វង្ស សុខេង and Ethan Harfenist
ប្លង់សង់ប្រាសាទអង្គរវត្តថ្មីនៅប្រទេសឥណ្ឌា ដែលកម្ពុជាបានធ្វើការតវ៉ា។ រូបថត ដកចេញពីហ្វេសប៊ុក |
ភ្នំពេញៈ ក្រសួងការបរទេសកម្ពុជាជាថ្មីម្តងទៀតបានធ្វើការតវ៉ា ចំពោះគម្រោងសាងសង់ប្រាសាទអង្គរវត្តចម្លងតាមកម្ពុជា ដែលកំពុងដំណើរការសាងសង់នៅក្នុងរដ្ឋ Bihar ប្រទេសឥណ្ឌា ដោយស្នើសុំឲ្យរដ្ឋាភិបាលឥណ្ឌាអន្តរាគមន៍បញ្ឈប់ការសាងសង់នេះដើម្បីរក្សាទំនាក់ទំនងការទូត «ជាប្រវត្តិសាស្រ្ត» រវាងប្រទេសទាំងពីរ។
លិខិតមួយចុះថ្ងៃទី ៦ ខែមិថុនា ពីក្រសួងការបរទេសកម្ពុជា ទៅក្រសួងការបរទេសឥណ្ឌា បានឲ្យដឹងថា៖ «រដ្ឋាភិបាលកម្ពុជាចាត់ទុកការចម្លងប្រាសាទអង្គរវត្ត ដើម្បីអត្ថប្រយោជន៍ពាណិជ្ជកម្ម ប៉ះពាល់យ៉ាងធ្ងន់ធ្ងរដល់បេតិកភណ្ឌពិភពលោក ដែលមានតម្លៃមនុស្សជាតិជាសកល...»។
លិខិតនេះបន្តថា៖ «រដ្ឋាភិបាលកម្ពុជា ស្នើសុំយ៉ាងមុតមាំឲ្យក្រសួងការបរទេសឥណ្ឌា...ពិចារណាឡើងវិញ អំពីគម្រោងសាងសង់ចម្លងអង្គរវត្តដើម្បីរក្សាទំនាក់ទំនងប្រវត្តិសាស្រ្តជាប្រពៃណី រវាងប្រទេសទាំងពីរ និងប្រជាជនរបស់យើង»។
លិខិតនេះបន្តទៀតថា៖ «ប្រាសាទអង្គវត្ត តែងតែតំណាងជានិមិត្តរូបនៃប្រទេសកម្ពុជានៅក្នុងទង់ជាតិរបស់ខ្លួន អស់រយៈពេលជាច្រើនសតវត្សរ៍មកហើយ»។
លិខិតនេះបានធ្វើឡើងបន្ទាប់ពីរដ្ឋាភិបាលកម្ពុជា បានទទួលរបាយការណ៍មួយថា ក្រុមហ៊ុន Mahavir Mandir Trust កំពុងដំណើរការទៅមុខតាមផែនការដើម្បីសាងសង់ប្រាសាទ Viraat Ramayan Mandir ដែលជាប្រាសាទហិណ្ឌូ ដែលមានរចនាប័ទ្ម ស្រដៀងនឹងប្រាសាទអង្គរវត្ត ដែលល្បីបំផុត និងទាក់ទាញភ្ញៀវទេសចរច្រើនបំផុតរបស់កម្ពុជា។
លោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា រហូតមកទល់ពេលនេះលោកមិនដឹងទេ ថាតើក្រុមហ៊ុន Mahavir Mandir Trust បានសុំសិទ្ធិចម្លង ឬអត់ក្នុងការសាងសង់ប្រាសាទថ្មី នោះ។
លោកថ្លែងបន្តថា៖ «ខ្ញុំគិតថា ការចម្លងប្រាសាទអង្គរវត្តមិនមានតម្លៃដូចប្រាសាទអង្គរវត្តរបស់យើងទេ។ ប្រាសាទអង្គរវត្តត្រូវបានចុះបញ្ជីជាតំបន់បេតិកភណ្ឌពិភពលោក ចាប់តាំងពីឆ្នាំ ១៩៩២ ។ ប្រាសាទអង្គរវត្តជារបស់ប្រជាជនទូទាំងពិភពលោក រួមទាំងឥណ្ឌាផងដែរ»។
លោកបន្តថា៖ «អ្វីដែលបារម្ភគឺផលប៉ះពាល់ផ្នែកពាណិជ្ជកម្ម។ ប្រជាជនដែលមិនមានប្រាក់នឹងទៅមើលប្រាសាទចម្លង។ ប៉ុន្តែខ្ញុំគិតថា ប្រជាជនជាច្រើននឹងនៅតែមកមើលប្រាសាទអង្គរវត្តពិត»។
