តំណាងរាស្ត្របក្សសង្គ្រោះជាតិថាអាជ្ញាធរគ្មានឆន្ទៈចាប់ជនដៃដល់បន្ថែមទៀត
ដោយ ថា កិត្យា
rfa 2015-11-22
តំណាងរាស្ត្របក្ស
ប្រឆាំងដែលរងគ្រោះដោយការវាយប្រហារ កាលពីថ្ងៃទី២៦ ខែតុលា
រិះគន់តុលាការ និងអាជ្ញាធរ ថាគ្មានឆន្ទៈចាប់ជនដៃដល់បន្ថែមទៀត
មុនពេលពួកគាត់វិលត្រឡប់ចូលប្រទេសកម្ពុជា
វិញនៅពេលដ៏ខ្លីខាងមុខ។ ទន្ទឹមនេះ
សកម្មជនការពារសិទ្ធិមនុស្សលើកឡើងថា ដើម្បីលាងជម្រះការរិះគន់នោះ
ប្រព័ន្ធតុលាការ និងអាជ្ញាធរ
ត្រូវតែអនុវត្តកាតព្វកិច្ចរបស់ខ្លួនឲ្យមានប្រសិទ្ធភាពក្នុងការ
ស្វែងរកយុត្តិធម៌ជូនជនរងគ្រោះ។
តំណាងរាស្ត្រគណបក្ស
សង្គ្រោះជាតិ ចំនួន ២រូប គឺលោក ញ៉យ ចំរើន និងលោក គង់ សភា
ដែលកំពុងសម្រាកព្យាបាលនៅប្រទេសថៃ នោះ ប្រកាសថា
នឹងវិលត្រឡប់ចូលប្រទេសកម្ពុជា វិញនៅថ្ងៃទី២៤ ខែវិច្ឆិកា
នៅបន្ទាប់ពីក្រុមគ្រូពេទ្យថា
មុខរបួសបង្កឡើងដោយក្រុមបាតុករគាំទ្របក្សកាន់អំណាច បានធូរស្បើយ
ហើយអាចចេញពីមន្ទីរពេទ្យបាន។
លោក ញ៉យ ចំរើន
ថ្លែងប្រាប់វិទ្យុអាស៊ីសេរី តាមទូរស័ព្ទពីប្រទេសថៃ ថា
ចំណាត់ការរបស់អាជ្ញាធរ និងតុលាការ
មិនទាន់ផ្តល់ភាពកក់ក្តៅដល់ពួកលោកជាជនរងគ្រោះនៅឡើយ។
លោកបន្ថែមថា តាមពិតមិនមែនអាជ្ញាធរ
និងតុលាការគ្មានសមត្ថភាពចាប់ជនដល់បន្ថែមទៀតនោះ
ប៉ុន្តែដោយសារគ្មានឆន្ទៈ ព្រោះរឿងនេះទាក់ទងនឹងនិន្នាការនយោបាយ៖
«ចង់ឲ្យអាជ្ញាធរបន្តចាប់អ្នកដែលដៃដល់ដែលមិនទាន់ចាប់បាននៅឡើយ
ហើយស៊ើបអង្កេតអ្នកនៅពីក្រោយនៃការវាយប្រហារនេះ»។
លោក
ញ៉យ ចំរើន រៀបរាប់ថា
ថ្វីត្បិតតែក្រុមគ្រូពេទ្យអនុញ្ញាតឲ្យចេញពីមន្ទីរពេទ្យក្តី
ប៉ុន្តែមុខរបួសរបស់លោក ដូចជាបាក់ខ្ទង់ច្រមុះ និងភ្នែកដែលវះកាត់
ព្រមទាំងដៃដែលបាក់ នៅតែត្រូវការពិនិត្យតាមដានដដែល៖
«ខែក្រោយនេះ ពេទ្យណាត់មកពិនិត្យមើលឆ្អឹង ថាវាដំណើរការដល់ណាហើយ
ហើយដៃដែលបាក់នេះ វាស្វិតម្ខាងទៅ ធ្វើឲ្យខ្ញុំព្រួយបារម្ភ។
ចំពោះឆ្អឹងជំនី និងដើមទ្រូងនៅឈឺនៅឡើយ
ហើយយើងដើរមិនសូវបានដោយសារវិលមុខ ហើយឯកឧត្តម គង់ សភា ដូចគ្នាដែរ
គាត់នៅឈឺស្នាមមុខរបួសនៅឡើយ»។
ក្រោយ
ពីមានព្រឹត្តិការណ៍វាយប្រហារនេះ ក្រសួងមហាផ្ទៃ
បានបង្កើតគណៈកម្មការស៊ើបអង្កេតមួយ
ដើម្បីស្វែងរកក្រុមមនុស្សដែលវាយអ្នកតំណាងរាស្ត្រយកមកផ្ដន្ទាទោស។
វិទ្យុ
អាស៊ីសេរី មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ
បានទេនៅថ្ងៃទី២២ ខែវិច្ឆិកា
ដើម្បីសាកសួរអំពីការវិវឌ្ឍនៃការស៊ើបអង្កេត។
មជ្ឈដ្ឋាន
ពលរដ្ឋ អ្នកនយោបាយ និងអង្គការក្រៅរដ្ឋាភិបាលមួយចំនួន
បានបាត់បង់ការជឿជាក់លើប្រព័ន្ធតុលាការ និងអាជ្ញាធរនៅកម្ពុជា
ជាច្រើនឆ្នាំមកហើយ ដោយសារតែគេមើលឃើញថា
ចំណាត់ការរបស់ស្ថាប័នទាំងពីរនៅតែមានការលម្អៀងច្រើន។
ជាក់ស្តែង
