ដោយ រដ្ឋា វិសាល
2015-05-27 rfa
2015-05-27 rfa
មន្ត្រីជាន់ខ្ពស់រាជរដ្ឋាភិបាលទទួលបន្ទុកកិច្ចការព្រំដែនប្រទេសកម្ពុជា អំពាវនាវឲ្យអាជ្ញាធរខេត្តរតនគិរី យកចិត្តទុកដាក់ឲ្យបានហ្មត់ចត់ការពារកុំឲ្យវៀតណាម រំលោភមកលើអធិបតេយ្យភាពដែនដីនៅតំបន់ខ្សែបន្ទាត់ព្រំដែន។ ការអំពាវនាវនេះធ្វើឡើងបន្ទាប់ពីភាគីវៀតណាម បានជីកស្រះចំនួន ៥ នៅតំបន់ស ដែលជាខ្សែបន្ទាត់ព្រំដែនហាមឃាត់នៃភាគីទាំងពីរប្រទេស។
ប្រធានគណៈកម្មាធិការចម្រុះទទួលបន្ទុកកិច្ចការព្រំដែនកម្ពុជា លោក វ៉ា គឹមហុង នៅថ្ងៃទី២៧ ខែឧសភា ចាត់ទុកករណីភាគីវៀតណាម ជីកស្រះនៅតំបន់ហាមឃាត់នៃខ្សែបន្ទាត់ព្រំដែនខេត្តយ៉ាឡាយ ប្រទេសវៀតណាម ជាប់នឹងខេត្តរតនគិរី ថាជាការធ្វេសប្រហែសរបស់តម្រួតព្រំដែន និងមន្ត្រីមូលដ្ឋាននៅតំបន់នោះ។
លោកថ្លែងកត់សំគាល់ថា រហូតមកទល់នឹងពេលនេះ អាជ្ញាធរខេត្តរតនគិរី និងក្រសួងមហាផ្ទៃ មិនទាន់បានផ្ដល់របាយការណ៍ស្ដីពីការជីកស្រះរបស់ភាគីវៀតណាម នៅតំបន់សនោះទេ ក៏ប៉ុន្តែលោកថា មន្ត្រីមូលដ្ឋានត្រូវតែដោះស្រាយបញ្ហានេះជាមួយភាគីអាជ្ញាធរវៀតណាម ដែលមានព្រំដែនខេត្តជាប់គ្នា៖ «តំបន់ហ្នឹងមិនទាន់បានដោះស្រាយនៅឡើយទេ ដូច្នេះយើងត្រូវរក្សាស្ថានភាពដដែលអត់មានត្រូវធ្វើអ្វីទេ។ ម្យ៉ាងទៀតសូមអំពាវនាវឲ្យអាជ្ញាធរដែនដីយើងសូមឲ្យមានការប្រុងប្រយ័ត្នខ្លះកើតដល់ទៅ ៥ស្រះ ហើយមិនមែនមួយថ្ងៃមួយយប់ជីកកើតទេ។ ឲ្យវាឈ្លាសវៃផងបើខាងគេហានចូលមួយជំហានគេមកដល់ភ្លាម យើងគេជីកដល់ ៥ស្រះទើបភ្ញាក់រលឹក»។
យ៉ាងហោចណាស់ក៏មានស្រះទឹកចំនួន ៥ មានទំហំ ៥០ម៉ែត្រក្រឡា និងជម្រៅ ៥ម៉ែត្រដែលត្រូវបានជនជាតិវៀតណាម ជីករួចរាល់នៅក្នុងតំបន់ហាមឃាត់ ស្ថិតនៅក្បែរប៉ុស្តិ៍តម្រួតការពារព្រំដែនភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ជាប់នឹងប្រទេសវៀតណាម ស្ថិតក្នុងភូមិសេសៅ ឃុំយ៉ាណាង ស្រុកដាក់កឺ ខេត្តយ៉ាឡាយ។
ប្រធាននគរបាលប៉ុស្តិ៍ការពារព្រំដែនភូមិឡំ លោក រចំ ជីប ទទួលស្គាល់ថា ស្រះដែលភាគីវៀតណាម ជីកពិតជាឋិតក្នុងតំបន់ដែលភាគីទាំងពីរបានព្រមព្រៀងគ្នាចាត់ទុកជាតំបន់ហាមឃាត់ ក៏ប៉ុន្តែភាគីវៀតណាម មានចេតនារំលោភកិច្ចព្រមព្រៀងនេះ។