ទន្ទឹមនេះ លោក Kishore Kunal ដែលដឹកនាំក្រុមហ៊ុន Mahavir Mandir Trust បានអះអាងថា ក្រុមហ៊ុនរបស់លោក មិនបានបង្កើតការចម្លងប្រាសាទអង្គរវត្តទេ ដោយថ្លែងថា ប្រាសាទល្បីរបស់កម្ពុជាគឺជាប្រភពនៃការជំរុញឲ្យមានការសាងសង់ប្រាសាទថ្មីនេះ។
លោកថ្លែងថា៖ «យើងគ្រាន់តែប្រើស្ថាបត្យកម្មនៃកំពូលប្រាសាទប៉ុណ្ណោះ។ ការជំរុញឲ្យមានការសាងសង់នេះក៏កើតចេញពីប្រាសាទដទៃៗក្នុងប្រទេសឥណ្ឌាផងដែរ»។
លោក Kunal បានថ្លែងបន្តថា៖ «យើងបានសុំឲ្យកម្ពុជាបញ្ជូនស្ថាបត្យករមកមើលប្លង់ និងសម្រេចថាតើវាជាការចម្លងឬអត់?»។ «ពួកគេនឹងដឹងថា វាជាប្រាសាទថ្មី ប្រសើរជាងមុនដែលចេញពីប្រាសាទជាច្រើន រួមទាំងអង្គរវត្ត ប្រាសាទ Hanuman នៅប្រទេសឥណ្ឌា និងប្រាសាទដទៃទៀត»។
លោក Kunal ថ្លែងបន្តថា ជាលក្ខណៈបច្ចេកទេសមិនមានច្បាប់ណាប្រឆាំងនឹងការចម្លងបេតិកភណ្ឌពិភពលោកទេ ដោយលោកលើកឡើងថា ប្រទេសបង់ក្លាដែស ដែលជាប្រទេសជិតខាងរបស់ឥណ្ឌា បានចម្លងប្រាសាទ Taj Mahal ដ៏ល្បីរបស់ឥណ្ឌា។
លោកបន្តថា៖ «ប្រាសាទអង្គរវត្តគឺជាប្រាសាទមួយ ដែលឧទ្ទិសទៅដល់ព្រះវិស្ណុ ហិណ្ឌូ»។ លោកបញ្ជាក់ថា៖ «ប៉ុន្តែប្រាសាទរបស់យើងនឹងមានព្រះហិណ្ឌូជាច្រើនលើសពីនេះ»។
ទន្ទឹមនេះ លោកស្រី Anne Lemaistre ប្រធានការិយាល័យអង្គការយូណេស្កូប្រចាំកម្ពុជាបានថ្លែងថា៖ «យើងនឹងសិក្សាករណីនេះនៅអង្គការយូណេស្កូ ប៉ុន្តែតាមដែលយើងដឹង នេះគឺជាការទទួលស្គាល់គុណភាពដ៏ខ្ពស់បំផុតនៃប្រាសាទអង្គរវត្ត។ ការចម្លងវាមិនមានគុណភាពដើមដូចប្រាសាទអង្គរវត្តទេ»។
ប្រាសាទអង្គរវត្ត គឺជាប្រាសាទដែលត្រូវបានសាងសង់ឡើងនៅក្នុងសតវត្សរ៍ទី ១២ ដែលនាពេលថ្មីៗនេះ ត្រូវបានបោះឆ្នោតថា ជាប្រាសាទជាប់ចំណាត់ថ្នាក់លេខមួយនៅក្នុងពិភពលោក ដោយគេហទំព័រទេសចរណ៍ Trip Advisor ហើយនៅតែជាប្រភពចំណូលដ៏ធំរបស់កម្ពុជា។
បន្ទាប់ពីកិច្ចប្រជុំបច្ចេកទេសលើកទី ២៤ នៃគណៈកម្មាធិការសម្របសម្រួលអន្តរជាតិសម្រាប់ការការពារ និងអភិវឌ្ឍតំបន់ប្រវត្តិសាស្រ្តប្រាសាទអង្គរវត្ត នៅខេត្តសៀមរាប កាលពីថ្ងៃទី ៦ ខែមិថុនា ឧបនាយករដ្ឋមន្រ្តី លោក សុខ អាន បានថ្លែងថា ប្រាសាទអង្គរវត្តទាក់ទាញភ្ញៀវទេសចរបរទេសមកទស្សនា ចំនួន ២ លាននាក់ក្នុងមួយឆ្នាំ។
នៅតាមបណ្តាញសង្គមហ្វេសប៊ុកក៏បានធ្វើការរិះគន់យ៉ាងខ្លាំងផងដែរ ចំពោះគម្រោងសង់ប្រាសាទអង្គរវត្តថ្មីនៅប្រទេសឥណ្ឌានេះ៕ PS
No comments:
Post a Comment