មន្ត្រី និងសកម្មជនគណបក្សសង្គ្រោះជាតិ ចំនួន ១១នាក់
ត្រូវបានអាជ្ញាធរចាប់ខ្លួនបានភ្លាមៗ
ហើយតុលាការក្រុងភ្នំពេញសម្រេចផ្ដន្ទាទោសឲ្យជាប់ពន្ធនាគារព្រៃស។
ក្នុងចំណោមអ្នកទាំងនោះ មានអ្នកខ្លះជាប់ទោសចន្លោះពី ៧ឆ្នាំទៅ
២០ឆ្នាំ
ជុំវិញសំណុំរឿងហិង្សានៅលើស្ពាននាគក្បែរទីលានប្រជាធិបតេយ្យ
កាលពីទី១៥ ខែកក្កដា ឆ្នាំ២០១៤។ នៅមានតំណាងរាស្ត្របក្សប្រឆាំង
និងសកម្មជន ព្រមទាំងអ្នកតវ៉ាដីធ្លី
និងសកម្មជនការពារសិទ្ធិមនុស្សជាច្រើននាក់ទៀត
ត្រូវបានចាប់ខ្លួនក្នុងករណីផ្សេងគ្នា
ហើយកាត់ក្តីបញ្ចូលក្នុងពន្ធនាគារជាបន្តបន្ទាប់ទាំងនៅភ្នំពេញ
និងនៅតាមខេត្ត។
ដោយឡែកករណីបង្ក្រាបហិង្សាលើហ្វូង
បាតុករក្នុងពេលតវ៉ានៅកំណាត់ផ្លូវវ៉េងស្រេង រាជធានីភ្នំពេញ
កាលពីថ្ងៃទី៣ ខែមករា ឆ្នាំ២០១៤ បណ្ដាលឲ្យកម្មករ ៥នាក់ស្លាប់
បាត់ខ្លួនម្នាក់ និងរបួសប្រមាណ ៤០នាក់។
អំពើហិង្សាយ៉ាងកម្រោលទៅលើតំណាងរាស្ត្របក្សប្រឆាំងពីររូប
ដែលសហគមន៍ជាតិ និងអន្តរជាតិមិនអាចទទួលយកបាន កាលពីថ្ងៃទី២៦
ខែតុលា។ ព្រឹត្តិការណ៍សោកសៅជាឧទាហរណ៍ទាំងនេះ ក្រសួងមហាផ្ទៃ
បានត្រឹមតែបង្កើតគណៈកម្មការស៊ើបអង្កេត
ប៉ុន្តែមិនទាន់ឃើញលទ្ធផលស្វែងរកយុត្តិធម៌តាមការទាមទាររបស់ជន
រងគ្រោះនៅឡើយ។
ប្រធានលេខាធិការដ្ឋាននៃគណៈកម្មាធិការ
ប្រព្រឹត្តិកម្មការពារសិទ្ធិមនុស្សកម្ពុជា លោក សួន ប៊ុនស័ក្តិ
សង្កេតឃើញថា
ចំណាត់ការបង្កើតគណៈកម្មការស៊ើបអង្កេតរបស់ក្រសួងមហាផ្ទៃ
ជាទូទៅគ្មានការឡើយ
ពោលគឺគ្រាន់តែបង្កើតឡើងដើម្បីក្លែងបន្លំភ្នែកសាធារណជនប៉ុណ្ណោះ។
លោកបន្ថែមថា ជាកាតព្វកិច្ច ស្ថាប័នរដ្ឋត្រូវតែរកឲ្យឃើញសខ្មៅ
ថាតើអ្នកណាជាអ្នកប្រព្រឹត្តិបទល្មើស គឺទាំងអ្នកចំពោះមុខ
និងអ្នកនៅពីក្រោយ ដើម្បីស្ដារមុខមាត់
ឬលាងជម្រះការរិះគន់ឡើងវិញ៖
«យើងគ្រាន់តែពង្រឹងយន្តការប្រព័ន្ធយុត្តិធម៌ឲ្យវាដើរជាក់ស្តែងទៅ
វាដោះស្រាយបញ្ហាជូនជាតិបានហើយ»។
កាលពីថ្ងៃទី២៦
ខែតុលា តំណាងរាស្ត្រគណបក្សសង្គ្រោះជាតិ ចំនួន ២រូប គឺលោក ញ៉យ ចំរើន
និងលោក គង់ សភា ត្រូវបានបាតុករមួយក្រុមចាប់ទាញចេញពីក្នុងឡាន
រួចព្រួតគ្នាវាយរហូតដល់សន្លប់
ខណៈដែលតំណាងរាស្ត្រទាំងពីរកំពុងបើកបររថយន្តចេញពីរដ្ឋសភា។ លោក
ញ៉យ ចំរើន ថាជនដៃដល់ទាំងនោះ មិនមែនជាពលរដ្ឋសាមញ្ញឡើយ
គឺអាចជាកងអង្គរក្ស និងអាជ្ញាធរមានសមត្ថកិច្ច។
តំណាង
រាស្ត្រទាំងពីរ
បានដាក់ពាក្យប្ដឹងក្រុមបាតុករតាមរយៈមេធាវីរបស់ខ្លួន
ទៅសាលាដំបូងរាជធានីភ្នំពេញ នៅថ្ងៃទី១០ ខែវិច្ឆិកា
ពីបទប៉ុនប៉ងឃាតកម្មគិតទុកជាមុន
និងធ្វើឲ្យខូចខាតទ្រព្យសម្បត្តិដោយចេតនា មានស្ថានទម្ងន់ទោស
ព្រមទាំងទាមទារសំណងជាទឹកប្រាក់ម្នាក់ៗចំនួន ១០០លានរៀល៕
No comments:
Post a Comment