ដោយ ប្រាជ្ញ ចេវ
2016-02-06 rfa
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៣ ខែមិថុនា ឆ្នាំ២០១៤។
Photo: RFA
|
គណបក្សសង្គ្រោះជាតិ ច្រានចោលការចោទប្រកាន់របស់កូនប្រុសលោកនាយករដ្ឋមន្ត្រី ហ៊ុន សែន ថា គណបក្សសង្គ្រោះជាតិ នៅពីក្រោយការធ្វើបាតុកម្មប្រឆាំងលោក ហ៊ុន សែន នាសហរដ្ឋអាមេរិក នៅថ្ងៃទី១៥ កុម្ភៈ ខាងមុខ។ ការលើកឡើងបែបនេះ បន្ទាប់ពីលោក ហ៊ុន ម៉ានិត ប្រាប់ទៅសារព័ត៌មានក្នុងស្រុកមួយថា ការធ្វើបាតុកម្មនេះត្រូវបានរៀបចំផែនការរួចជាស្រេច ដោយមន្ត្រីជាន់ខ្ពស់ក្នុងគណបក្សសង្គ្រោះជាតិ ដោយមានទាំងការផ្ដល់ថវិកាថែមទៀតផង។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ឲ្យវិទ្យុអាស៊ីសេរី ដឹងនៅល្ងាចថ្ងៃទី៦ ខែកុម្ភៈ ថា គណបក្សសង្គ្រោះជាតិ មានការសោកស្ដាយចំពោះការចោទប្រកាន់ដែលមានចេតនាមួលបង្កាច់ ព្រោះគណបក្សសង្គ្រោះជាតិ ដែលនៅពេលនេះគ្មានគោលការណ៍ធ្វើបាតុកម្មទាំងក្នុងស្រុក និងក្រៅប្រទេស។
លោកបន្តថា ចំពោះបុគ្គលណាដែលគាំទ្រ ឬស្រលាញ់គណបក្សសង្គ្រោះជាតិ ទៅធ្វើបាតុកម្មប្រឆាំងលោក ហ៊ុន សែន ជារឿងបុគ្គល មិនមែនជាគោលការណ៍របស់គណបក្សសង្គ្រោះទេ៖ «»។
សារព័ត៌មានក្នុងស្រុកបានដកស្រង់សម្ដីលោក ហ៊ុន ម៉ានិត ថា ការទាក់ទងគ្នាតាមប្រព័ន្ធអ៊ីនធឺណិតរបស់សកម្មជនគណបក្សសង្គ្រោះជាតិ ដែលលោកទទួលបាន គឺថា ការប្រកាសរបស់គណបក្សសង្គ្រោះជាតិ មិនឲ្យអ្នកគាំទ្រខ្លួនធ្វើបាតុកម្ម ព្រោះគណបក្សនេះចង់ទម្លាក់ការទទួលខុសត្រូវទៅពលរដ្ឋ។
ប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល ប្រកាសថា ពលរដ្ឋខ្មែរ-អាមេរិកាំង រាប់រយនាក់ នឹងធ្វើបាតុកម្មប្រឆាំងវត្តមានលោក ហ៊ុន សែន នៅថ្ងៃទី១៥ ខែកុម្ភៈ នៅសហរដ្ឋអាមេរិក ខណៈលោក ហ៊ុន សែន ទៅចូលរួមក្នុងកិច្ចប្រជុំកំពូលអាមេរិក-អាស៊ាន។
ដោយឡែក អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា លោកមិនទាន់ចោទប្រកាន់បាតុកម្មនោះ ថាជាការរៀបចំរបស់គណបក្សសង្គ្រោះជាតិ ឬពលរដ្ឋធ្វើដោយចិត្តឯងនោះទេ ដោយរង់ចាំមើលថ្ងៃធ្វើបាតុកម្មនោះតែម្ដង៕
No comments:
Post a Comment