2015-08-12 RFA
 |
| ក្រុមស្រាវជ្រាវបញ្ហាព្រំដែន នៃរាជបណ្ឌិត្យសភាកម្ពុជា បង្ហាញផែនទីដែលបានពីភាគីពាក់ព័ន្ធដល់អ្នកសារព័ត៌មាន នារាជបណ្ឌិត្យសភាកម្ពុជា កាលពីថ្ងៃទី១១ ខែសីហា ឆ្នាំ២០១៥។
RFA/Tin Zakariya
|
ក្រុមប្រឹក្សាឃ្លាំមើលកម្ពុជា នៅថ្ងៃទី១២ សីហា ប្រកាសមិនទទួលស្គាល់មូលដ្ឋានផែនទីព្រំដែនរបស់រាជបណ្ឌិត្យសភាកម្ពុជា និងថ្កោលទោសចំពោះគម្រោងការធ្វើវិសោធនកម្មរដ្ឋធម្មនុញ្ញមាត្រា២ ដែលទាក់ទងនឹងផែនទីកម្ពុជា។
ការប្រកាសមិនទទួលស្គាល់នេះ ធ្វើឡើងស្របពេលដែលរាជបណ្ឌិត្យសភាកម្ពុជា ក្រោមការដឹកនាំរបស់លោកបណ្ឌិត សុខ ទូច កំពុងប្រមូលផែនទីពីភាគីនានា ដើម្បីយកមកធ្វើការផ្ទៀងផ្ទាត់ជាមួយផែនទីដែលរដ្ឋាភិបាលកំពុងប្រើប្រាស់។
តាមរយៈសេចក្តីថ្លែងការណ៍មួយរបស់ខ្លួនពីប្រទេសន័រវេសន៍ (Norway) ក្រុមប្រឹក្សាឃ្លាំមើលកម្ពុជា បញ្ជាក់ថា ពួកគេបដិសេធ និងមិនទទួលស្គាល់ជាដាច់ខាត នូវរាល់ការយកផែនទីទាំងឡាយណាមកបញ្ជាក់ពីភាពត្រឹមត្រូវរបស់រដ្ឋាភិបាល ក្នុងការបោះបង្គោលព្រំដែនជាមួយប្រទេសវៀតណាម ដោយគ្មានវត្តមានផែនទីដើមនៅអង្គការសហប្រជាជាតិ។
ក្រុមប្រឹក្សាឃ្លាំមើលកម្ពុជា លើកឡើងដែរថា ពួកគេថ្កោលទោសដាច់អហង្ការចំពោះគម្រោងការធ្វើវិសោធនកម្មរដ្ឋធម្មនុញ្ញមាត្រា២ ដែលអាចបើកឲ្យមានការប្រើប្រាស់ផែនទីផ្សេង ដើម្បីបន្តសកម្មភាពបោះបង្គោលព្រំដែនជាមួយប្រទេសវៀតណាម។ ពួកគេចាត់ទុកការធ្វើវិសោធនកម្មរដ្ឋធម្មនុញ្ញមាត្រា២ ថាជាការធ្វើជាតិប្រហារ និងចាត់ទុកជនទាំងឡាយណាដែលចូលរួមធ្វើវិសោធនកម្មមាត្រា២ នេះ ថាជាជនក្បត់ជាតិទៀតផង។
មាត្រា២ នៃរដ្ឋធម្មនុញ្ញកម្ពុជា ចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួន ដែលមានកំណត់ក្នុងផែនទីខ្នាត ១/១០០.០០០ ធ្វើនៅចន្លោះឆ្នាំ១៩៣៣ ដល់ឆ្នាំ១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
ក្រុមប្រឹក្សាឃ្លាំមើលកម្ពុជា យល់ឃើញថា គោលដៅនៃការផ្ទៀងផ្ទាត់ផែនទីដែលរាជបណ្ឌិត្យសភាកម្ពុជា កំពុងដំណើរការធ្វើនេះ គឺរដ្ឋាភិបាលកម្ពុជា មានបំណងជំរុញទៅរកការធ្វើវិសោធនកម្មមាត្រា២ នៃរដ្ឋធម្មនុញ្ញ ដើម្បីតម្រូវតាមខ្សែបន្ទាត់ព្រំដែនដែលបានបោះបង្គោលជាមួយប្រទេសវៀតណាម ៨៣ភាគរយរួចហើយ ដោយផ្អែកលើសន្ធិសញ្ញាព្រំដែនបំពេញបន្ថែមឆ្នាំ២០០៥ និងផែនទី យូធីអឹម (UTM) ខ្នាត ១/៥០.០០០ ដែលផ្ទុយពីមាត្រា២ នៃរដ្ឋធម្មនុញ្ញ។
លោកបណ្ឌិត សុខ ទូច ដែលជាអ្នកផ្ដួចផ្ដើមស្នើឲ្យធ្វើវិសោធនកម្មមាត្រា២ នៃរដ្ឋធម្មនុញ្ញ បានឆ្លើយតបថា ចំពោះការរិះគន់របស់ក្រុមប្រឹក្សាឃ្លាំមើលកម្ពុជា នៅពេលនេះ គឺជាសិទ្ធិរបស់ពួកគេ។
យ៉ាងណាក៏ដោយ លោកបណ្ឌិត សុខ ទូច បានលើកឡើងថា ដោយសារមាត្រា២ នៃរដ្ឋធម្មនុញ្ញកម្ពុជា បានចែងតែអំពីផែនទីដែលកម្ពុជា ប្រើប្រាស់ជាមួយប្រទេសវៀតណាម ដូច្នេះលោកថា ការធ្វើវិសោធនកម្មដើម្បីឲ្យមាត្រា២ នេះ អាចក្តោបទាំងស្រុងទៅលើផែនទីដែលកម្ពុជា ប្រើប្រាស់ជាមួយប្រទេសទាំងអស់ ដែលមានព្រំប្រទល់ជាប់ជាមួយប្រទេសកម្ពុជា គឺជារឿងចាំបាច់នៅពេលខាងមុខ៖ «ខ្ញុំគ្រាន់តែសួរទៅវិញ តើព្រំដែនខ្មែរជាប់នរណាខ្លះ ផែនទីបោនប្រើបានតែជាមួយវៀតណាម ទេ ក្នុងរដ្ឋធម្មនុញ្ញនេះ ចុះជាមួយថៃ ខ្នាត ១/២០០.០០០ ចុះសមុទ្រខ្នាត ១/៣០០.០០០»។
លោកបណ្ឌិត សុខ ទូច ក៏ថ្លែងដែរថា ក្រុមការងារស្រាវជ្រាវផែនទីរបស់លោកនៅរាជបណ្ឌិត្យសភាកម្ពុជា គឺជាក្រុមឯករាជ្យ មិនមែនជាក្រុមអាយ៉ងរបស់រដ្ឋាភិបាលនោះទេ ហើយលោកបានស្នើឲ្យពលរដ្ឋរង់ចាំឃ្លាំមើលការអនុវត្តនៃក្រុមការងាររបស់លោក ជាជាងរង់ចាំតែធ្វើការទិតៀនគ្មានហេតុផល៕
No comments:
Post a Comment