ដោយ ម៉ម មុនីរតន៍
2016-02-07 rfa
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន (ស្ដាំ) លើកបង្ហាញផែនទីកម្ពុជា ដែលលោកអះអាងថា ជាប្រភេទផែនទីបោន (Bonne) ខ្នាត ១/១០០.០០០ ក្នុងរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃទី២៦ សីហា ឆ្នាំ២០១៥។ Photo Provided
Photo Provided
តំណាងរាស្ត្រគណបក្សសង្គ្រោះជាតិ ដែលកំពុងរស់នៅសហរដ្ឋអាមេរិក ប្រាប់វិទ្យុអាស៊ីសេរី ថា លោកនឹងវិលចូលប្រទេសវិញនៅក្នុងខែមេសា ខាងមុខនេះ។ លោក អ៊ុំ សំអាន ដែលសកម្មក្នុងរឿងព្រំដែនរវាងកម្ពុជា និងវៀតណាម បានទៅរស់នៅសហរដ្ឋអាមេរិក មួយរយៈពេល បន្ទាប់ពីស្ថានការណ៍នៅក្នុងប្រទេសកម្ពុជា ចាប់ផ្ដើមឡើងកម្ដៅក្នុងរឿងព្រំដែននេះ។
ស្របពេលព័ត៌មានក្រៅផ្លូវការ ត្រូវបានផ្សព្វផ្សាយជាសាធារណៈថា តំណាងរាស្ត្រគណបក្សប្រឆាំង លោក អ៊ុំ សំអាន អាចនឹងត្រូវចាប់ខ្លួន បើសិនមកដល់កម្ពុជា មែន។ តែមន្ត្រីជាន់ខ្ពស់ក្រសួងមហាផ្ទៃ វិញបដិសេធថា លោក អ៊ុំ សំអាន នៅពុំទាន់ឃើញមានសំណុំរឿងណាមួយដែលអាចកំណត់ថា ត្រូវមានទោស ឬចាប់ខ្លួននៅឡើយទេរហូតមកដល់ពេលនេះ។
ការប្រកាសវិលត្រឡប់មកវិញរបស់ លោក អ៊ុំ សំអាន នៅពេលនេះ ចំពេលដែលលេចចេញនូវព័ត៌មានថា តំណាងរាស្ត្រគណបក្សប្រឆាំងរូបនេះ អាចប្រឈមមុខនឹងផ្លូវតុលាការ ខណៈមន្ត្រីរដ្ឋាភិបាលទទួលបន្ទុកកិច្ចការព្រំដែន ចាត់ទុកថា តំណាងរាស្ត្រគណបក្សប្រឆាំងរូបនេះ ជាអ្នកបង្កទៅជាបញ្ហាជុំវិញវិវាទព្រំដែនរវាងកម្ពុជា ជាមួយនឹងប្រទេសវៀតណាម។
លោក អ៊ុំ សំអាន ប្រាប់វិទ្យុអាស៊ីសេរី តាមទូរស័ព្ទពីសហរដ្ឋអាមេរិក មកថា លោកមិនខ្វល់ពីសុវត្ថិភាពឡើយ ប្រសិនបើមានការចាប់ខ្លួនមែន។ លោកបន្ថែមថា បើពិនិត្យសកម្មភាពរបស់លោកក្នុងពេលកន្លងទៅអំពីព្រំដែននេះ រូបលោកគួរត្រូវបានលើកទឹកចិត្តពីរដ្ឋាភិបាលទៅវិញទេ។ ម្យ៉ាងវិញទៀត បញ្ហាព្រំដែននេះជាចំណុចដែលរដ្ឋាភិបាល និងភាគីពាក់ព័ន្ធ មិនត្រឹមតែយកចិត្តទុកដាក់ទេ តែថែមទាំងគួរបង្កើនការអភិវឌ្ឍជាងនេះទៀតនៅតាមខ្សែបន្ទាត់ព្រំដែន ដើម្បីធ្វើជារបាំងការពារ។ លោកបន្តថា «ខ្ញុំឥតមានការបារម្ភអ្វីទេ ព្រោះខ្ញុំមិនបានធ្វើអ្វីខុសផង ហើយអ្វីដែលខ្ញុំធ្វើ គឺដើម្បីផលប្រយោជន៍ជាតិ និងផលប្រយោជន៍ប្រជាពលរដ្ឋ។ ការពារប្រជាពលរដ្ឋដែលស្រែកយំបាត់បង់ដីស្រែចម្ការនៅតាមជាយដែន។ ដូច្នេះឥតមានការព្រួយបារម្ភទេ»។
បើទោះជាបែបណា លោក សុខ ទូច ប្រធានក្រុមស្រាវជ្រាវកិច្ចការព្រំដែននៃរាជបណ្ឌិត្យសភា ចោទប្រកាន់ លោក អ៊ុំ សំអាន កាលពីថ្ងៃទី៤ កុម្ភៈ ថា ជាអ្នកដែលកូររឿងព្រំដែនរវាងកម្ពុជា និងវៀតណាម ហើយបង្កជាបញ្ហាមិនចេះចប់មិនចេះហើយ។ លើសពីនេះ លោក សុខ ទូច ចាត់ទុកការស្រាវជ្រាវអំពីព្រំដែនកម្ពុជា-វៀតណាម របស់ លោក អ៊ុំ សំអាន ថាមុជមិនជ្រៅទៅមិនឆ្ងាយថែមទៀតផង។
លោក អ៊ុំ សំអាន តំណាងរាស្ត្រគណបក្សប្រឆាំងដែលសកម្មក្នុងរឿងព្រំដែន បានទៅរស់នៅសហរដ្ឋអាមេរិក ជាងកន្លះឆ្នាំមកហើយ ចាប់តាំងពីខែសីហា ឆ្នាំ២០១៥។ នៅមុនពេល លោក អ៊ុំ សំអាន ចេញទៅសហរដ្ឋអាមេរិក លិខិតរបស់លោកដែលស្នើឲ្យ លោក ហ៊ុន សែន ចាត់វិធានការអំពីព្រំដែន ក៏ប៉ុន្តែត្រូវបានប្រធានរដ្ឋសភា លោក ហេង សំរិន បានផ្អឹបលិខិតរបស់លោកយ៉ាងតិច ៣លើកមកហើយ មិនបញ្ជូនទៅរដ្ឋាភិបាល។ ក្នុងលិខិតនោះ លោក អ៊ុំ សំអាន ស្នើឲ្យរដ្ឋាភិបាលផ្អាកបោះបង្គោលព្រំដែនជាមួយវៀតណាម រហូតក្រោយការបោះឆ្នោតឆ្នាំ២០១៨ រួចរាល់សិន។ បន្ថែមពីលើនេះ លិខិតរបស់ លោក អ៊ុំ សំអាន ក៏ទាមទារឲ្យរដ្ឋាភិបាល បង្កើតក្រុមប្រឹក្សាជាតិជាន់ខ្ពស់ ពិនិត្យរឿងព្រំដែន ដែលមានសមាសភាពពីរដ្ឋាភិបាល គណបក្សប្រឆាំង និងអង្គការមិនមែនរដ្ឋាភិបាល និងលិខិតមួយទៀត ស្នើឲ្យរដ្ឋាភិបាលបញ្ចប់ដីសម្បទានចំនួន ៤ម៉ឺនហិកតារនៅខេត្តរតនគិរី ដែលរកឃើញថា ទាហានវៀតណាម កំពុងគ្រប់គ្រង។
មន្ត្រីរដ្ឋាភិបាល និងក្រុមស្រាវជ្រាវកិច្ចការព្រំដែននៃរាជបណ្ឌិត្យសភា ចាត់ទុកការគេចខ្លួនរបស់ លោក អ៊ុំ សំអាន នៅរាល់ពេលពិនិត្យផែនទីអំពីព្រំដែន ថាជាការគេចវេះពីការទទួលខុសត្រូវ និងជារឿងកំសាក។
