៉ាវនៃការផ្តល់សេចក្តីទុកចិត្ត សម្រាប់ការជ្រើសរើសអគ្គលេខាធិការនៃ គ.ជ.បថ្មីនេះ ក៏ប៉ុន្តែលោកយល់ឃើញថា ប្រសិនបើ គ.ជ.ប ធ្វើកិច្ចការផ្សេង ដូចជាការចុះបញ្ជីឈ្មោះបោះឆ្នោត និងកិច្ចការដទៃទៀតមុនការជ្រើសរើសសមាសភាពអគ្គលេខាធិការនេះ ហើយបន្តរក្សាតួនាទីអគ្គលេខាធិការចាស់ នឹងបង្កើតជាមន្ទិលសង្ស័យ និងការជឿទុកចិត្តពីគ្រប់ភាគីពាក់ព័ន្ធ អំពីភាពត្រឹមត្រូវរបស់ គ.ជ.ប។ លោកបន្តថា «គ.ជ.ប ត្រូវតែគិតគូរដែរអំពីទស្សនៈយល់ឃើញជំនឿទៅអគ្គលេខាធិការ និងអគ្គលេខាធិការរងហ្នឹងដែរ ហើយបើសិនជាធ្វើឲ្យប្រជាពលរដ្ឋមានជំនឿទុកចិត្តទៅលើក្រុមថ្មីទេ អាចដែរ។ គេមើលពីដំណើររឿងនៃអគ្គលេខាធិការ និងអគ្គលេខាធិការរង ព្រោះដោយសារអី ដោយសារគេដឹងថា ការងារអគ្គលេខាធិការ និងអគ្គលេខាធិការរងរបស់ គ.ជ.ប មានឥទ្ធិពលខ្លាំងណាស់។ ពីមុនមកមានសំឡេងខ្លាំងណាស់នៅក្នុងកិច្ចការគ្រប់គ្រង គ.ជ.ប នេះ»។
លោក ហង្ស ពុទ្ធា ពន្យល់ថា សម្រាប់ការចុះឈ្មោះបោះឆ្នោតលើកនេះ គឺអ្នកដែលរស់នៅ និងប្រកបការងារកន្លែងណា គឺអាចចុះឈ្មោះបោះឆ្នោតនៅទីតាំងដែលខ្លួនរស់នៅបាន ដោយមិនតម្រូវឲ្យទៅចុះឈ្មោះនៅទីកន្លែងកំណើតទេ។ ក្រៅពីនេះ ច្បាប់បោះឆ្នោតថ្មីក៏កំណត់ផាកពិន័យអ្នកបោះឆ្នោតដែរចន្លោះពី ១ម៉ឺន ទៅ ១០ម៉ឺនរៀល បើរកឃើញថា មានចេតនាចុះឈ្មោះបោះឆ្នោតច្រើនទីតាំង និងច្រើនដង៕
No comments:
Post a Comment