ដោយ ឡេង ម៉ាលី
2015-08-03
ស្ដាប់ ឬ ទាញយកសំឡេង
លោកនាយករដ្ឋមន្ត្រី ហ៊ុន សែន ថ្លែងក្នុងថ្ងៃសម្ពោធបើកការដ្ឋានសាងសង់ស្ពានអាកាសស្តុបតិចណូ រាជធានីភ្នំពេញ នៅថ្ងៃទី៩ ខែកញ្ញា ឆ្នាំ២០១៤។
Photo: RFA
លោកនាយករដ្ឋមន្ត្រី ហ៊ុន សែន ផ្ដាំទៅអ្នកមានផែនទីពិតឲ្យបញ្ជូនមកផ្ទៀងផ្ទាត់ ហើយព្រមានជាមុនថា នឹងមិនលើកលែងឲ្យអ្នកដែលមួលបង្កាច់រាជរដ្ឋាភិបាលថា ប្រើប្រាស់ផែនទីក្លែងក្លាយក្នុងការដោះស្រាយបញ្ហាព្រំដែនជាមួយវៀតណាម ឡើយ។
ការព្រមានរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី៣ សីហា ទាក់ទងទៅនឹងការចោទប្រកាន់ដែលថា រដ្ឋាភិបាលកំពុងប្រើប្រាស់ផែនទីក្លែងក្លាយ៖ «ឥឡូវប្រាប់ទៅផ្ដាំទៅ អ្នកណាមានផែនទីពិត បើមិនបញ្ជូនឲ្យរាជរដ្ឋាភិបាលបញ្ជូនថ្វាយព្រះមហាក្សត្រ ឬបញ្ជូនឲ្យរាជបណ្ឌិត្យសភាដែលគេកំពុងសិក្សា ហើយពេលដែលរាជរដ្ឋាភិបាលអញ្ជើញ សុំកុំគេចមុខក្នុងផ្ទៀងផ្ទាត់ផែនទី។ បើអ្នកឯងគេចមុខ គឺមានន័យស្មើអ្នកឯងបោះបង់ចោលសិទ្ធិ ហើយអ្នកឯងមួលបង្កាច់គេ ដែលមិនត្រូវលើកលែងឲ្យទោះដោយតម្លៃណាក៏ដោយ»។
ការសង្ស័យពីរឿងផែនទីក្លែងក្លាយ ត្រូវបានតំណាងរាស្ត្រគណបក្សសង្គ្រោះជាតិ លើកឡើងជារឿយៗក្នុងពេលដែលរាជរដ្ឋាភិបាលដោះស្រាយ និងបោះបង្គោលព្រំដែនជាមួយប្រទេសវៀតណាម។ គណបក្សសង្គ្រោះជាតិ អះអាងថា ផែនទីដែលត្រឹមត្រូវ គឺផែនទីដែលកម្ពុជា យកទៅតម្កល់នៅអង្គការសហប្រជាជាតិ។ លើសពីនេះទៀត ប្រធានគណបក្សសង្គ្រោះជាតិ គឺលោក សម រង្ស៊ី អះអាងថា ក្នុងពេលនេះលោកមានផែនទីដែលដូចគ្នានឹងផែនទីទុកនៅអង្គការសហប្រជាជាតិ ដែលលោកបានថតចម្លងពីវិទ្យាស្ថានជាតិភូមិសាស្ត្រនៃប្រទេសបារាំង។
លោកនាយករដ្ឋមន្ត្រី ហ៊ុន សែន ហៅការចោទប្រកាន់របស់គណបក្សប្រឆាំង ថាជាការអស់សន្លឹកបៀលេងក្នុងរឿងនយោបាយ។ ស្របពេលដែលលោកកំពុងស្វែងរកផែនទីកម្ពុជា ពិតពីប្រទេសមហាអំណាច និងអង្គការសហប្រជាជាតិ លោកចាត់ទុកផែនទីដែល លោក សម រង្ស៊ី យកពីប្រទេសបារាំង នោះថា ជាផែនទីខ្ចប់មមីសមាន់៖ «ឥឡូវផែនទី បើថាអានេះក្លែងក្លាយ អាណាមួយទៅពិត? រួចហើយទៅជាផែនទីទិញតាមផ្សារបាននេះ។ អាផែនទីទិញតាមផ្សារវាមានអីពិបាក អាហ្នឹងគេខ្ចប់មមីសមាន់ណា៎!»។