លោកបន្តថា ពលរដ្ឋវៀតណាម បានជីកស្រះនេះដោយលួចលាក់ ហើយតម្រួតព្រំដែនល្បាតឃើញទើបប្រញាប់រាយការណ៍ជូនអាជ្ញាធរខេត្ត៖ «ខាងគាត់ចូលចិត្តឆ្លៀតឱកាសពេលកម្លាំងទ័ពយើងដើរល្បាត ឬទទួលគណៈប្រតិភូគឺគេឆ្លៀតលួច។ យើងបានប្រជុំនិយាយគ្នាហើយ គឺក្នុងចំណុចស គីមិនឲ្យភាគីណាមួយកាប់ដាំដុះអ្វីទេ។ ដោយឡែកគាត់និយាយអ៊ីចឹង គាត់ធ្វើ គាត់អត់ជូនដំណឹងអ្វីទាំងអស់»។
បង្គោលព្រំដែនខេត្តរតនគិរី និងខេត្តយ៉ាឡាយ ប្រទេសវៀតណាម ចាប់ពីបង្គោលព្រំដែនលេខ៣១ រហូតដល់បង្គោលព្រំដែនលេខ៣៩ ឋិតក្នុងភាពប្រទាញប្រទង់គ្នាមិនទាន់ឯកភាពបោះតម្រុយបង្គោលព្រំដែននៅឡើយ។ កន្លងទៅនេះ តម្រួតព្រំដែនវៀតណាម បានចូលមកហាមឃាត់មិនឲ្យប្រជាពលរដ្ឋ និងមន្ត្រីការពារព្រំដែនខ្មែរធ្វើស្រែ ឬជីកស្រះយកទឹកស្រោចស្រពដំណាំអ្វីឡើយ។ ផ្ទុយទៅវិញ ភាគីវៀតណាម បានបណ្ដែតបណ្ដោយឲ្យពលរដ្ឋវៀតណាម ចូលមកជីកស្រះនៅតំបន់ហាមឃាត់នេះជាឯកតោភាគី។
ទាក់ទិនករណីនេះ ស្នងការប៉ូលិសខេត្តរតនគិរី លោក ងួន គឿន មានប្រសាសន៍បញ្ជាក់ថា អាជ្ញាធរខេត្តកំពុងដោះស្រាយបញ្ហានេះ ក៏ប៉ុន្តែលោកមិនអធិប្បាយពិស្ដារពីលទ្ធផលនៃដំណោះស្រាយយ៉ាងណានៅឡើយ។
ទោះជាយ៉ាងនេះក៏ដោយ មន្ត្រីសម្របសម្រួលសមាគមអាដហុក (Adhoc) ខេត្តរតនគិរី លោក ឆាយ ធី ចាត់ទុកករណីជីកស្រះក្នុងតំបន់ហាមឃាត់របស់ពលរដ្ឋវៀតណាម ថាជាចេតនាទុច្ចរិតដើម្បីរំលោភយកដីខ្មែរ។ លោកអំពាវនាវឲ្យអាជ្ញាធរពាក់ព័ន្ធប្រញាប់ស្វែងរកដំណោះស្រាយជាមួយភាគីវៀតណាម ឲ្យគោរពកិច្ចព្រមព្រៀងស្ដីពីបញ្ហាព្រំដែននៃប្រទេសទាំងពីរ៖ «ជាយុទ្ធសាស្ត្ររបស់វៀតណាម នៅពេលដែលព្រំដែនកម្ពុជា ឋិតក្នុងការជជែកគ្នា យើងឃើញភាគីវៀតណាម មានចេតនាបោះទីតាំងនៅតំបន់ស ហាមឃាត់បំពានមកលើដែនដីខ្មែរ។ គួរតែមានការពង្រឹងឡើងវិញ កុំយោគយល់បណ្ដែតបណ្ដោយ ឬមានមនោសញ្ចេតនា»។
របាយការណ៍អង្កេតរបស់មន្ត្រីអាដហុក ខេត្តរតនគិរី ឲ្យដឹងថា រហូតមកទល់បច្ចុប្បន្ន ជនជាតិវៀតណាម បានប្រើគ្រប់រូបភាពឆ្លងចូលមកដីខ្មែរ ដូចជាឆ្លងដែនតាមរូបភាពអ្នកទេសចរមកធ្វើការជាកម្មករសំណង់ ឬកម្មករចម្ការកៅស៊ូ ឆ្លងចូលកាប់ឈើ ជួលដីខ្មែរនៅតាមបន្ទាត់ព្រំដែនធ្វើស្រែចម្ការជាដើម៕
No comments:
Post a Comment