បើទោះជាបែបណា លោក ខៀវ សុភ័គ មន្ត្រីនាំពាក្យក្រសួងមហាផ្ទៃ បដិសេធថា ចំពោះមុខនៅពេលនេះ ពុំទាន់មានដីកាចាប់ខ្លួនណាមួយប្រឆាំង លោក អ៊ុំ សំអាន ដូចព័ត៌មានបានផ្សព្វផ្សាយតៗគ្នានៅឡើយទេ។ លោកបន្តថា «ខ្ញុំក៏មិនមែនខាងជាប់ចោទដែរ ប៉ុន្តែខ្ញុំអាចនិយាយបានថា លោក អ៊ុំ សំអាន ដូចជាមិនមានដីកានៅឡើយទេ»។
អ្នកស្រាវជ្រាវការអភិវឌ្ឍសង្គម និងជាអ្នកធ្លាប់ស្រាវជ្រាវព្រំដែនផងដែរនោះ លោក កែម ឡី យល់ឃើញថា តំណាងរាស្ត្រ លោក អ៊ុំ សំអាន គួរចិត្តសឿងហ៊ានចូលស្រុកវិញ និងមិនគួរលាក់ពួនខ្លាចការចាប់ខ្លួនដូច្នេះទេ។ ជាងនេះទៀត បើពិតជាមានការចាប់ខ្លួនមែន នោះបានន័យថា កម្ពុជា ត្រូវមជ្ឈដ្ឋានមើលឃើញកាន់តែច្បាស់ថា កំពុងអនុវត្តផ្ទុយទៅនឹងច្បាប់។ ម្យ៉ាងវិញទៀត អ្នកដែលចំណេញ គឺគណបក្សប្រឆាំង ហើយអ្នកដែលខាតបង់ គឺរដ្ឋាភិបាលទៅវិញទេ។ លោកបន្តថា «ត្រូវតែមកហើយមកក្នុងសេចក្ដីក្លាហាន បើទោះជាត្រូវប្រឈមករណីយ៉ាងណាក៏ដោយ ពីព្រោះនៅក្នុងសង្គមនេះ បើជាមនុស្សស្អាតស្អំយ៉ាងម៉េចក៏ដោយ ក៏ត្រូវតែប្រឈមដែរ។ បើសិនជាយើងខ្លាចការប្រឈម»។
បើទោះជាបែបណា លោក អ៊ុំ សំអាន តំណាងរាស្ត្រគណបក្សប្រឆាំងអះអាងថា បើទោះជារូបលោកត្រូវចាប់ខ្លួនដោយអាជ្ញាធរ ក៏លោកមិនខ្លាចនឹងត្រូវប្រឈមមុខដែរ។ ចំណែកសង្គមស៊ីវិលវិញ បញ្ជាក់ថា ពុំមានច្បាប់ណាត្រូវកំណត់ថា មានទោសព្រោះតែសម្ដែងមតិឡើយ។ មាត្រា៤១ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន និងសេរីភាពខាងសារព័ត៌មាន ជាដើម៕
1 comment:
ការលើកឡើងពីរឿងព្រុំប្រទល់ បិតជាត្រឹមត្រូវ តែចំពោះ ពួក ហ៊ុន សែន គេថាវាខុស ហើយបើគាត់ទៅវិញមែន ខ្ញុំថា ៩៩ ភាគរយ ហ៊ុន សែន គេដាក់គុកហើយ ព្រោះ ហ៊ុន សែន មិនហ៊ាននិយាយអ្វីនឹងយួនទេ ដូច្នេះមានជាបែរខាំខ្មែរគ្នាឯង ព្រោះវារសើបពេកក្នុងរឿងយកដីនេះ។
Post a Comment