ឆ្លើយតបបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ថ្លែងថា ផែនទីដែល លោក សម រង្ស៊ី យកពីប្រទេសបារាំង នោះ គឺដូចគ្នានឹងផែនទីសម្ដេចព្រះនរោត្ដម សីហនុ ចម្លងចេញទៅតម្កល់ទុកនៅអង្គការសហប្រជាជាតិ នៅឆ្នាំ១៩៦៤ ដែរ។ ខាងលោកត្រៀមខ្លួនគ្រប់ពេលសម្រាប់ចូលរួមផ្ទៀងផ្ទាត់ផែនទី ប៉ុន្តែផែនទីដែលអាចទុកចិត្តបាន គឺផែនទីពីអង្គការសហប្រជាជាតិ៖ «មិនព្រមយកផែនទីពីអង្គការសហប្រជាជាតិមកផ្ទៀងផ្ទាត់ឲ្យខ្មែរអស់ចិត្ត បែរជាបង្ខំឲ្យយកផែនទីមកផ្ទៀងផ្ទាត់ ហើយមិនទាន់មានផែនទីគោលដើម្បីផ្ទៀងផ្ទាត់ផងហ្នឹង។ អ៊ីចឹងទោះបីជាផ្ទៀងផ្ទាត់ក៏នៅតែចោទគ្នាដដែលហ្នឹង បើផែនទីលោកប្រធាន សម រង្ស៊ី ផ្ទៀងផ្ទាត់ជាមួយផែនទី លោក វ៉ា គឹមហុង ផ្សេងគ្នា ពេលហ្នឹងចោទគ្នាដដែលថា ផែនទី លោក វ៉ា គឹមហុង ក្លែងក្លាយ គណបក្សប្រឆាំងថាអ៊ីចឹង ឬផែនទីលោកប្រធាន សម រង្ស៊ី ក្លែងក្លាយ ចោទគ្នាទៅវិញទៅមក។ បើសិនជាគាត់ចង់ឲ្យខ្មែរអស់ចិត្ត លែងចោទរដ្ឋាភិបាលថាប្រើផែនទីមិនត្រឹមត្រូវ គួរតែយកផែនទីពីអង្គការសហប្រជាជាតិ មកហើយផ្ទៀងផ្ទាត់ជាមួយផែនទីលោកប្រធាន សម រង្ស៊ី និងផែនទី លោក វ៉ា គឹមហុង»។
ទោះជាយ៉ាងណាក្ដី ខាងរាជរដ្ឋាភិបាលនៅមិនទទួលបានផែនទីកម្ពុជា ដែលស្វែងរកពីប្រទេសមហាអំណាចនៅឡើយទេ។ ទន្ទឹមគ្នានេះដែរ លោកនាយករដ្ឋមន្ត្រី ហ៊ុន សែន អំពាវនាវដល់អ្នកដែលមានផែនទីត្រឹមត្រូវ ឲ្យបញ្ជូនមករាជរដ្ឋាភិបាល ឬរាជបណ្ឌិត្យសភា ដែលលោកបណ្ឌិត សុខ ទូច កំពុងតែដឹកនាំធ្វើការស្រាវជ្រាវ។ លោកបញ្ជាក់ថា រាជរដ្ឋាភិបាលបានផ្ដល់ជូនទៅរាជបណ្ឌិត្យសភាអស់ហើយ ក្នុងឋានៈជាអ្នកវិទ្យាសាស្ត្រធ្វើការស្រាវជ្រាវដោយឯករាជ្យ៕
No comments:
Post a Comment